भांगरभूंय | प्रतिनिधी
11 फेब्रुवारी ही चॅम्पियन्स ट्रॉफी खातीर निमाणो पंगड जाहीर करपाची आंतरराष्ट्रीय क्रिकेट समितीची (आयसीसी) निमाणी तारीख आसा आनी त्याच दिसा बीसीसीआय भारताच्या जसप्रीत बुमराच्या सहभागा विशीं निमाणो निर्णय घेतलें. ताचे तंदुरुस्ती विशीं अजून कांय स्पश्ट ना.
बुमराचें हालींच बंगळुरूंत आशिल्ले बीसीसीआयचे सेंटर ऑफ अॅक्सलन्सांत फाटीचें स्कॅनींग केलां.
बीसीसीआयचो वैजकी पंगड आतां निवड समिती आनी भारतीय पंगड वेवस्थापना कडेन चर्चा करतलो आनी उपरांत निमाणो निर्णय घेतलो. 18 जानेवारीक जाहीर केल्ले चॅम्पियन्स ट्रॉफी खातीर भारताच्या 15 वांगड्यांच्या मुळाव्या पंगडांत ताचो आस्पाव केल्लो. तशेंच इंग्लंडा आड चालू आशिल्ले वन डे माळेंतले निमाणे मॅची खातीर ताची निवड केल्ली. चॅम्पियन्स ट्रॉफी पयलीं भारताची ही निमाणी आंतरराष्ट्रीय माळ आशिल्ली. अहमदाबाद शारांत फाल्यां जावपी तिसरी वन डे मॅच तो खेळपाचो आशिल्लो. पूण, मॅचींत खेळपा बदला तो बंगळुरू गेलो.
बीसीसीआयचे वैजकी पंगडा प्रमाण, बुमरा इंग्लंडा आडचे वन डे माळेंतल्या पयल्या कांय मॅचीं खातीर उपलब्ध आसचो ना अशें मुखेल निवड समितीचो अध्यक्ष अजीत आगरकरान जानेवारी म्हयन्यांत चॅम्पियन्स ट्रॉफी खातीर मुळाव्या पंगडाची घोशणा केल्ली, त्या वेळार ताणें तशें म्हणिल्लें.
बुमराक बॉलींग करपा पसून पांच सप्तकांचो विसव घेवपाचो सल्लो दिल्लो आनी फेब्रुवारीच्या पयल्या सप्तकांत ताचे फाटीचो नवीन स्कॅन जातलो अशें लेगीत आगरकरान म्हणिल्लें.
बुमरा जानेवारीचे सुरवातीक सिडनी टॅस्टींत निमाणे खेपे खेळिल्लो. पूण, ऑस्ट्रेलियेच्या दुसऱ्या डावांत ताका बॉलींग घालपाक जमूंक नाशिल्ली. बुमराक चॅम्पियन्स ट्रॉफी चुकता जाल्यार ताचे सुवातेर हर्षित राणाची निवड करपाक शकता. इंग्लंडा आड चालू आशिल्ले माळेंतल्या पयल्या दोन मॅचींनी तो खेळ्ळा. बुमरा चॅम्पियन्स ट्रॉफीच्या फुडल्या टप्प्या खातीर उपलब्ध जालो जाल्यार भारत ताका आपल्या 15 वांगड्यांच्या पंगडांत कायम दवरपाक शकता आनी गरज पडली जाल्यार आयसीसीची मान्यताय घेवन उपरांत बदल लेगीत करपाक शकता. 11 फेब्रुवारी उपरांत कसल्यार बदला खातीर सर्तीचे तंत्रीक समितीची परवानगी घेवप गरजेची आसा.
भारताचो चॅम्पियन्स ट्रॉफी खातीर अ गटांत आस्पाव केला. हातूंत पाकिस्तान, बांगलादेश आनी न्युझिलॅण्ड हे पंगड आसात. भारताच्यो सगल्यो मॅची दुबय जातल्यो. भारत सरकारान पंगडाक पाकिस्तानांत वचपाक परवानगी दिवंक ना. पाकिस्तान सर्तीचो अधिकृत येजमान देश आसा. भारत आपली पयली मॅच 20 फेब्रुवारीक बांगलादेशा आड खेळटलो. ते उपरांत 23 फेब्रुवारीक पाकिस्ताना आड आनी 2 मार्चाक न्युझिलॅण्डा आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
