भांगरभूंय | प्रतिनिधी
भांगरभूंय । प्रतिनिधी
काणकोणः काणकोण रेल्वे स्टेशनांत एक्स्प्रेस रेल्वेचें थांबे परत सुरू करपाचे मागणे खातीर काणकोण ज्येश्ठ नागरीक मंच आनी स्वाभिमानी जाग्रुत काणकोणकारांनी बिरेस्तारा रेल्वे स्टेशनाचेर मोर्चा व्हेलो. 5 जानेवारी मेरेन बंद केल्ले थांबे परत सुरू केले ना जाल्यार स्टेशना सामकार व्हड आंदोलन करपाची शिटकावणी तांणी दिल्या.
हातांत घोशणा तकटे घेवन आनी घोशणा दित लोक नगर्सें हांगा एकठांय जाले आनी रेल्वे स्टेशना कडेन वतना पुलिसांनी तांकां आडायलें. काणकोणचो मामलेदार मनोज कोरगांवकार, पुलीस उपअधिक्षक गुरूदास कदम, काणकोणचो पुलीस निरीक्षक चंद्रकांत गांवस, कोंकण रेल्वे पुलीस निरीक्षक सचीन पन्हाळकार हांणी निदर्शकां कडेन उलोवणी करून तांच्या शिश्टमंडळाक कोकण रेल्वेच्य कारवार विभागाचो विभागीय येरादारी वेवस्थापक सुनील नाडकर हांचे कडेन चर्चा करपाक व्हेलें. कोवीड म्हामारी वेळार बंद केल्ले थांबें आतां परिस्थिती निवळली तरी कित्याक सुरू केले ना हाचें स्पश्टिकरण लोकांनी मागलें.
रेल्वे थांबे रेल्वे बोर्ड थारायता. व्हडलीशी अर्थीक येणावळ नाशिल्ल्यान बोर्डान हे थांबे परत सुरू केले नात अशें नाडकर हांणी सांगलें मात लोकांची मागणी बोर्डाच्याच्या अधिकाऱ्यां सामकार मांडपाचें आस्वासन तांणे दिलां.
फकत कोवीड 19 पयलीं आशिल्ले थांबे परत सुरू करपाची आमची मागणी आसा. नव्या थांबे सुरू करात अशें आमी सांगनात. काणकोणांतल्या रेल्वे वच्ची हे खातीर लोकांनी आपली जमीन कोंकण रेल्वे म्हामंडळाक दिली. अर्थीक येणावळीचें कारण दिवंन हे थांबे परत सुरू करप ना म्हणल्यार काणकोणकारांचेर अन्याय आसा. पर्यटना खातीर पर्यटक काणकोणांत येतात. थांबे बंद आशिल्ल्यान लोकांक मडगांव ना जाल्यार कारवाराक वचून रेल्वे धरची पडटा अशें मोर्च्यांतले लोक उलयतना दिसताले.
बंद केल्ले रेल्वे थांबे केन्नाच्यान सुरू करतले तें सांगपाक लोकांनी सांगलें तेन्ना तें आपूण सांगपाक शकना अशें नाडकर हांणी सांगलें. सरकार काणकोणकारांक गृहीत धरता. पर्यटनाचे नदरेन काणकोणाक सोपोवपाक पळयता असो आरोप कांय जाणांनी केलो. काणकोणचो आमदार मनोज कोरगांवकारान लेगीत थांबे केन्ना सुरू करतले लें लोकांक सांगपाची मागणी केली. कमलाकर म्हाळशी, अनिल भगत, नगरसेवक धीरज नायक गांवकार, विकास भगत, जनार्दन भंडारी, जोसेफ, वैशाल पागी, दिलखूष शेट हांची मोर्चा सामकार भाशणा जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
