भांगरभूंय | प्रतिनिधी
आशावादी प्रकाशनान मांडून हाडिल्ली जागतीक डिजिटल कोंकणी कविगोश्टी हालींच जाली. युरोप, गल्फ तशेंच मुंबय, बेंगळूर, मंगळूर, कूर्ग, गोंय अश्या वेगवेगळ्या प्रांतांतल्या कवींनी हे कविगोश्टींत कविता सादर केल्यो.
येवकार उलोवप करतना विमला वि. पै पुरस्कार जिखपी कवी शैलेंद्र मेहता हांणी सांगलें, ‘डिजिटल माध्यमान वेगवेगळ्या भंवारांत जियेतेल्यांक एका मनान काम करपाची वाट निर्माण करून दिल्या. तिचो बरो उपेग करून आमी, कवींनी कोंकणी भास सगळ्या ल्हान-ल्हान भंवारांक उतरून मुखार येवपाक एक वाट करून दितात. आज कोंकणींत आमी एकले- एकले जावन बौद्दीक चिंतपान कांय थोडीं पावलां मुखार आयल्यात आसुंयेता, पूण सामूहीक पांवड्यार आमचो समाज वा आमचे कवी खंय पावल्यात हो व्हडलो प्रश्न. बरयतले आसात, पूण वाचतले कितले आसात? वाचतले आसतीत, पूण समजतले कितले आसात?
विमला वि. पै. पुरसकार जिखपी कवी उदय म्हांबरेन कविगोश्टीचें अध्यक्षपण केलें. ‘रात नशेची’ कवितेंत कविगोश्टीची सुरवात केल्ल्या उदय म्हांबरे हांणी सांगलें, ‘आमी कोंकणी भाशेची गिरेस्तकाय समजुंचें व्हड मन दाखयलें तर, आमकां कोंकणी भाशक, जांव तो खंच्याय वठारांत आसूं, पूण आमचोच भाव-भयण अशें जाणवता. देखून गोंयांत आसूं, कर्नाटकांत, केरळांत आसूं वा मुंबयांत, कोंकणी भाशक आमचेच आनी हें चिंतप मात्र आमकां मुकार व्हरूंक शकताच. ह्या कविगोश्टींत भाग घेतिल्ल्या कवींची वळक करून जातच समेस्त कवींनी कविता सादर केली. प्रसन्न निड्डोडी, मुंबय (नारिचो आवाज), फिलोमेना सांफ्रान्सिसको, गोंय (दोत), जोन सुंटिकोप्प, कूर्ग (दार), वैष्णवी रायकार, गोंय (जिणें रंग), लाॅरेन्स विनोद बार्बोज, मँचेस्टर- युके (बरवंक चिंतलां.. वाचताय?), वसुधा प्रभू, बेंगळूर (म्हजी मांयकी व म्हजी दुश्मन?), उदय म्हांबरे, गोंय (आयी), मोनिका डे’सा मथायस, डबलीन (मांयगांव आनी पर्गांव), जियो आग्रार (म्हाकाय दान दीवंक शिकय), उर्जिता भोबे, गोंय (वोकल) ह्या कवींचो तातूंत आसपाव आशिल्लो. कवी वल्ली क्वाड्रसान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
