भांगरभूंय | प्रतिनिधी
नाहरगड, खबरां संस्था: जयपूराक एके वेगान वचपी गाडयेन रस्त्याचेर धुमाकूळ घालो. सोर्याचे नशेंत आशिल्ल्या एका गिरेस्तान शारांतल्या गर्देच्या भागांत ७० किमी वेगान एसयूव्ही चलयली. हे गाडयेन ९ जाणांक चिड्डिले. हातूंत एके बायले वांगडा तिगांक मरण आयलां. जाल्यार ६ जाण गंभीर जखमी आसात. सोमारा रातीं ९.३० वरांचेर ही घडणूक घडली.
पुलिसांनी दिल्ले म्हायती प्रमाण, एमआय रोडाचेर वेगान येवपी गाडयेन वाहनांक धपको दिल्ल्याची म्हायती मेळ्ळी. उपरांत गाडी शारांत अशीर रस्त्यांत घुसली. सुमार एक किलोमीटराच्या अंतराचेर, गाडी एका अशीर रस्त्याचेर आडकली. लोकांचे मजतीन पुलिसांनी आरोपी चालकाक धरलो.
गाडी एक वर धांवताली
अतिरिक्त डीसीपी बजरंग सिंह शेखावत हांणी, आरोपी चालक उस्मान खान (६२) हाणें सुमार ५०० मीटर वाठारांत सगल्यांत चड लुकसाण केलें.
एके बायले सयत तिगांक मरण
ह्या अपघातांत शास्त्रीनगरांतले वीरेंद्र सिंग (४८), ममता कंवर (५०), नाहरगडचे मोनेश सोनी (२८) हांकां मरण आयलें जाल्यार शारदा कॉलनींत रावपी मुहम्मद जलालुद्दीन (४४) हे जखमी जाले. संतोषी माता देवूळ वाठारांत रावपी दिपिका सैनी (१७), विजय नारायण (६५), झेबुन्निसा (५०), अंशिका (२४) आनी अवधेश पारीख (३७) हांकांय जखमी अवस्थेंत हॉस्पिटलांत व्हेल्यात.
थळाव्यांच्या म्हणण्या प्रमाण, चालकान नाहरगड पुलीस स्टेशना लागसारा स्कुटरीक धपको दिलो. तीग जाण जखमी जाले. उपरांत २०० मीटर फुडें वचून एक स्कुटर आनी मोटार सायकलीक धपको दिलो. मागीर संतोषी माता देवळा लागसारा लोकांक चिड्डिले. अपघाता उपरांत लोक गाडी धरपाक फाटल्यान धांवले. लोकांची गर्दी पळोवन चालक उस्मान हाणें परत गाडी धांवडायली. पुलिसांनी ताका ताचे गाडये सयत सुमार एक किलोमीटराच्या अंतराचेर आशिल्ल्या संजय सर्कला कडेन धरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
