जांकां जें मेळपाक जाय तें मेळ्ळें

भांगरभूंय | प्रतिनिधी

‘एक देश एक विचार’ हे वेंचणुकेंतल्यान दिसून आयलो. सरकार स्थापन करता ताणें जनते खातीर सारकें काम करचें, विरोधकांनी तें जाता काय ना तें पळोवन फुडले वेंचणुके खातीर तयारी करची, असो संदेश हे वेंचणुकेन दिलाे.

भाजपान ‘अब की बार चार सौ पार’ सार्थ थारावपी येस जोडूंक ना, तरी सेगीत तिसरे फावटी येस जोडलें हें म्हत्वाचें. भारताचे
पयले प्रधानमंत्री पंडित जवाहरलाल नेहरू हांणी लोकसभेंत जैताची हॅट्रीक केल्या. ते उपरांत कोणाकूच अशी कामगिरी जमूंक नाशिल्ली. प्रधानमंत्री नरेंद्र मोदी हांणी नेहरू हांचें कामगिरीची बरोबरी करतना सरकार स्थापन करपाक जाय तितलें बळगे जोडपाची कामगिरी केल्या.
अंदूंची लोकसभा वेंचणूक सत्ताधारी आनी विरोधक दोगांकूय देख दिवपी थारली. जनतेक गृहीत धरूं नाकात. जनता कितें करपाचें तें दिस्त करता. सरकारान जनते खातीर काम करपाक जाय, जाल्यार सरकार खंय चुकता ती चूक दाखोवन जनतेचें काम सोंपें पद्दतीन जावचें म्हूण विरोधकांनी वावुरपाक जाय, अशें खरें म्हणल्यार राजकारण आसपाक जाय. मात, राजकारण वेगळेच दिशेन वचपाक लागल्यार जनता तुमकां वेंचणुकेंत बुद्द शिकयता. सत्ताधारी आनी विरोधक, दोगांकूय मतदार राजान तांची सुवात दाखयल्या.
‘चार सौ पार’ म्हणपी एनडीएक 300 खासदार हाडपाक जमूंक ना. भाजपाची गाडी 240 सुवातांचेर आडायली. जाल्यार भाजप प्रणीत आघाडी, एनडीए खरस मारीत 293 मेरेन पावली. दुसरे वटेन इंडी आघाडीक विरोधक म्हूण आवाज काडूंक जाय तितलें बळ दिलां. भाजपान चारश्यांची मोख दवरिल्ल्यान जैता मेरेन तरी पावले. जाल्यार इंडी आघाडीन तिनश्यांचीच मोख दवरिल्ली. ते 234 मेरेन पावले. इंडी आघाडीन चारश्यांचें सोडाच साडेतिनशें सुवातो जिखपा खातीर आंखणी केल्ली जाल्यार आयज ते 280 मेरेन तरी पावतले आशिल्ले.
भाजपान फाटल्या चार वर्सांत उदरगतीच्या नांवान उत्सवी वातावरण निर्माण केल्लें. अमूक खंयची गजाल सुरवात करता जाल्यार उत्सव, तमूक गजाल करता जाल्यार उत्सव. उदरगतीच्या पयल्या पांवड्याचें काम जाले उपरांत उत्सव, दुसऱ्या पांवड्या वयलें काम सोंपलें जाल्यार उत्सव, काम जाताच उत्सव. लोकां मेरेन येवजण घेवन वतना उत्सव, लोकांक येवजण्यांचो सामुहीक लाव दिवपाच्या नांवान उत्सव. काम उणें आनी उत्सव चड जाता काय असो प्रस्न पडपा इतले उत्सव जावपाक लागले. भाजपान उदरगतीचीं कामां करूंक ना अशेंय ना. मात, उत्सवांचो दबाजो त्या कामांचेर पड्डो घालता अशी परिस्थिती जाल्ली. बरी रांगोळी काडप आनी निमाणें वयर फुलां घालप, असो प्रकार जाल्यार रांगोळीची सोबा वता. तशें सरकाराच्या कामांचें जालें. उत्सवांचो लाव जावचो सोडून लुकसाणूच चड जालां, अशें म्हणल्यार चूक जावची ना.
दुसरे वटेन काँग्रेसीन आमी सत्तेर ना. वेंचणूक येता तेन्ना तयारेक लागुया अशें म्हणून वेंचणूक हुंबऱ्यार पाव मेरेन सुसेग घेतलो. हो सुसेग इतलो म्हारग पडलो की सगल्या मतदारां मेरेन तें पावूंकच ना. मतदारांक आपले कडेन कनॅक्ट करपाक, तांचो सरकारा आडचो राग विरोधांतल्या मतांत बदलूंक काँग्रेसीक अपेस आयलें अशें म्हणूं येता. वेंचणुके वेळार भाजपा लोकां मेरेन वेगळेवेगळे तरेन पावतना प्रचाराच्यो दोन फेरयो पुराय करता, जाल्यार काँग्रेस धड एकूय पुराय करिना. तेन्ना परत सत्तेर येतले कशे.
वेंचणुके आदीं कितल्याश्याच फुडाऱ्यांचेर वेगळ्यावेगळ्या केशींनी ईडी, सीबीआय, न्यायालयां कडल्यान कारवायो जाल्यो. तशेंच विरोधांतलो मुखेल पक्ष काँग्रेसीचीं कांय मुखेल बॅंक खातीं फ्रिज्ड केलीं. ताचो परिणाम वेंचणुके वेळार दिसलो अशें कांय जाण म्हणटले. पयशे ना म्हूण काँग्रेस सगल्याक जाहीर सभा घेवंक शकली ना. गोंयांत तर काँग्रेसीच्या स्टार प्रचारकांनी पांय लेगीत दवरूंक ना. तेन्ना जैत कशें शक्य आसा, अशेंय कांय जाण म्हणटले. स्टार प्रचारकांनी भाशणां ठोकली म्हूण मतां पडटलीं आशिल्लीं. आनी पडिल्लींच जाल्यार कितलीं पडपाचीं. स्टार प्रचारक नासतना, विरोधांत धेंपो सारखी शक्ती आसतना, भाजपाचो आंखणीबद्द प्रचार सुरू आसतना, भाजपाचे सगले कार्यकर्ते एक जावन नेटान प्रचार करतना दिसता आसतना, दक्षीण गोंयांत कॅप्टन विरियातो जिखलोच कसो? तांच्या जैतान सत्ताधारी पक्षाक बुद्द शिकयल्या. उत्सव नाका, काम जाय. कॅप्टन विरियातो आमचो आवाज ह्या संस्थे वरवीं लोकां मदीं पाविल्लो अॅक्टिविस्ट. तांचें काम सामकें सकयल्यान सुरू जाल्लें. ताचो ताका लाव जालो.
काँग्रेसीन दक्षीण गोंयांतली तिकेट दितना चड त्रास जावचे ना असो निर्णय घेतलो, ताचें फळ मेळ्ळें. कॅप्टन वेगळ्यावेगळ्या तरेच्या आंदोलनांत वांटेकार जाल्लो अॅक्टिविस्ट. ताचे बरोबर सगल्याच गांवांतले, शारांतले अॅक्टिविस्ट वतलेच, तशेंच थारावीक समुदायाचो ताका तेंकों आशिल्लोच. भाजपान काँग्रेसीक रिती केले उपरांत दक्षीण गोंयांत युरी आनी अॅल्टन हे दोगूच आमदार काँग्रेसी कडेन आशिल्ले. ह्या दोगांयनी कॅप्टनाक बरोबर घेवन काँग्रेसींत जीव ओतलो. फोंडें सावन काणकोण. सांगें सावन मुरगांव मेरेन काँग्रेसीक बळगें मेळ्ळें आनी लोकांच्या तेंक्यार विरियातो जिखलो.
उत्तर गोंयांत उमेदवार दितना मात काँग्रेसीन सगलो विचार केल्लो दिसना. काळ बदल्ला, संवसार आधुनिकीकरणा कडेन वता. अश्या वेळार सोशल मिडिया, जन संपर्क आनी आतांचे मुद्दे हांचो ताळमेळ बसपाक जाय. तरणाट्यांचे विशय समजून घेवपाक जाय, असो उमेदवार दिल्यार भाऊक एकवेळ धपको बसतलो आशिल्लो. 20 वर्सां पयलींचीं भाशणां, तेन्नाचे मुद्दे आतां प्रचारा वेळार वापरल्यार ताचो कितलो प्रभाव पडटलो? कॅप्टन विरियाताेन सोशल मिडियाचे म्हत्व जाणून घेवन थंयसरूय बरे पैकीं लक्ष घालें. खलपाच्या बाबतींत तशें जालें ना.
तशेंच खलपा कडेन दिवचल, सत्तरी, थियेचीं मतां काडपाचो प्लानूच नाशिल्लो. सगले मतदारांचेर सोडून चलना. मतदारांक स्वता कडेन जोडपा खातीर कांय गजाली करच्यो पडटात. त्यो जावंक नात. तशेंच पिरायेक लागून सगल्याक धांवपळ करपूय खलप हांकां जमूंक ना. म्हापसा अर्बन बँकेच्या नांवान भाजपान खलप हांचेर हल्लाबोल केलो. ताचेर खलपान बरे पैकीं जाप दितना डिबेट करात म्हूण आव्हान दिल्लें. मात, म्हापसा अर्बनाच्या विशयाचो कितलो फटको बसला आसत? चड आसत अशें दिसना. मतदारां कडेन कनॅक्ट जावपाक तांचें कडेन पावप गरजेचें आसता, हातूंत काँग्रेस फेल जाली, आनी ताचो परिणाम खलप लाखां वयर फरकान हरले.
हे वेंचणुकेंत आरजी फॅक्टर तसो कोणाकूच बादूंक ना. खऱ्या आरजीवाल्यांनी आरजीक मतां मारलीं. आरजीन कोणाचीं मतां फोडूंक ना. अशें तांकां मेळिल्ल्या मतां वयल्यान दिसता. आरजीकूय हे वेंचणुकेन फुडले विधानसभा वेंचणुके खातीर पेंगट बांदात, काम करात असो संदेश दिला.
गोंयांतले जनतेन जसो विचार करून मतां मारल्यांत, तसोच विचार देशांतल्या जनतेनूय केला. ‘एक देश एक विचार’ हे वेंचणुकेंतल्यान दिसून आयलो. सरकार स्थापन करता ताणें जनते खातीर सारकें काम करचें, विरोधकांनी तें जाता काय ना तें पळोवन फुडले वेंचणुके खातीर तयारी करची, असो संदेश हे वेंचणुकेन दिलाे.

अमर पाटील
7507495151