भांगरभूंय | प्रतिनिधी
18 ऑगस्ट सावन सुरू जावपी आयर्लेण्डाचे भोंवडे खातीर भारताच्या पंगडाची घोशणा केली. सुमार एक वर्सा उपरांत दुखातपींतल्यान बरो जावन पुनरागमन करपी फास्ट बॉलर जसप्रीत बुमराक मुखेली केला. जाल्यार रोहीत शर्मा, विराट कोहली आनी हार्दीक पांड्या ह्या सारक्या सगल्या वरिश्ठ खेळगड्यांक विसव दिवपाचो निर्णय घेतला.
जसप्रीत बुमरा हे माळे वरवीं पुनरागमन करपाचो आशिल्ल्यान भारता खातीर ही माळ म्हत्वाची थारल्या. भारताक फुडल्या म्हयन्यांत आशियायी करंड सर्तींत वांटो घेवपाचो आसा, ते उपरांत ऑक्टोबर-नोव्हेंबर म्हयन्यांत संवसारीक वन डे क्रिकेट सर्तींत खेळपाचें आसा. ताका लागून बुमराचें फॉर्मा सयत पुनरागमन जाता जाल्यार पंगडा खातीर ही फायद्याची गजाल थारतली.
भारताचो पंगड आयर्लेण्डा आड तीन टी-20 मॅचींची माळ खेळटलो. सध्या भारताचो पंगड वॅस्ट इंडीजाचे भोंवडेर आसा. थंयच्यान पंगड थेट आयर्लेण्डाक वतलो.
निवड समितीन रोहीत शर्मा, विराट कोहली आनी हार्दीक पांड्या सारक्या वरिश्ठ खेळगड्यांक विसव दिला. जाल्यार तिलक वर्मा, रिंकू सिंग आनी जितेश शर्मा सारक्या आयपीएलांत बरें प्रदर्शन करपी खेळगड्यांक संद दिल्या.
बुमरा सुमार एका वर्सा उपरांत पुनरागमन करता. फाटीचे दुखापती उपरांत राष्ट्रीय क्रिकेट अकादमींत रिहॅब प्रक्रियेंत वांटो घेतिल्लो. ताणें न्युझिलॅण्डांत फाटीचें ऑपरेशन केल्लें. बुमरान आपली निमाणी मॅच 25 सप्टेंबर 2022 दिसा ऑस्ट्रेलियेच्या पंगडा आड हैदराबादांत खेळिल्लो.
दुखापतीक लागून बुमराक पोरूं युएईंत जाल्ली आशियायी टी-20 सर्त आनी ऑस्ट्रेलियेंत जाल्ली संवसारीक टी-20 सर्त चुकिल्ली.
मजगतीं, ऋतुराज गायकवाड उप मुखेलीपद सांबाळटलो.
पंगड असोः जसप्रीत बुमरा (मुखेली), ऋतुराज गायकवाड (उप मुखेली), यशस्वी जयस्वाल, तिलक वर्मा, रिंकू सिंह, संजू सॅमसन (विकेटकीपर), जितेश शर्मा (विकेटकीपर), शिवम दुबे, वॉशिंग्टन सुंदर, शाहबाज अहमद, रवि बिश्नोई, प्रसिद्ध कृष्णा, अर्शदीप सिंह, मुकेश कुमार आनी आवेश खान.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
