भांगरभूंय | प्रतिनिधी
पणजी: भारतीय लश्कराच्या शौर्याक मानवंदना म्हणून फ्लाय ९१ ह्या प्रादेशीक विमानसेवेन एक म्हत्वाची घोशणा केली. भारतीय लश्करांतले जवान तशेंच तांच्या लागींच्या कुटुंबियांक फ्लाय ९१ च्या तिकिटांच्या मूळ दराचेर ५०% सवलत दितले. देशसेवेंत मोलाचें योगदान दिवपी ह्या वीर जवानांच्या सन्माना खातीर ही सवलत जाहीर केल्ल्या, विशेश आसन राखीव दवरप आनी चड सामा खातीरचे येरादारींतूय सवलत दितले अशी म्हायती फ्लाय ९१ न दिली.
ही सवलत फ्लाय ९१ च्या सगल्या उड्डाणां खातीर लागू आशिल्ल्यान, ’पयलें येवप्याक प्राधान्य’ ह्या तत्त्वाचेर उपलब्ध आसा. प्रवासा मजगतीं, लष्करी कर्मचारी आनी तांचे कुटुंबीय दरेकी ५ किलो अतिरिक्त चेक-इन सामानाची सवलतूय दितले.
फ्लाय ९१ कडल्यान ही येवजण भारतीय लश्कराच्या शौर्य, निस्वार्थ सेवा आनी कर्तव्यभावनेक ओंपिल्ली एक कृतज्ञतेची मानवंदना.
राष्ट्रसेवेच्या कार्यात मदत करपा खातीर फ्लाय ९१ सदांच कटिबद्ध आसा. संरक्षण मंत्रालयाच्या सहकार्यान लश्करांतले जवान आनी तांच्या कुटुंबीयां खातीरी ही सवलत दितना आमकां अभिमान दिसता, अशें फ्लाय ९१ चे वेवस्थापकीय संचालक आनी मुखेल कार्यकारी अधिकारी मनोज चाको हांणी सांगलें.
एक जबाबदार भारतीय प्रादेशीक विमान सेवा म्हणून, देशाच्या शिमांची राखण करपी शूर जवानांच्या फाटल्यान खंबीरपणान उबें रावप हें आमचें आद्य कर्तव्य मानता. दिवपी ही सवलत आमच्या कृतज्ञतेचे मनपुर्वक आनी नम्रतायेन अर्पण केल्ले एक ल्हानशें प्रतीक. अशें तांणी म्हणलें.
ही सुविधा घेवपा खातीर पात्र जवानांनी supportfly91.in ह्या ई-मेलाचेर संपर्क करचो.
फ्लाय ९१ भारतांतलें टियर २ आनी टियर ३ शारांक हवाई मार्गान जोडपाचेर लक्ष केंद्रीत केल्ल्या देशांतल्या निमाण्या टप्प्या मेरेन हवाई सेवा पुरवण्याचो यत्न करतात. सध्या फ्लाय ९१ गोंय, हैदराबाद, पुणे, जळगांव, सिंधुदुर्ग आनी लक्षद्वीपांत हे सेवेची पुरवण करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
