भांगरभूंय | प्रतिनिधी
काणकोण: जवाहर नवोदय विद्यालय काणकोण हे शाळेंत 2023-24 ह्या शिक्षणीक वर्सा खातीर यत्ता सवेंत प्रवेश मेळोवपा खातीर ऑनलायन प्रवेश परीक्षा फॉर्म भरप सुरू आसा. फॉर्म भरपाची निमाणी ता. 31 जानेवारी 2023 अशी आसा.
हे परिक्षे खातीर दक्षीण गोंय जिल्ह्यांतल्या यत्ता पांचवेक शिकपी विद्यार्थी फॉर्म भरू शकतात. विद्यार्थ्यांची जल्म तारीख 1.5.2011 ते 30.4. 2013 हाचे भितर आसची. ह्या विद्यालयांत विद्यार्थ्यांक रावपाची, जेवपाची, शिक्षणाची सगळ्यो सुविधायो फुकट दिता. सगळ्यो सुविधा आशिल्ल्यो भुरग्यां खातीर स्वतंत्र्य अश्यो कुडी आसात. सी बी एस ई अभ्यासक्रमाची वेवस्था आसा. तशेंच संगीत, कला, खेळां, जिम, स्काऊट गायड, संगणक कक्ष, प्रशस्त ग्रंथालय सगळ्यो सुविधा हांगा उपलब्ध आसात. तशेंच टाटा कर्ता, दक्षिणा फावंडेशन, विज्ञान ज्योती हातूंतल्यान चलयांक देश-विदेशांत शिक्षण घेवपाची संद उपलब्ध आसा.
विद्यार्थी दक्षीण गोंय जिल्ह्यांत रावपी आसपाक जाय. तशेंच तो तिसरी, चोवथी सतत पास आसपाक जाय. ओ.बी.सी., एस. सी. , एस् .टी खातीर रिझर्वेशन सरकारी नेमां प्रमाण आसा. चलयां खातीर 1/3 टक्के रिझर्वेशन आसा. 75% रिझर्वेशन गांवगिर्या विद्यार्थ्यां खातीर आसा. फॉर्म भरतना सकयल दिल्ल्या लिंका वेल्यान फॉर्म डावनलोड करून प्रिंट काडून घेवचो. ताचेर विद्यार्थ्यांचा फोटो, ताची सय, पालकांची सय तशेंच जे शाळेंत पांचवेच्या वर्गांत शिकता त्या शाळेच्या मुख्याध्यापकाची सय आनी शिक्को घेवन तो फॉर्म अपलोड करचो. तशेंच आधार क्रमांकूय गरजेचो.
ऑनलायन अर्ज भरपा खातीर https://novodaya.gov.in ह्या संकेत स्थळाचेर भेट दिवन अर्ज भरूंक शकता. चड म्हायती खातीर 9309104933,7018103172 ह्या क्रमांकाचेर संपर्क करचो, अशें विद्यालयाचे प्राचार्य अनिमेष पाल हांणी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
