भांगरभूंय | प्रतिनिधी
साहित्यीक प्रकाश नायक हांच्या फेसबूक पोस्टा आड गुन्यांव नोंद
पणजी : कोंकणी आनी मराठी ह्या दोन भाशां मदलो वाद चालू आसतनाच मराठी विशीं सोशल मिडियाचेर पोस्ट घाल्ले खातीर कोंकणी साहित्यीक प्रकाश नायक हांचे आड म्हाड्डोळ पुलीस स्टेशनांत गुन्यांव नोंद जाला. डॉ. मधु घोडकिरेकार हांणी ही कागाळ केल्ली.
‘‘जांकां मराठी जाय तांणीं खोशयेन महाराष्ट्रांत वच्चें. हे लोक गोंयकार तरनाट्यांची वाट लावपाक फुडें सरल्यांत. बहुजन समाजांतल्या नीज गोंयकार तरनाट्यांनी ह्या मेळाव्याक खर विरोध करचो.’’ अशी पोस्ट प्रकाश नायक हांणी ३१ मार्चाक फेसबुकाचेर केल्ली. तांच्या ह्या पोस्टाक आक्षेप घेत डॉ. घोडकिरेकार हांणी म्हाड्डोळ पुलीस स्टेशनांत कागाळ केल्ली. फेसबुकाचेर पोस्ट करून राज्यांतल्या दोन भासांच्या गटांत फूट निर्माण करपाचो यत्न प्रकाश नायक केल्ल्यान तांचेर कारवाय करची, अशी मागणी तांणी कागाळेंत केल्ली. हाची दखल घेवन म्हाड्डोळ पुलिसांनी प्रकाश नायक हांचे आड भारतीय न्याय संहितेच्या कलम १९ (१) (अ) (ब) खाला गुन्यांव नोंद केला. ह्या कलमा खाला गुन्यांव सिद्ध जाल्यार तीन वर्सांचे बंदखणीची ख्यास्त मेळूं येता.
मजगतीं, कोंकणी प्रमाण मराठी भाशेकूय सरकारान राजभाशेचो दर्जो दिवचो, अशी मागणी राज्यांतल्या कांय मराठी मोगींनी केल्या. ते खातीर तांणी समिती स्थापन करून चळवळ उबारपाचें थारायलां. दुसरे वटेन कोंकणीमोगी मराठीक राजभाशेचो दर्जो दिवपाक विरोध करतात. मराठीक फावोशें स्थान राजभास कायद्यांत दिलां. राजभास म्हूण तिका मान्यताय दिल्यार, मराठीभाशकांक गोंयांत सरकारी आनी खाजगी नोकऱ्यो मेळटल्यो, अशें तांचें म्हणणें. तिसरे वटेन रोमी कोंकणीय राजभाशेचो दर्जो दिवचो, अशी कांय जाणांची मागणी आसा.
कोंकणी आनी मराठी कोंकणी भाशा आंदोलनांतले कार्यकर्ते विवीध माध्यमांतल्यान एकमेकां मुखार आयल्यात. आपापले भाशेचें, भुमिकेचें समर्थन करपा खातीर ते लेख बरोवपाक लागल्यात. खबरां चॅनलांचेर भासाभास, सोशल मिडियाचेर व्हिडियो, पोस्ट घालपाक लागल्यात. तांचे मदीं वाद चालू आसतनाच लेखक, कवी प्रकाश नायक हांणी फेसबुकाचेर केल्ल्या त्या पोस्टाक लागून तांचेर गुन्यांव नोंद जाला.
‘प्रत्येक राज्याची एक राजभाशा आसा. कोंकणीक लागून गोंय वेगळें उरलें. महाराष्ट्राची मराठी, गुजराताची गुजराती, तशी गोंयची कोंकणी. कोणाक मराठी जाय जाल्यार तांणी आपखोशयेन महाराष्ट्रांत वच्चें, असो सादो पोस्ट हांवें फेसबुकाचेर घाल्लो. संविधानान म्हाका हें अभिव्यक्ती स्वातंत्र्य दिलां’, अशें प्रकाश नायक हांणी सांगलें.
मजगतीं, कोंकणी राजभाशा ह्या सरकारी कायद्याक सरकारी कर्मचारी विरोध करपाक शकता, असो प्रस्न कांय कोंकणी साहित्यीकांनी सोशल मिडियाचेर विचारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
