जागृताय तशेंच नेमाची कार्यवाही गरजेची

भांगरभूंय | प्रतिनिधी

परवानो नासतना कांय जाण गाडी चलयतात. तशेंच परवानो मेळ्ळो म्हूण सारखी गाडी चलोवपाक कळटा? अशें म्हणपाक जायना. गोंयांंत वाहन चलोवपाचो परवानो कसो मेळटा? हें सगल्यांक खबर आसा.

गोंयांत सध्या अपघातांची माळ सुरू आसा. आयज हांगा अपघात जालो, थंय एकलो सोंपलो… दोग जाण जखमी जाले, अश्यो
खबरो दर दिसा दिसाळ्यांनी वाचपाक मेळटात. दिसाक एकूय अपघात ना… असो दीस सोदून मेळचो ना. गोंय हें सोबीत आनी ल्हान आसलें तरी अपघातांचें प्रमाण ल्हान ना. राज्याची लोकसंख्या वा आकाराचो विचार करीत जाल्यार अपघातांत तरी गोंय हेर राज्यांक फाटीं घालता अशी स्थिती आसा. धा, बारा दिसां पयलीं बाणस्तारी जाल्ल्या अपघातान पुराय राज्य हादरलें. एके मोटारीन दुचाकी तशेंच चार चाकी गाडयांक दिल्ल्या धपक्यान तिगांक आक्ताक मरण आयलें. ह्या अपघाताक लागून पुराय गोंय दुख्खांत बुडलें. अपघाता विशीं परतून चर्चा तसो हुस्को उक्तावपाक सुरवात जाली.
बाणस्तारी अपघातांत जापसालदार आशिल्ल्या मोटार चालका आड गुन्यांव नोंद जाला. तपास सुरू आसा. कायद्या प्रमाण दोशींचेर कारवाय जातली. ही कारवाय मात बेगीन जावची ना. तशेंच कारवाय जाता म्हणासर आनीक कितले अपघात जातले… कितल्या लोकांचे जीव वतले… हें कोणाकूच सांगपाक जावचें ना. विधानसभा अधिवेशन सुरू आसतना बाणस्तारी अपघात जालो. गोंयांत दिसाक कितले अपघात जातात, कितल्या लोकांक मरण येता… हाची सगली आंकडेवारी दिसाळ्यांनी छापून आयल्या. ह्या अपघाता उपरांत चार, पांच अपघात जाले. दुचाकी वेल्यान तीन, चार जाणांक मरण आयलें. अपघाताचें प्रमाण ही राज्यातली एक मोटी समस्या आसा. दर एकल्यान गाडी चलोवपाचें योग्य प्रशिक्षण घेवपाक जाय. नेम पाळून तशेंच जतनायेन गाडी चलोवप ह्या नेमाची दर एकल्यान कार्यवाही करपाक जाय. रस्तो सुरक्षा ही फक्त सरकार, येरादारी खातें वा पुलिसांची जापसालदारकी ना. सगल्या नागरिकांची ती जापसालदारकी आसा.
अपघातांचीं तरेकवार कारणां आसतात. एकाच कारणाक लागून अपघात जायना. भौशीक बांदकाम खात्यान रोड इंजिनियरिंगांत नव्या तंत्रज्ञानाचो वापर करीत रस्ते योग्य तरेन तयार करपाक जाय. येरादारी पुलिसांनी येरादारीचे सारखे नेम करून येरादारी सुरळीत दवरपाक जाय. येरादारी खात्यान रस्तो सुरक्षे खातीर नेम वा नवे उपक्रम तयार करून ताची कार्यवाही करपाक जाय. ‘मार्ग’ सारख्या बिगर सरकारी संघटणांनी रस्तो सुरक्षे विशीं सरकारान नव्यो सुचोवण्यो करपाक जाय. तशेंच लोकां मदीं जागृताय करपाक जाय. अपघातांचें प्रमाण पळोवन सरकारान नेमांची कार्यवाही खर केल्या. हाचो परिणाम म्हूण खूबशे दुचाकी चालक आतां हॅल्मेट घालपाक लागल्यात. हॅल्मेट पयलीं सावन सक्तीचें आशिल्लें. मात ताची कार्यवाही जायनासली. जे कोण हॅल्मेट घालिनात, तांकां तालांव दिवपाची मोहीम पुलिसांनी सुरू केली. हॅल्मेटा खातीरच्या तालांवाची रक्कम वाडयली. येरादारी पुलिसां कडल्यान नेमाची कार्यवाही सुरू जाली. हाका लागून हॅल्मेट घालपाचें प्रमाण वाडलें. आतां लागीं लागीं 95 टक्के दुचाकी चालक हॅल्मेट घालतात. तरी अजून कांय जाण मुखार पुलीस आसा, अशें पळोवन रस्त्यार व्हॉल्त मारतात आनी परतून वतात. तकली सुरक्षीत उरची, हे खातीर हॅल्मेटाची सक्ती आसा. हें सगल्यांनी मतींत धरपाक जाय.
मोटारीच्या सीट बेल्टा विशीं लेगीत हीच गत आसा. सीट बेल्ट घालो ना तांंका तालांव दिवपाची मोहीम पुलिसांंनी सुरू केली. हाचो परिणाम म्हूण आतां सीट बेल्ट घालपाचें प्रमाण वाडलां. सोरो पियेवन गाडी चलोवपाच्या प्रकाराक लागून खूबशे अपघात जाल्यात. बाणस्तारी अपघाताक कारण आशिल्ले गाडयेंत सोऱ्याच्यो बाटल्यो आशिल्ल्यो. ह्या अपघाता उपरांंत पुलिसांंनी सोऱ्या खातीर कांय थळांंचेर तपासणी केली. सगली कडेन सोऱ्या खातीर चालकांंची तपासणी करप शक्य जावचें ना. सगल्या रसत्यांचेर पुलीस उबे रावून तपासणी करूंक शकनात. तरी लेगीत काय जाग्यांचेर अचकीत सोऱ्या खातीर तपासणी जावपाक जाय. ओव्हरस्पीड गाडयांचेर नियंंत्रण दवरपा खातीर इलेक्ट्रॉनीक कॅमेरा कांय सुवातांचेर बसयल्यात. पुराय राज्यांत इलेक्ट्रॉनीक कॅमेरे बसोवपाचो प्रस्ताव आसा. सुरक्षीत येरादारी खातीर पुराय राज्यांत येरादारीचें प्रमाण चड आशिल्ल्या जाग्यांचेर इलेक्ट्रॉनीक कॅमेरे बसोवपाक जाय. सोरो पियेवन गाडी चलोवप, ओवरस्पिडींग ही अपघाताची कांय कारणां आसात.
आनीक एक म्हत्वाची गजाल म्हणल्यार गाडी चलोवपाचें प्रशिक्षण. परवानो नासतना कांय जाण गाडी चलयतात. तशेंच परवानो मेळ्ळो म्हूण सारखी गाडी चलोवपाक कळटा? अशें म्हणपाक जायना. गोंयांंत वाहन चलोवपाचो परवानो कसो मेळटा? हें सगल्यांक खबर आसा. परवानो दिवचे पयलीं गाडी चलोवपाची चांंचणी जाता. ही चांंचणी कशी जाता? वा वाहन चालक परवानो कसो मेळटा? हाचेर सरकारी यंत्रणेन नदर दवरपाची गरज आसा. वाहन चलोवपाची चांंचणी सध्या सहाय्यक येरादारी अधिकारी घेतात. ही चांंचणी दोन, तीन पांवड्यार जावपाक जाय. तशेंच वाहन चलोवप आनी परवानो घेवप हाचेर जागृताय जावपाक जाय. जागृताय वा मार्गदर्शनपर शिबिरां शिक्षण संंस्थांंनी जातात. ह्या शिबिरांंचें प्रमाण वाडपाक जाय. जे विद्यार्थी दुचाकी घेवन म्हाविद्यालयांत येतात, तांंचेरूय नदर दवरपाची गरज आसा. पर्यटक गाडयांंची जाल्यार शिमेर खर तपासणी जावपाक जाय. पर्यटक गाडयांची तपासणी खाला सतावणूक जाता अशे आरोप जातात. अपघातांंचें प्रमाण विचारांत घेतलें जाल्यार वाहनांची तपासणी जावपाकूच जाय.
अशीर आनी व्हॉल्ता वेल्या रस्त्यांक लागून अपघात जातात. अपघाताचें हें एक कारण आसलें तरी आतां रस्त्यांंची स्थिती सुदारल्या. सगले रस्ते हॉटमिक्स जाल्यात. म्हामार्गाचें रुंदीकरण जालां. रस्ते चकचकीत जाल्ल्यान गाडयांंचो वेग वाडला. रुंदी आनी चकचकीत रस्त्यांचेर गाडी चलोवप सोयीचें जाता, तरी धोको मात उणो जायना. रुंद आनी चकचकीत रस्ते फोंडकुलांच्या रस्त्या इतलेच घातक आसतात. अपघात जालो वा प्रमाण वाडलें की सगले सरकाराक दोश दितात. सरकार रस्ते चकचकीत करूंक शकता, नेम खर करूंक शकता, नेम मोडप्यांक तालांव दिवंक शकता… तरी गाडी चलोवप्यांनी सादूर रावपाक जाय. आपल्या आनी हेरांंचे सुरक्षेची जापसालदारकी वाहन चलोवप्यांंचेरूच सगल्यांत चड आसा.

गणेश जावडेकार
9860610762