भांगरभूंय | प्रतिनिधी
भांगरभूंय | प्रतिनिधी
पणजी : जयपूरांत 4 ते 6 मे मजगतीं जाल्ल्या ग्रेट इंडियन ट्रॅव्हल मार्केट (जीआयटीबी) 2025 त गोंय पर्यटनान आपलो उत्साही आनी प्रभावी सहभाग येसस्वीपणान पुराय केलो. थळाव्या समुदायांक लाव दिवपी आनी राज्याचें सांस्कृतीक आनी सैमीक दायज सांबाळून दवरपी शाश्वत आनी पुनरुत्पादक पर्यटन मॉडेलांक चालना दिवपाची कटिबद्धता गोंय पर्यटनान परतून एकदां अधोरेखित केल्या.
आयएएस सचीव (पर्यटन) संजीव आहुजा हांच्या फुडारपणा खाला गोंय शिश्टमंडळांत पर्यटन संचालक केदार नायक, जीटीडीसीचे सरवेवस्थापक (मार्केटिंग) गॅविन डायस, उपसंचालक (दक्षीण) राजेश काळे आनी गोंयच्या कितल्याशाच सहप्रदर्शकांचो आस्पाव आशिल्लो, जाणीं गोंय पर्यटन गॅलरींत उद्देग भागधारक आनी संभाव्य भागीदारां वांगडा सक्रीय वांटो घेतिल्लो.
गोंय पर्यटनाच्या ह्या सहभागाविशीं उलयतना पर्यटन मंत्री रोहन खंवटे हांणी सांगलें, जीआयटीबी 2025 त गोंयचो वांटो जापसालदार, सर्वसमावेशक आनी पुनरुत्पादक पर्यटन मॉडेल कडेन आमची वचनबद्धता घटमूट करता. परंपरावादाच्या भायर वचपी अणभव आमी दाखयतात. जे अणभव थळाव्या समाजाचेर आदारीत आसात, आमचे सांस्कृतीक अस्मितायेंत रुजल्यात आनी आमच्या पर्यावरणीय जापसालदारकेची जाणविकाय आसा. जीआयटीबी सारक्यो कार्यावळी आमकां ह्या दृश्टीचें अनुकरण करपी आनी गोंयच्या विकसीत जावपी कथेचो एक वांटो जावपाक उत्सुक आशिल्ल्या भागीदारां कडेन जोडपाक मजत करतात.
पर्यटन संचालक केदार नायक हांणी सांगलें, जीआयटीबी 2025 वरवीं आमकां गोंयची विकसीत पर्यटन सेवा दाखोवपा खातीर आनी जापसालदार आनी समुदायाचेर चलपी पर्यटनाचें आमचें दृश्टीकोन सांगपी भागधारकां कडेन संवाद सादपा खातीर एक मोलादीक व्यासपीठ मेळ्ळां.
जीआयटीबी 2025 त भौशीक मळावेल्या उत्कृश्ट स्टॉलां खातीर गोंय पर्यटनाक उर्बा वाडोवपी पयलें इनाम फावो जालें. हाका लागून गोंय गॅलरीचें आकर्शक प्रदर्शन आनी कार्यावळीक खर उपस्थिती हाची दखल घेतली.
ह्या कार्यावळीचें एक उल्लेखनीय आकर्शण म्हळ्यार ओडिशाची माननीय उपमुख्यमंत्री श्रीमती प्रवेश परिडा तशेंच भारत सरकाराच्या पर्यटन मंत्रालयाची अतिरिक्त सचीव आनी महासंचालक श्री सुमन बिल्ला; आनी डॉ. फिक्कीची आदली अध्यक्ष आनी ललित सुरी हॉस्पिटॅलिटी ग्रुपाची सीएमडी ज्योत्स्ना सूरी हांणी गोवा गॅलरीक भेट दिली. तांणी गोंय शिश्टमंडळा कडेन संवाद सादलो आनी थळावे संस्कृतायेंत रुजिल्ल्या पर्यटनाक चालना दिवपा खातीर तशेंच पुनरुत्पादीत पर्यटनाक चालना दिवपा खातीर राज्यान केल्ल्या दूरदर्शी उपक्रमांची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
