भांगरभूंय | प्रतिनिधी
भारतीय क्रिकेट नियामक मंडळाचो (बीसीसीआय) सचीव जय शाह आंतरराष्ट्रीय क्रिकेट समितीचो (आयसीसी) नवो अध्यक्ष जावये. ताची दावेदारी घटमूट आसा अशें जाणकार मानतात.
आयसीसीचो सध्याचो अध्यक्ष ग्रेग बार्कलेचो कार्यकाळ 30 नोव्हेंबराक सोंपता. आपल्याक तिसरो कार्यकाळ नाका अशें ताणें म्हणिल्लें. ते उपरांत बीसीसीआयचो सचीव जय शाह आयसीसीचो नवो अध्यक्ष जावपाक शकता अशी चर्चा सुरू जाल्या. ह्या संदर्भांत अजून मेरेन बीसीसीआय आनी जय शाहान कांयच अधिकृत विधान करूंक ना.
आयसीसीच्या अध्यक्षपदा खातीर नामांकन भरपाची निमाणी तारीख 27 ऑगस्ट आसा. आयसीसी अध्यक्षाचो कार्यकाळ दोन वर्सांचो आसता. कोणूय सेगीत तीन खेपे अध्यक्ष जावपाक शकता. न्युझिलॅण्डाच्या बार्कलेन नोव्हेंबर 2020त पयले खेपे आयसीसीचो अध्यक्ष जाल्लो. ते उपरांत 2022त तो दुसरे खेपे अध्यक्ष जाल्लो.
आयसीसीच्या नेमा प्रमाण अध्यक्षाचे वेंचणुकेंत 16 संचालक मत दितात. ताका लागून अध्यक्ष जावपा खातीर 9 मतां म्हत्वाची आसता.
बीसीसीआयचो सचीव म्हणून जय शाहाचो एक वर्साचो कार्यकाळ बाकी आसा. बीसीसीआयच्या नेमा प्रमाण कोणूय पदाधिकारी तीन वर्सांच्या कुलींग ऑफ पिरीयडा पयलीं स वर्सां मेरेन पदाचेर रावपाक शकता. कोणूय व्यक्ती वट्ट 18 वर्सां मेरेन पदाचेर रावपाक शकता. हातूंत राज्य संघटणांनी 9 वर्सां आनी बीसीसीआयंत 9 वर्सांचो आस्पाव आसा.
जर जय शाह आयसीसीचो अध्यक्ष जालो जाल्यार तो आतां मेरेनचो आयसीसीचो सगल्यांत युवा अध्यक्ष थारतलो. जगमोहन दालमिया, शरद पवार, एन श्रीनिवासन आनी शशांक मनोहर हांणी आयसीसीचें अध्यक्षपद सांबाळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
