भांगरभूंय | प्रतिनिधी
जाय तीं संकश्टां गोंयांचेर आयलीं. पूण गोंयकारांनी भारतीय संस्कृती, तातूंतले आदर्श, परंपरा, रिती सांबाळून दवरल्यो. राम हे दैवत ह्याच आदर्श जतनाच्या संकल्पनेंतल्यान पुजतात अशें एक श्रद्धास्थान आसा. उत्सव आदर्श संस्कृतायेचो, उत्सव भारतीय अस्मितायेचो. राममंदिराची बांदणी हें हिंदुत्वाचें शुभ प्रतीक.
प्रभू रामचंद्र हे विष्णूचो अवतार. रामाक पळोवन मन शांत जाता. मनीस स्वताक विसरून वता. भक्तीन तल्लीन जाता. राम हे एक आदर्श, सत्यवचनी देवतेचे प्रतिक. ताचो उत्सव मनोवप म्हणल्यार रामाचे गुण आत्मसात करप.
प्रभु श्रीरामाच्या आदर्शाचें पालन करप हें सदांच बरें. सत्य, नितिमत्ता, कर्तव्यनिश्ठा आनी संयम हे रामाच्या जिवितांतले मुख्य घटक. तीं मुल्यां आमी गोंयकारांनी आंगांत रुजोवन घेवंक जाय. रामनामाचो जप मनशांती दिता. सदांच ओंठाचेर हे शब्द येवप म्हणल्यार मानाक समाधान मेळटा. सगल्यांनी श्रीरामाचें कुटुंब प्रेम, संयम, विनम्रताय, कर्तव्यपालन, धिटाय हे गुण सांबाळून दवरूंक जाय.
श्रीरामान रामराज्याची स्थापना केली. लोक सुखासमाधानान रावताले. आयज पसून रामाचो आदर्श घेवन कार्य केल्यार सुख, शांती, गिरेस्तकाय नंदतली, हातूंत दुबाव ना. आयज समाजांत जें कितें घडटा तें पळयल्यार रामराज्य येवप सामकें गरजेचें.
राम हो भारतीय समाजाचो भोवमान जावन आसा. आमच्या मनांत, जिणेशैलींत सदांच रामजप आसपाक जाय. श्रीरामरक्षा स्त्रोत्र, गीतरामायणांतलीं गितां सदांच आयकुपाक जाय. तशें केल्यार आमची जीण सार्थकी लागतली. श्रीराम एकवचनी, एकपत्नी आशिल्लो. तोच आदर्श आमी बाळगुया. ‘श्रीराम जयराम, जय जय राम’ हो मंत्र रातदीस आपल्या घरांत अखंड चालू दवरप खरेंच बरें. तशें केल्यार संकश्टां, बाधा, साडेसाती, दुश्ट पिडा आमचें रक्षण करतात. जप कानार पडटकच मन शांत जाता, तिडक, दुस्वास ना जाता. तणाव पयस पळटा. तेन्ना सदांच रामाचें नांव घेयात. ताचे आदर्श पाळात.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
