भांगरभूंय | प्रतिनिधी
आयज भारताची लोकसंख्या 147 कोटी 77 लाख इतली व्हड आसा. भारत आयज लोकसंख्येचे बाबतींत संवसारांत पयलो आसा. भारतान लोकसंख्येचे बाबतींत चीनाक केन्नाच फाटीं उडयला. सिव्हील रजिस्ट्रेशन सिस्टम प्रमाण देशांत 2023 वर्सा 2.52 कोटी जल्मनोंदणी जाली. 2022 चे तुळेन सुमार 2.32 लाखांनी उणी जाली. जाल्यार मरण 2023त 86.6 लाख लोकांक मरण आयलें. हेंच प्रमाण 2022त 86.5 लाख इतलें आशिल्लें. वट्ट देशांत जल्माचो दर कांय प्रमाणांत उणो जायत आशिल्ल्याचें दिसून येता. मरणाचें प्रमाण मात वाडत चल्लां.
अशेंच प्रमाण कांय वर्सां चालूच उरत जाल्यार भारताची लोकसंख्या उणी जावपाची चड शक्यताय आसा. आयज देशांत जमनी उण्यो जायत चल्ल्यात. विकास, घरां बांदपाचे प्रकल्प हाका लागून जमनीचें प्रमाण उणें जायत चलिल्ल्याचें दिसून येता. शेती उत्पन्नाक लेगीत कांय मर्यादा आसात. अवर्शण, चड पावस हाका लागून हालीं पिकांचें खूबशें लुकसाण जायत चल्लां. ताका लागून आयज जरी देश अन्नधान्याचे बाबतींत स्वयंपूर्ण दिसत आसलो तरी फुडारांत कितें जातलें हाचो अदमास काडप खूब कठीण गजाल आसा. ताका लागून लोकसंख्या उणीं जावप गरजेची आसा. निदान तातूंत वाड जावंक फावना.
एके म्हायती प्रमाण जल्मदर म्हणल्यार प्रती 1000 लोकसंख्ये फाटल्यान जावपी जल्म आसून सरकारी आंकडेवारी प्रमाण 2013 वर्सा भारताचो जल्मदर 21.4 टक्के आशिल्लो. 2023त हें प्रमाण 18.4 टक्के आशिल्लें. 50 वर्सां पयलीं म्हणल्यार 1971 वर्सा भारतांतलो जल्मदर 36.9 टक्के इतलो व्हड आशिल्लो. ताका लागून फाटल्या कांय दसकांनी देशांतलो जल्मदर व्हड प्रमाणांत उणो जाल्ल्याचें नदरेक येता. शारी आनी ग्रामीण वाठाराचो विचार करीत जाल्यार शारांनी जल्मदर चड प्रमाणांत उणो जाल्ल्याचें दिसून आयलां.
राज्यांचो विचार करीत जाल्यार बिहारांत सगल्यांत चड 25.8 टक्के इतलो चड जल्मदर आसून अंदमान-निकोबारांत सगल्यांत उणो 10.1 टक्के जल्मदर आसा.
शांताराम वाघ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
