जय सिया- राम

भांगरभूंय | प्रतिनिधी

शरयू न्हंयच्या पुण्यतिरार,
सोबीत सुंदर आसलें शार,
त्या शाराचें नांव अयोध्या.
हें गोंय शाहीर उल्हास बुयांव हांचें गीत भुरगेपणात आयकल्लें. फाल्यां अयोध्येत जय श्री राम, श्री राम जय राम जय राम, जय दुर्गे, जय जगदंबेच्यो आरती, गीतां आयकतना सगल्यांक (अयोध्येच्या नांवान खेपतल्यांकय) अयोध्येक वचपाकच जाय, अशें दिसतलें. अयोध्येक वचपाचें, रावपाचें बुकिंग फुल्ल अशो खबरो वाचूंक, आयकुपाक मेळपाक लागल्यात तेन्ना सादूर रावन ऑफ सिझनांत वचप बरें. फाल्यां घरांत बसूनच रामलल्लाचें दर्शन घेवया, एक पणटीय घराघरांनी लावया, जय सिया- राम म्हणुया. उत्तर प्रदेशाच्या लागसरल्या उत्तराखंड राज्यांतले नागरीकच फुडल्या वर्सा अयोध्येक वचपाक सोदतात जाल्यार आमी ताकतीक कित्याक करप?
आमची मामाई (आईची आई) अयोध्येक गेल्ली, आंगार पाल पडटकच आमची आई अयोध्येची पुण्याय सांगताली, मामाईची याद करीत. अयोध्येक दोनदां वचपाची संद फाटल्या दोन वर्सांत म्हजे धुवेक, जावंयांक मेळ्ळी. पर्यटन, कंपनीच्या कामा निमतान. हालींच ‘जय श्री राम, जय श्री राम’ आयकतना हांवें तांकां विचारलें, कशी आसा अयोध्या? कितें मेळ्ळें तुमकां अयोध्येच्या शरयू घाटार, पयलींच्या अयोध्या मंदिरांत वचून? एकच जाप, “आनंद, खोशी, वेगळोच अणभव आशिल्लो तो.”
राष्ट्रीय सेवा संघाच्या गोंय फांट्याचे कालचे, आतांचे सरसंघचालक सुभाष वेलिंगकार, रत्नाकर लेले, दिलीप बेतकेकार, विश्वास सतरकार आनी राजकी फुडारी यादींनी घुस्पल्यात. दादा, आपा, काका, ताई, भाऊ, आजो, आजी जावनय जय श्री राम, जय सिया- राम म्हणपाची उमळशीक तांकां आसा. राम मंदिरा कडेन कोण जोडिल्ले, मंदिरा खातीर कोण मोडिल्ले, तिश्टल्ले ताच्यो यादी व्हड. नाका म्हणपी निमाणे कोणूच आसचेना हें सत. फाल्यां नाका परवां वचुया हें सांगपाचें राजकारण गोंयांतय चल्लां.
लोकसभा वेंचणुकेक रामलल्लाची प्राणप्रतिष्ठा, राम मंदिरा उपरांत 33 टक्के अस्तुरी विधेयक मान्य करुन घेतलां हें रोखडेंच आयकुपाची तयारी दवरात. गोंयच्या मतदारांत 50 टक्क्यां परस चड नारीशक्ती आसा, तिचें मत मोलादीक. इतलो तेंप ती झुजली, आजय झुजता दुसऱ्यां खातीर, आतां तिका झुजचें पडटा आपल्या खातीर. गोंयची अस्तुरी सुदारल्या, तिका ताचे बराबरीचो राजकी पावंडो मेळोवपाक हे फुडें यत्न करचे पडटले. पुस्तकांनी, भोव- माध्यमांनी जय श्री रामा वांगडा जय सिया- राम म्हणप समा जातलें.
जय श्री राम रामाची तर जय सिया राम दोगांयचीय राम आनी सितेची व्हडविकाय गायता, सांगता. देसांत राम, सितामाईचीं मंदिरांय आसात. गोंयच्यान रामलल्ला खातीर कितें धाडलां आसत? कुवाळ्याची कापां, दुदफेणे, तिळांलाडू, तिळगुळ, तिकशे फोव, पिठ्याचे लाडू? दिवली, लामणदिवो, आबोल्यांचो झेलो, सुरंगांची फांती, ओवळांची माळ मायेमोगान, भक्तीभावान पावतलीच. रामलल्ला, राम मंदिराच्यो, पेठा आनी जिलबेच्यो काणयो सांगपी भौमाध्यमी स्त्रीशक्तीक सलाम. अयोध्येक वता आसतना, वतकीच तीय बदलता, सुटाबुटांतल्यान साडी, सलवार कमीज असो तिचो भेस. गोंयांतय चर्च, मंदिरांच्या भेसान शिस्त येता, निर्णयाचें राजकारण नाका.
कार्नाव्हालांत किंग मोमो जाल्ले खासदार फ्रान्सिस सार्दिन दक्षिणेतल्यान परतून दिल्लीक लोकसभेंत खरेंच वतले? माजी खासदार एदुआर्द फालेरो तांचो प्रचार करपाक आसतले? उत्तरेतलें आमदार कार्लोस फेरेरा दक्षिणेंत आनी दक्षिणेंतले आमदार आल्टॉन डिकॉश्ता उत्तर जिल्लो काँग्रेसीक जागे करतले? धांवडायतले? प्रचारमुखेली, स्टार प्रचारक कोण आसतले? आदीं लोकसभा, विधानसभा वेंचणुकांनी गोंयांत पोस्टरां खांद्यार घेवन चलपी, भोंवपी केरळचे काँग्रेसचे आमदार रमेश चेन्निथला हांकां महाराष्ट्रांत धाडल्यात. वेंचणुकेंतल्या रेवड्यांचीं राजकारण खेळपाक, रेड्या -पाड्यांक झुजोवपाचीं गणितां तांकां बेस बरीं कळटात.
उत्तर गोंयांत भाजप चिंतेस्त ना, पक्ष आनी केंद्रीय मंत्री श्रीपादभाऊंचें नातें सुरवेक सावन. दक्षिणेतय उमेदवार पायलेक पंचवीसय मेळत, अचूक सोदल्यार तो भाजपचो म्हणून जिखतलोच हें अपक्ष आमदारय सांगतात. प्रदेशाध्यक्ष खासदार सदानंद तानावडे वेंचणूक वेवस्थापनाचो अणभव घेतिल्ले. तेन्नाच्या आतांच्या वेंचणुकांनी नवें कितें? सोशल इंजिनियरिंग, समाजाचें गणित जय श्री राम म्हणत तपासपाचो वावर नेटान सुरु जाला.
देवळां नितळसाणींतल्यान वेंचणूक जाहीरनाम्यात स्वच्छ भारत 3 पर्व आसतलें हें कळीत केलां. कोयराच्या वेवस्थापनांतल्यान कांपाल परेड ग्रावंडार पणजेक आनीक एक वॉकिंग, जॉगिंग ट्रॅक मेळपाचो आसा. ग्रावंडाक बरी राखणे वणतय मेळ्ळ्या, नवो रस्तो, पासय जातली. नितळसाण राखप, सरकारी वास्तुची जतनाय घेवपाचो वावर तुमी आमी करुया. मंदिरांनीय ‘जय सिया राम’ करतना सांबाळूया.

सुहासिनी प्रभुगांवकार

9881099260