भांगरभूंय | प्रतिनिधी
जम्मू, खबरां संस्था : जम्मू- काश्मीरांतल्या पर्यटन थळ आशिल्ल्या गुलमर्गांतल्या दोंगरा माथ्यार आशिल्लें १०९ वर्सां पोरण्या शिव देवळाक उजो लागून तें पुरायेन लासून गोबोर जालें. हांगा खुबश्या बॉलिवूड सिनेमांची शुटींग जाल्ली. राजेश खन्ना- मुमताज हांच्या ‘जय जय शिवशंकर’ ह्या गीताचें शुटींग हांगाच जाल्लें.
प्रसार माध्यमांनी दिल्ले म्हायती प्रमाण, बुधवारा (५ जून) सकाळीं हो उजो लागला. थळाव्या लोकांनी पुलिसांच्या आदारान उजो नियंत्रणांत हाडलो. मात तेन्ना मेरेन देवूळ पुरायपणान जळून गेल्लें.
शार्ट सर्किटाक लागून हो उजो लागला अशें पुरयतांनी सांगलें. पुलिसांनी केस नोंद करून चवकशी सुरू केल्या.
मुसलमानान २३ वर्सां देवूळ सांबाळ्ळें
९० च्या दसकांत काश्मीरी पंडित राज्यांतल्यान भायर सरले उपरांत बारामुल्ला जिल्ह्यांतल्या गुलाम मोहम्मद शेख हांणी २३ वर्सां हें देवूळ सांबाळ्ळें. सगळेच मोगान तांकां पंडितजी म्हणटाले. महंमद शेख हांकां देवळाचे देखरेखी खातीर धर्मार्थ ट्रस्टांतल्यान म्हयन्याक पगार मेळटालो. सुरवातेक तांकां देवळाची पळोवणी करपाी जापसालदारकी दिली. मात उपरांत ताणीं पुजा, विधी शिकून मुखेल पुरयताच्या गैरहाजेरींत पुजा लेगीत केली. गुलाम मोहम्मद २०२१ वर्सा निवृत्त जाले. पुरुषोत्तम शर्मा नोव्हेंबर २०२३ सावन ह्या देवळाचे मुखेल पुजारी म्हणून काम करतात.
खुबश्या चित्रपटांची शुटींग
ह्या देवळांत जायते चित्रपट शूट केल्यात. १९७४ वर्साच्या राजेश खन्ना- मुमताजच्या ‘आपकी कसम’ ह्या चित्रपटांतलें ‘जय जय शिवशंकर’ ह्या गीताचीय हांगा शुटींग जाली. तशेंच ‘रोटी’, ‘अंदाज’, ‘कश्मीर की कली’ ह्या चित्रपटांचेंय शुटिंग ह्या देवळांत जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
