भांगरभूंय | प्रतिनिधी
जयपूर, खबरां संस्था: जयपूरांतल्या सवाई मानसिंग (एसएमएस) हॉस्पिटलाच्या ट्रॉमा सेंटराच्या आयसीयूंत आयतारा रातीं उसरां उजो लागलो. हे घडणुकेंत 3 बायलां सयत 8 दुयेतींक मरण आयलें.
ट्रॉमा सेंटरांतल्या न्युरो आयसीयू वॉर्डच्या स्टोअररूमांत रातच्या 11.20 वरांचेर उजो लागलो. जंय कागद, आयसीयू उपकरणां आनी आनी रक्ताचे सॅम्पलर ट्यूब साठयताले.
ट्रॉमा सेंटरांतले नोडल अधिकारी आनी वरिश्ठ दोतोरांनी सांगलें, उजो शॉर्ट सर्किटाक लागून लागिल्ल्याचो दुबाव आसा. अपघाताच्या वेळार आयसीयूंत 11 दुयेंती आशिल्ले आनी शेजारच्या आयसीयूंत 13 दुयेंती आशिल्ले.
उजो पालोवपी दळाचे कर्मचारी अवधेश पांडे हांणी सांगलें, अलार्म वाजतांच पंगड घडणुके सुवातेर पावलें. पुराय वॉर्ड धुंवरान भरिल्लो. भितर वचपाक मार्गूच नाशिल्लो. म्हणून हॉस्पिटलाच्या दुसरे वटेनच्या जनेलांचे हारशे काडून उदक मारलें. उजो नियंत्रणांत हाडपा खातीर एक ते देड वर लागलें. सगल्या दुयेतींक भायर हालयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
