भांगरभूंय | प्रतिनिधी
नवी दिल्ली, खबरां संस्था ः एका वेळार मार्क्स, लेनिनवादाचो किल्लो मानपी देशांतली मुखेल शिक्षणीक संस्था जवाहरलाल नेहरू विद्यापीठ (जेएनयू) आतां हिंदू शासक छत्रपती शिवाजी महाराजांचेर आदारिल्ली उच्च शिक्षणाचीं दारां उक्तीं करता. रोखडेंच आंतरराष्ट्रीय विद्यार्थ्यांक हांगा छत्रपती शिवाजी महाराजांचेर एमएची पदवी घेवपाक मेळटली. जेएनयूंत इतिहासीक व्यक्तीचेर लक्ष केंद्रीत केल्लो अभ्यास सुरू जावपाची ही पयलेंच खेपेची गजाल.
त्या आदाराचेर पदव्युत्तर पदवी दितले. दोन वर्सां आदीं हांगा अटलबिहारी वाजपेयी स्कूल ऑफ मॅनेजमेंट अँड आँत्रप्रेन्योरशिपची ही संस्था स्थापन जाल्ली. छत्रपती शिवाजी महाराजांच्या अभ्यासा खातीर महाराष्ट्र सरकाराच्या मजतीन 25 कोटी रुपया खर्च करून विद्यापिठांत भव्य भवन बांदलां.
विशेश म्हळ्यार छत्रपती शिवाजी महाराजांचेर अभ्यास केंद्र सुरू करपा खातीर जेएनयूच्या दोन विभागां मदीं भासाभास पळोवपाक मेळ्ळी. स्पेशल सेंटर फॉर नॅशनल सेक्युरिटी स्टडीजच्या मतान छत्रपती शिवाजी महाराज गनिमी कावा ही युध्दकला तशेंच नौदल झुजाच्या कलेंत तज्ञ आशिल्ले. स्कूल ऑफ इंटरनॅशनल स्टडीजाचो तर्क आशिल्लो, संवसारभरांतल्या विद्यार्थ्यांक ह्या अभ्यासा कडेन आकर्शीत करचें. निमाणें स्कूल ऑफ इंटरनॅशनल स्टडीज हे संस्थेन जैत मेळयलें.
हिंदू, जैन, बौध्द अभ्यास केंद्रांय बेगीनूच सुरू…
सूत्रांनी दिल्ले म्हायती प्रमाण, हे संस्थेंतलें अंदूचें पुराय कॅलेंडर भारतीय अभ्यासाचेर आदारीत आसतलें. तातूंत श्रीमंत शंकर देवाचेर खाशेलें अभ्यास केंद्र सुरू करतले. ते नामनेचे आसामी कवी, नाटककार, नर्तक, समाजसंघटक आनी हिंदू समाजसुदारक आशिल्ले. सेंटर फॉर बुद्धिस्ट स्टडीज, हिंदू अभ्यास, जैन अभ्यास केंद्रा तशेंच सेंटर फॉर आयुर्वेद अँड बायोलॉजीचो अभ्यास सुरू करपाक शकता. तशेंच दक्षिणेचे आध्यात्मिक संत राजेंद्र चोला आनी आसामाचे विद्वान लाचित बरफुकन हांचेर आदारिल्लें केंद्र सुरु जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
