भांगरभूंय | प्रतिनिधी
तिरुवनंतपुरम देशांतलें दुसरें एल्डर फ्रेंडली शार
नवी दिल्ली, खबरां संस्था ः कोची उपरांत केरळाची राजधानी तिरुवनंतपुरम आतां देशांतलें दुसरें एल्डर फ्रेंडली शार जाता. हे खातीर पालिकेन एक खाशेलें धोरण तयार केलां. शारांत रावपी सगळ्या जाण्ट्यांची वैजकी तपासणी तांच्या घरांत जातली आनी गरज पडल्यार सगळ्यो हॉस्पिटलाच्यो सुविधा तांकां घरांतच दितले. 70 वर्सां वयर आशिल्ल्या सगळ्या ज्येश्ठ नागरिकांक इलेक्ट्रीक बशींतल्यान मुफत प्रवास करपाक मेळटलो. ही येवजण निमाण्या पांवड्यार आसा.
हे खातीर 12 वांगड्यांची सीनियर सिटिझन कौन्सिची थापणूक केल्या. ताची अध्यक्ष नगराध्यक्ष आर्या राजेंद्रन आसा. तिणें सांगलें, “आमी शारांत रावपी जाण्ट्यांचो सर्वेक्षण करपाचे आसात.” उपरांत घरांत एकटे रावपी जाण्टे लोकांची वळेरी तयार करतले. दुसरी वळेरी जाण्टे लोकांची आसतली, जे तांची भुरगीं कामाक गेले उपरांत सकाळीं ते सांज मेरेन एकटे रावतात. अशा जाण्ट्यांक समाजांत एकठांय हाडपा खातीर आमी वेगळी येवजण करतले.
शारांत दर वर्सा ‘वयोजन फेस्ट’ घडोवन हाडपाची येवजण आसा. पयलें वयोजन फेस्ट 2024 त आयोजीत केल्लें. तातूंत राजकारण, साहित्य, सिनेमा, खेळां सयत जाण्ट्यां खातीर आठ वेगवेगळ्यो कार्यावळी आशिल्ल्यो.
तिरुवनंतपुरमाची महापौर आर्या राजेंद्रन हांणी सांगलें, शाराच्या उदरगती खातीर तयार केल्ल्यो येवजण चालीक लावपाक आनी तयार करापक जाण्ट्यांचो आस्पाव जातलो अशें आमी थारायलां. हे खातीर सर्वेक्षण सोंपतकच वेगवेगळ्या मळार तज्ञ जाण्टेल्यांची वळेरी तयार करतले. ही वळेरी सगल्या सरकारी खात्यां कडेन आसतली. तांच्या गिन्यानाचो आनी कुशळटायेचो उपेग शाराच्या उदरगतीच्या येवजण्यांनी जातलो.
जाण्ट्यां खातीर दरेका वॉर्डांत मुफथ मोबायल क्लिनीक सुरू करतले. मानसीक दुयेंसांनी ग्रस्त आशिल्ल्या जाण्ट्यांक मानसीक समुपदेशन दितले. तशेंच जाण्ट्यां खातीर हेल्प डेस्क आसतलो, जंय तांकां फोन करून खंयच्याय समस्या खातीर मजत घेवंक मेळटली. आपत्कालीन सेवाय मेळटली. वेगवेगळ्या सुवातींनी डे केअर सेंटर सुरू करतले. जंय जाण्टे लोक आपले कुटुंब कामाक गेले उपरांत घरांत एकटेच रावतात ते हांगा रावूंक शकतले. हांगा वेगवेगळे उपक्रमूय चालीक लायतले. जाण्ट्यांक जिणेच्या ह्या पांवड्यार बरें जिवीत जगपाक मेळचें म्हूण आमी यत्न करतात अशें महापौर आर्या राजेंद्रन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
