जवान हेच आमचे खरे हिरो 

भांगरभूंय | प्रतिनिधी

भालचंद्र आमोणकार: सम्राट क्लब दिवचल वतीन  11 जवानांचो भोवमान

दिवचल: आमी स्वतंत्रपणान देशांत भोंवपाक शकतात. हाचें कारण म्हळ्यार सेनादळ मायनस 36 डिग्री परिस्थितींत देशाचें रक्षण करता. तशेंच देशाच्या खंयच्याय राज्यांत भियेनासतना आमी कुटुंबा सयत भोंवपाक शकतात. हें सगळें फकत देशाच्या जवानांक लागून घडटा. तशेंच देशाच्या खंयच्याय राज्यांत भियेनासतना आमी कुटुंबा सयत भोंवपाक शकतां. हें फकत आर्मिच्या जवानांक लागून. जवान हेच आमचे खरे हिरो, अशें सम्राट क्लबाचे देश पयलो प्रजासत्ताक दिसाचे चेअरमेन सम्राट भालचंद्र आमोणकार हांणी सांगलें. ते सम्राट क्लब दिवचले वतीन आयोजीत केल्ल्या राष्ट्रीय सेना दिसा निमतान 11 जवानांचे भोवमान कार्यावळीक उलयताले. 

ह्या वेळार अध्यक्ष सम्राट निलेश टोपले, सचीव डॉ. प्रवीण सावंत, शेखर नायक आनी हेर मानेस्त माचयेर हाजीर आशिल्ले. 

सुरवातेक भारत मातेच्या फोटोक मानेस्तां हस्तुकीं हार घालून कार्यावळीचें उक्तावण जालें. ह्या वेळार जवान सिताराम पळ, शशीकांत पळ, प्रमोद पळ, सम्राट श्रीधर मयेंकार, पांडुरंग गोसावी, दत्तप्रसाद पंडीत, संदेश पळ, अशिर्वाद खंबल, संदेश नेवगी, सिध्देश बोर्डेकार, जितेंद्र होबळे हांचो मानेस्तां हस्तुकीं फुलां आनी यादस्तीक भेटोवन भोवमान जालो. तांची वळख आनी कामा विशीं म्हायती यदनाथ शिरोडकार हांणी दिली. दरेकल्यान भारत मातेक नमन करून फुलां अर्पण केलीं आनी भोवमान केलो. भोवमान केल्या उपरांत दरेकल्या जवानांनी आपल्यो यादी ताज्यो केल्यो. 

सम्राट क्लब दिवचलच्या वतीन देश पयलो हे फाटभूंयेर प्रजासत्ताक दिसा निमतान अमृत महोत्सवी वर्सा विवीध उपक्रम ता. 15 जानेवारी  ते 26 जानेवारी ह्या काळांत घेतले. ह्या वेळार विश्वास गांवस, प्रसाद झांट्ये, दत्ताराम शेट्ये, सत्यवान हरमलकार तशेंच भोवमान केल्ल्या मानेस्तांचो परिवार आनी हेर हाजीर आशिल्ले. 

मनोगत उक्तायतना श्रीधर मयेंकार आनी सिताराम पळ हांणी सम्राट क्लबान दखल घेतिल्ल्यान खूब बरें दिसलें अशें सांगलें. 

कार्यावळीचें सुत्रसंचालन समन्वयक सम्राट यदुनाथ शिरोडकार हांणी केलें. सोयर्‍यांची वळख आनी प्रास्तावीक डॉ. प्रवीण सावंत हांणी केलें. निमाणें उपकार मानले. कार्यावळीची सांगता राष्ट्रगीतान जाली. निलेश टोपले हांणी हो सुवाळो येसस्वी करपा खातीर विशेश यत्न केले.