भांगरभूंय | प्रतिनिधी
खबरां संस्था
जयपूरः सवाई मानसिंग स्टेडियमाचेर जाल्ले आयपीएलाच्या 60वे मॅचींत राजस्थान रॉयल्साचो 10.3 ओव्हरींत 59 धांवड्यांत खुर्दो करून रॉयल चॅलेंजर्स बंगळुरून (आरसीबी) 112 धांवड्यांनी रॉयल जैत मेळयलें. आयपीएलांतल्या इतिहासांतली ही तिसरी सगल्यांत कमी धांवस्ख्या थारली 2009 वर्सा राजस्थान रॉयल्साक बंगळुरून 58 धांवड्यांत आवट केल्लें. 2017 वर्सा बंगळुरू पंगड कोलकाता नायट रायर्डसा आड खेळटना 49 धांवड्यांत ऑलआवट जाल्लो
आरसीबीच्या ह्या व्हड जैताक लागून गुणक्रमवारींत आतां व्हडलो बदल जाला. हे मॅची पयलीं 10 गुणांनी आरसीबी सातवे सुवातेर आशिल्लो आनी 12 गुणांनी राजस्थान पांचवे सुवातेर आशिल्लो. आयतारच्या जैतान आरसीबीक दोन गुण मेळून ते आतां पांचवे सुवातेर पावले आनी राजस्थान सवे सुवातेर पावला.
आरसीबीन टॉस जिखून पयलीं खेळपाचो निर्णय घेतलो. ग्लेन मॅक्सवेल, फाफ डुप्लेसिसान आक्रमक बॅटिंग करून अर्द शेंकडे केले आनी त्या नेटार तांणी राजस्थान रॉयल्साक जैता खातीर 172 धांवड्याचें आव्हान दिलें. मात ताचो फाटलाव करतना राजस्थानाचे सगले खेळगडे 59 धांवड्यांत आवट जाले आनी आरसीबीक दणदणीज जैत फावो जालें.
आरसीबीचो फास्ट बॉलर मोहम्मद सिराजान पयलेच ओव्हरींत राजस्थानाचो फॉर्मांत आशिल्लो ओपनर यसस्वी जयस्वालाक शून्याचेर आवट केलें. ते उपरांत पार्नेलाचे बॉलिंगेचर दुसरो ओपनर जॉस बटल लेगीत शून्याचेर कॅच आवट जालो. कॅप्टन संजू सॅमसनान आक्रमक खेळ करपाचो यत्न केलो. मात पार्नेलान 4 धांवड्यांचेर ताका कॅच आवट करून राजस्थानाची 3 बाद 7 अशी अवस्था केली. ज्यो रूटाक (10) पार्नेलान एलबीडब्ल्यू केलें. आरसीबीचें जैत हांगाच निश्चीत जालें. शिमरन हेटमायरान 19 बॉलांत 35 धांवड्यो केल्यो. ताची विकेट मॅक्सवेलान घेतली. ह्या उपरांत झुरेल, आश्विन, झॅम्पा, संदीप शर्मा आनी असिफ सवाय भिरत बाद जाले. 59 धांवड्यांत राजस्थानाचो डाव सोपलो. पार्नेलान 3 विकेटी घेतल्यो जाल्यार ब्रेसवेल आनीक कर्ण शर्मान देरकी दोन विकेटी घेतल्यो.
आरसीबीच्यो 171 धांवड्यो
विराट कोहली आनी फाफ डुप्लेसिसान सादूरपणान खेळून आरसीबीक बरी सुरवात करून दिली. मात विराट कोहली बाद जाल्या उपरांत कॅप्टन डुप्लेसिस आनी ग्लेन मॅक्सवेलान खेळाची सूत्रां आपल्या हातांत घेतलीं. तांणी अर्द शेंकड्यांची खेळी केली. डुप्लेसिसान 44 बॉलांत 3 चौके आनी 2 सक्यांनी 55 धांवड्यो केल्यो. मॅक्सवेलान 35 बॉलांत 5 चौके आनी 3 सक्यांनी 54 धांवड्यो केल्यो. अनुज रावतान आक्रमक बॅटिंग करतना 11 बॉलांत 29 धांवड्यांची नाबाद खेळी केली. ब्रेसवेल 9 धांवड्याचेर नाबार उरलो. ताका लागून आरसीबीन 20 ओव्हरींत 5 आवट 171 धांवांची मजल मारली. असिफाचे बॉलिंगेचर विराट कोहली 18 धांवड्यांचेर कॅच आवट जालो. ह्या जैतान आरसीबीचें ह्या आयपीएलांतलें आव्हान कायम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
