भांगरभूंय | प्रतिनिधी
जपानी आनी डच नागरिकूय काजींच्या मोगांत
भांगरभूंय । प्रतिनिधी
पणजीः अंदूं गोंयच्यो 53 टक्के काजी जर्मनी देशांत निर्गत जाल्यात. जर्मनी वांगडा जापान आनी नेर्दलेंड्स फक्त ह्या तीन देशांनी गोंयच्या काजींची निर्गत जाता, अशी म्हायती शेतकी आनी प्रसंस्कृत खाण उत्पन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ले आंकडेवारी प्रमाण अंदूं अर्थीक वर्स 2025-26 त एप्रील ते जुलय मजगती ह्या तीन देशांनी 102 मॅट्रीक टन काजू बियांची निर्गत जावन 1 मिलियन यूएस डॉलर म्हणल्यार 8.63 कोटी रुपयांचें मोल ह्या काजींक आयलां. सगल्यांत चड निर्गत जुलयांत जाली आनी 33.95 मॅट्रीक टन काजींचे निर्गतीक 2.94 कोटी रुपया मोल आयलां.
संवसारीक पांवड्यार सगल्यांत चड गोंयच्या काजींचे मोगी जर्मनचे लोक आसात. 54.43 मॅट्रीक टन इतल्या काजींची निर्गत जावन 4.45 कोटी रुपया मोल फावो जालां. जाल्यार दुसरे सुवातेर गोंयच्या काजींचे जपानी मोगी आसात. जपानांत 31.75 मॅट्रीक टन काजींची निर्गत जावन 2.82 कोटी रुपया मोल फावो जालां. गोंयच्या काजींचे मोगी म्हूण तिसरी सुवात डच नागरिकांक फावो जाल्या. नेर्दलेंड्स ह्या देशांत 15.88 मॅट्रीक टन काजींची निर्गत जावन 1.28 कोटी रुपयांचें मोल फावो जालां.
एप्रीलांत जर्मनींत 18.14 मॅट्रीक टनांच्या 1.38 कोटी मोलाच्यो काजी निर्गत जाल्ल्यो. मे म्हयन्यांत जपानांत 15.88 मॅट्रीक टन इतल्या 1.40 कोटी रुपयांच्यो आनी नेदरलेण्डांत 15.88 मॅट्रीक टनाच्यो 1.28 कोटी रुपयांच्यो काजी निर्गत जाल्यो. जूनांत जर्मनींतले निर्गतींत 36.29 मॅट्रीक टन आनी 3.02 कोटी रुपया मेरेन वाड जाली. जाल्यार जुलयांत जर्मनी आनी जपानांत निर्गत जावन, जर्मनींतले निर्गतींत 54.43 मॅट्रीक टन आनी 4.54 कोटी रुपया वाड जाल्या. तशेंच जपानांत निर्गतींत 31.75 मॅट्रीक टन आनी 2.82 कोटी रुपया मेरेन वाड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
