जागे जायात ! झॅमले जाल्यार शेणले !!

भांगरभूंय | प्रतिनिधी

धर्मीक भावना दुखावल्यो म्हूण हजारांनी गोंयकार रस्त्यार देंवतात……. आनी गोंयकारांचो फुडार थारावपी अश्या अन्यायां आड मात्त तोंड धापून ओगी रावतात.

गुरू शिटकायता कुरवांनी
रे गुरू शिटकायता कुरवांनी,
मेरेर झॅमलो शेतोड ताची
समूळ भकली गोरवांनी…
अश्या उतरांनी आरंभ जावपी बाकीबाब बोरकार हांची एक कविता आसा. जेन्ना मनीस आपल्या हिता आड आशिल्ले एखाद्रे घडणुके विशीं अजाण आसता तेन्ना ताका कोण तरी शिटकायता. त्या शिटकावणेन तो जागो जावचो आनी आपल्या हक्कां खातीर ताणे अन्याय करतल्याक आव्हान दिवचें अशी अपेक्षा आसता. आमच्या गोंयांत मात्त अन्याय जातलो तरनाटो अन्याया आड लडपाचें सोडून माथ्या वेल्यान पांगरूण घेवन सुशेगाद न्हिदून रावता म्हणपाची इतिहास गवाय दिता.
लागीं लागीं पंचविशेक वर्सां आदीं पुराय गोंयच्या तरनाट्यांनी एकठांय येवन पूर्णानंद च्यारी हांच्या फुडारपणा खाला गोवा हितराखण मंच ह्या व्यासपिठाची स्थापना केल्ली. गोंयकार तरनाट्यांचे हितसंबंध सांबाळून दवरप हो ह्या आंदोलनाच्या स्वरुपांत वावुरतल्या व्यासपिठाचो उद्देश आशिल्लो. गोंय सरकारच्या खात्यांत तयार जावपी भोवतेक नोकऱ्यो त्या वेळार सर्रासपणान गोंया भायल्या उमेदवारांक मेळटाल्यो. गोवा हितराखण मंचान व्हड आंदोलन उबारून ह्यो नोकऱ्यो थळाव्यांकच मेळटल्यो म्हणपाची खात्री केल्ली. निवृत्तीची पिराय जावन लेगीत मुजतवाड मेळयिल्ल्या कांय बिगर गोंयकार अधिकाऱ्यांकय नाका शेवट केल्लो. आनी सगल्यांत म्हत्वाचें म्हणल्यार गोंय शासनाचेर दबाव घालून सरकारी नोकऱ्यां खातीर कोंकणी भाशेचें गिन्यान आनी पंदरा वर्सां राबित्याचो दाखलो सक्तीचो करून घेतिल्लो.
हें सगलें याद जावपाचें कारण म्हणल्यार गोंय विद्यापिठान हालींच कांय पदांच्यो जायराती दिल्यात आनी तांतूंत कोंकणीची सक्ती आनी राबित्याची अट काडून उडयल्या. पात्र गोंयकार उमेदवाराक कुशीक दवरून बिगर गोंयकार उमेदवाराची निवड करपाचें हें कारस्थान म्हणपाचें शेंबडो पोर लेगीत सांगतलो. गोंयकार शिक्षीत आनी पात्र उमेदवारांक शिंगां लावपाची गोंय विद्यापिठांतली ही घडणूक पयलीच न्हय. हाचे आदींय वशिल्याचेर गोंया भायल्या उमेदवारांची निवड जाल्ल्याच्यो साबार देखी आसात. मात्त, पात्र गोंयकार तरनाटो जाचो हे नोकरेचेर अधिकार आशिल्लो तो आवाज काडिना जाल्ल्यान विद्यापिठांतल्या गोंयां भायल्या कारस्थानी अधिकाऱ्यांचें फावत आयलां. गोंय विद्यापिठाचेर ह्या अधिकाऱ्यांचो इतलो शेक आसा कीं ते गोंयच्या कर्मचाऱ्यांक नोकरेंत बडटी दितना वा कायम करतना अडचणींचीं साबार कलमां लायतात आनी तांकां हक्कांक वंचीत दवरतात. गोंयकार मोने, भित्रे आनी लोले जावन अन्याय सोंसतात. फाटल्यान व्हडलीं शापोतां सांगतात, पूण फुडें सरून जाप विचारपाक भितात. देखूनच, हे बिगर गोंयकार अधिकारी आपलें साध्य सादून घेवपांत यशस्वी जातात.
तिशेक वर्सां आदली खबर. कोंकण रेल्वेचे ट्रॅक घालून मार्ग करपाचें काम चलतालें. ह्या कामाक लागपी भोवतेक अभियंते गोंया भायले आशिल्ले. तांणी त्या वेळार हांगा तयार जावपी नोकऱ्यांचेर लक्ष दवरून आपल्या लागींच्या सोयऱ्या- दायऱ्यांक नोकरेक लायिल्ल्याच्यो साबार देखी आसात. आपूण एखाद्रे संस्थेंत वा खात्यांत रुजू जालो म्हणटगीच मागीर आपल्या वरिश्ठांक फुलां माळून वा आडवाटेन आपल्या सग्या- सोयऱ्यांची नोकरेची वेवस्था कशी करची हातूंत हे लोक फिशाल आसतात.
दरेका राज्यांतलें सरकार थळाव्या शिक्षीत आनी पात्र युवकांच्या हितरक्षणाक प्राधान्य दिता. भाशा गिन्यान आनी राबित्याची सक्ती हीं ते खातीर दोन अस्त्रां. गोंयांत मात तरनाटे आपल्या अधिकारां विशीं अनभिज्ञ रावतात. तांच्या दोळ्यां हुजरां कोण तरी तांच्या अधिकाराचें ताट घेवन पासार जाता आनी ते सरकाराच्या नांवान शबय घालीत रावतात. गोंय सरकारय ह्या विशयांत जाय तितली गंभीरताय दाखयना हें कारण आसाच!
गोंय विद्यापिठांत कांय काळा आदीं अनुसुचीत जमाती खातीर राखीव आशिल्लीं पदां भरतनाय ह्या अधिकाऱ्यांनी असोच घोळ घाल्लो. त्या वेळार कांय फुडाऱ्यांच्या सतर्कतायेक लागून अधिकाऱ्यांचो तो बेत सफळ जावंक पावलो ना ही गजाल वेगळी. ही सतर्कताय जाणटेल्यांनी दाखोवचीच, पूण चड खरसाणीन तरनाट्यांनी दाखोवंक जाय. कारण तरनाटे म्हणल्यार जिते- जागते इंगळे. तांच्या वाटेक गेले जाल्यार हात भाजतले म्हणपाचो भंय तयार जावपाक जाय. आपल्याचेर कोणाचें तरी लक्ष आसा आनी आपणे कितेंय कारस्थानां केलीं जाल्यार जिवितभर याद उरपा सारखे भोग आपल्या वाट्याक येतले म्हणपाची भिरांत तांकां आसपाक जाय.
केंद्रीय आस्थापनांतल्या गोंयच्या कार्यालयांत थळाव्यां खातीर राखीव सुवाती आसतात. केन्ना केन्ना त्या पदांच्यो जायराती गोंया भायल्या दिसाळ्यांचेर उजवाडा येतात. गोंयकार तरनाट्याक त्या नोकऱ्यां विशीं खबर उरना. त्यो नोकऱ्यो गोंया भायले घेवन वतात. आमचे खासदार सत्ताधारी पक्षांत आसून लेगीत अश्या घडणुकांचेर आवाज काडिनात हें आमचें दुर्दैव!
2 ऑगस्ट 2024 दिसा गोंय विद्यापिठान भूगर्भ विज्ञान, सागरी विज्ञान आनी हवामान शास्त्र विद्याशाखेच्या जीआयएस आनी रिमोट सेन्सींग ह्या उपशाखे खातीर जायरात दिवन शिक्षक पदा खातीर अर्ज मागयिल्ले. तांतूंत राबित्याचो दाखलो आनी कोंकणी भाशेचें गिन्यान सक्तीचें म्हणपाचीं कलमां नात. ह्या संदर्भांत गोवा फॉरवर्ड पक्षाच्या वावुरप्यांनी हालींच गोवा विद्यापिठाच्या कुलगुरूंक घेराव घालून ताका बरोच घाम काडलो. ह्या पदां खातीर थारायिल्ली मुलाखत स्थगीत दवरपाची पाळी ताचेर हाडली. हें करतना पिरायेची साठी हुपिल्ल्या प्रशांत नायक आनी दिलीप प्रभुदेसाय हांच्या सारख्यांक वाग जावन कुलगुरूंचेर उतरांच्या अस्त्रांनी घुरी घालतना आमी पळयलें. एका काळार विद्यार्थी चळवळींत साबार मागण्यां खातीर रस्त्यार देंविल्ले आनी ते खातीर तत्कालीन सरकारान दाखल केल्ल्या खटल्यांक न्यायालयांत योग्य जाप दिल्ले हे फुडारी. गोंयकार तरनाट्यांच्या आड चलपी ह्या कारस्थानां आड तांणी आनीक कितलो तेंप म्हूण झुजपाचें?
शिक्षीत गोंयकारांनो, तुमच्या अधिकारां विशीं तुमी गंभीर नात व्हय? धर्मीक भावना दुखावल्यो म्हूण हजारांनी गोंयकार रस्त्यार देंवतात. रक्तखेवाच्यो धमक्यो दितात. सामान्य मनश्याक जीण नाका करून सोडटात आनी गोंयकारांचो फुडार थारावपी अश्या अन्यायां आड मात्त तोंड धापून ओगी रावतात.
खरेंच, अजीब है यह गोवा के लोग!

अनंत अग्नी
9422439903