भांगरभूंय | प्रतिनिधी
संवसारीक फुटबॉल सर्तींत अर्जेंटिना उपरांत जर्मनीक गट पांवड्या वयले मॅचींत खर धपको बसलो. चार खेपेचो संवसारीक वस्ताद जर्मनी पंगडाक जपानान 2-1 अशा गोल फरकांनी हारयलो.
जर्मनी पंगडान पयल्या अर्दांत बळिश्ट पंगडा भशेन खेळ करीत जपाना आड 1-0 अशी आघाडी घेतली. पूण, दुसऱ्या अर्दांत जपानान जबरदस्त प्रत्त्युतर दितना जर्मनीचें आव्हान परतावन लायलें.
जपाना वतीन रिट्सू डोआनान 75व्या मिनटाक जाल्यार ताकुमा असानोन 85व्या मिनटाक गोल करून जैत निश्चीत केलें.
पयल्या अर्दांत जर्मनी एकदम सुसाट आशिल्लो. ताच्या गुंडोगनान 33व्या मिनटाक मॅचींतलो पयलो गोल केलो. ताका जपानाचो गोलकीपर गोंडाचे चुकीक लागून पॅनल्टी मेळ्ळी, ताचें गुंडोगनान गोलान रुपांतर करपाक कसलीच चूक केली ना.
फक्त पयल्या अर्दांतल्या खेळाची चर्चा करपाची जाली जाल्यार जर्मनी पंगडान जपानाच्या गोलपोस्टाचेर 15 खेपे आक्रमक चाली रचल्यो. तातूंतले स शॉर्ट्स हें तांचे ऑन टार्गेट आशिल्ले. दुसरे वटेन बचावात्मक मोडांत आशिल्ल्या जपानाक एकदा लेगीत जर्मनीच्या गोलपोस्टाचेर आक्रमक करपाक जमलें ना. बॉलाचो ताबो आनी पासींग ह्या दोनूय बाबतींत जर्मनी पंगड हो जपाना परस बरोच मुखार आशिल्लो.
पयल्या अर्दांत जर्मनी पंगडाचो धडाको पळयलो जाल्यार तो ही मॅच सहज जिखतलो अशें दिशिल्लें. पूण, दुसऱ्या अर्दांत जपानान जबरदस्त खेळ करीत जर्मनीच्या गोलपोस्टाचेर आक्रमक चाली रचल्यो. तातूंतले 12तले 4 शॉर्ट्स अचूक गोलपोस्टाचे दिकेन मारले. तातूंतल्या दोन शॉट्सांचेर ताका गोल करपाक येस आयलें.
जपाना वतीन पयलो गोल हो रिट्सून 75व्या मिनटाक केलो. जपानान बरोबरी मेळोवपा खेरीत जर्मनीचें आक्रमण आडावपाक लेगीत येस मेळयलें. ताचे बचाव फळीन जर्मनीचे णव शॉट्स परतावन लायले. मजगतीं मॅच 1-1 अशी बरोबरींत सुटल्ली अशें दिसता आसतनाच ताकुमा असानोन 83व्या मिनटाक जपानाचो दुसरो गोल करून जर्मनीक मोठो धपको दिलो. ते उपरांत जर्मनीन इंज्युरी टायमा मेरेन बरोबरी सादपाचो यत्न केलो खरो पूण, ताचो दरेक यत्न जपानान परतावन लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
