भांगरभूंय | प्रतिनिधी
आदलो वस्ताद जर्मनी पंगडाचें बायलांचे संवसारीक फुटबॉल सर्तींतलें आव्हान मुळावे फेरयेंत सोंपलें. दक्षीण कोरिया पंगडान एच गटांतले मॅचींत जर्मनी पंगडाक 1-1 असो बरोबरींत आडायलो. ताका लागून जर्मनीक चार गुणांचेर समाधान मानचें पडलें. ह्या गटांतल्यान कोलंबिया आनी मोरोक्को ह्या दोन पंगडांनी निमाण्या 16त सुवात मेळयली. जर्मनीन 2003 आनी 2007त वस्तादपण जोडिल्लें.
ऑस्ट्रेलिया-न्युझिलॅण्डांत चालू आशिल्ले बायलांचे संवसारीक सर्तींत लेगीत जर्मनी वस्तादपणाचो मुखेल दावेदार आशिल्लो. आपले पयले मॅचींत ताणें मोरोक्कोक 6-0 अशा फरकान हारोवन सर्तीक जबरदस्त सुरवात केल्ली. पूण, ते उपरांत कोलंबिया कडल्यान 1-2 अशी हार घेवची पडिल्ली. ताका लागून दक्षीण कोरिया आडचे मॅचींत जैत जोडप गरजेचें आशिल्लें. पूण, ताका बरोबरीचेर समाधान मानचें पडलें.
दक्षीण कोरिया वतीन चो सो ह्यून हिणें पयलो गोल केलो. जाल्यार अॅलेक्झॅंड्रा पॉप हिणें बरोबरीचो गोल केलो. दोनूय गोल पयल्या अर्दांत जाले.
मजगतीं, मोरोक्को पंगडान पयले खेपे बायलांचे संवसारीक फुटबॉल सर्तींत खेळटा आनी पयल्याच यत्नांत तो बाद फेरयेंत पावलो.
मोरोक्को बाद फेरयेंत फ्रान्सा आड खेळटलो. ही लडत 8 ऑगस्टाक अॅडलेड शारांत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
