भांगरभूंय | प्रतिनिधी
जयपूर, खबरां संस्था ः विधानसभा वेंचणूक जाहीर जाले उपरांत राजस्थानांत राजकी वावर वाडलो. मजगतीं, भारतीय जनता पार्टीचो राज्यसभेचो वांगडी किरोडी लाल मीना हांणी एक दावो केला. जयपूरांत 100 खाजगी लॉकरांनी रु. 500 कोटींचो काळो पयसो आनी 50 कील भांगर दवरला अशें मीनान सांगलें. ताणें पुलिसांच्या हाजिरेंत लॉकर उगडपाची मागणी केल्या.
मीनान खंयचे दावे केले?
किरोडी लाल मीनान सुरवेक ते कोणाचे लॉकर आसा हे सांगपाक न्हयकार दिलो, पूण उपरांत 50 लॉकर चालू आसात आनी तातूंतले 10 कांय अधिकाऱ्यांचे अशिल्ल्याचे सांगलें. ह्या लॉकरांत आयटी (म्हायती तंत्रज्ञान) घोटाळे, जल जीवन मिशन (जेजेएम) घोटाळ्यांतल्यान तयार केल्ले काळे पयशे आशिल्ल्याचो आरोप मीना हांणी केला.
दावो केल्या उपरांत मीना हांणी जयपूरांतल्या गणपती प्लाझा हांगाच्या खाजगी कंपनीच्या कार्यालयांत लेगीत पावले. लॉकर हांगा आसात असो दावो तांणी केला. पुलीस, येणावळ कर खात्याचे आनी हेर यंत्रणेच्या अधिकाऱ्यांनी हस्तक्षेप करून लॉकर उगडपाची तांणी मागणी केली. कांय वेळा उपरांत पुलिस थंय पावले. उपरांत पत्रकारां कडेन उलयतना मीना हांणी सांगलें, लॉकर आशिल्ल्या वाठाराचो मुखेल गेट पुलिसांनी सील केला. येणावळ कर खात्याचोय पंगड थंय पावलो आनी उपरांत अंमलबजावणी संचालनालयाचोय पंगड थंय पावलो आनी ह्या प्रकरणाची चवकशी केली असो दावो तांणी केला.
काँग्रेसीचेर हल्लाबोल
भाजपा फुडारी किरोडी लाल मीनान हाचे आदीं काँग्रेसीचेर हल्लो केला. कांय दिसां आदीं पेपर लीक प्रकरणांत बाबुलाल कटाराक राजस्थान लोक सेवा आयोगाचो वांगडी म्हणून नेमणूक करपाक काँग्रेस फुडारी दिनेश खोडानिया आनी राष्ट्रीय लोकतांत्रिक पक्षाची फुडारी स्पर्धा चौधरी हांचो आस्पाव आशिल्लो आरोप तांणी केल्लो. पेपर लीक जाल्ल्या प्रकरणांत कटाराक पयलींच अटक करून अंमलबजावणी संचालनालयान चवकशी केल्या.
पेपर लीक प्रकरणाच्या फाटल्यान मुख्यमंत्री अशोक गेहलोत हांचे लागींचो दिनेश खोडनिया आशिल्लो आनी तांणीच कटाराक राजस्थान लोक सेवा आयोगाचो वांगडी म्हणून नेमणूक केल्ली अशें मीना हांणी सांगलें. पयलीं काँग्रेसी कडेन संबंदीत आशिल्ली स्पर्धा चौधरी कटारा कडेनय संबंदीत आशिल्ले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
