भांगरभूंय | प्रतिनिधी
लोकसभा वेंचणुके उपरांत दोन अडेज म्हयन्यांचो काळ सोंपलो तरी केंद्रांत सेगीत तिसरे फावटी सत्तेर आयिल्ली भाजपप्रणीत राष्ट्रीय लोकशाय आघाडी आनी विरोधी इंडी आघाडी हांचें मदलो राजकी संघर्श उणो जावपाची कसलींच लक्षणां दिसनात. काँग्रेस आनी समाजवादी पक्ष जाल्यार अजून लेगीत वेंचणुकेच्या मुडांतल्यान भायर सरिल्ले दिसून येनात. ताका लागून हो राजकी संघर्श सोंपून सोंपत अशी आस्त बाळगप चुकीचें थारतलें. कारण आतां जम्मू काश्मीर संघप्रदेश आनी हरयाणा राज्य विधानसभा वेंचणुकांच्यो तारखो लेगीत वेंचणूक आयोगान जाहीर केल्यात. दिवाळीचे आदीं दोनूय कडेन नवीं सरकारां सत्तेर येतलीं. उपरांत महाराष्ट्र, झारखंड ह्या राज्यांनी वेंचणुकेचें वारें घुंवपाक लागतलें असो अदमास आसा. अशे परिस्थितींत भारतीय जनता पार्टी आनी काँग्रेस हांचे मदीं चालू आशिल्लो राजकी संघर्श उणो जावपाची आस्त बाळगुवप धाडसाचें थारतलें. हाचें उरफाटें ह्या संघर्शाक चडूच धार येवंक शकतली अशेच संकेत सद्याचें राजकी वातावरण पळयत जाल्यार दिसून येता. जम्मू काश्मीरांत सुमार धा वर्सां उपरांत वेंचणूक जाता. लोकसभा वेंचणुके उपरांत चड करून जम्मूंत आतंकवाद्यांचो जो कितें खवदळ चल्ला तो पळयत जाल्यार अशे परिस्थितींत थंय शांततायपूर्ण मतदान घेवपाचें कठीण आव्हान वेंचणूक आयोग आनी पर्यायान केंद्रांतल्या सरकारा मुखार उबें रावलां.
जम्मू काश्मीरांत वट्ट चार टप्प्यांत मतदान घेवपा फाटलंें अर्थांतच थंयची एकूण परिस्थितीच कारण थारल्या. केंद्रांतल्या सरकाराक हें आव्हान स्विकारून थंय शांततायपूर्ण मतदान कशें जातलें हाचे कडेन लक्ष केंद्रीत करचें पडटलें. जम्मू काश्मीरांतली विधानसभा वेंचणूक घडये अजून लेगीत मुखार वचपाची. पूण सर्वोच्च न्यायालयाच्या आदेशाक लागून वेंचणूक जाहीर करची पडली. आतां केंद्रांतल्या भारतीय जनता पक्षाच्या सरकाराक जम्मू काश्मीरांत पयलीं भशेन परिस्थिती उरिल्ली ना. हें सिद्ध करपा खातीर वेंचणूक काळांत हो प्रदेश शांत उरतलो हाची दक्षताय घेवची पडटली. नाजाल्यार ताचेंच भांडवल करून विरोधक भाजपाक अडचणींत हाडूंक शकतले आनी ताचो प्रतिकूल परिणाम हाचे मुखार जावपी वेंचणुकांनी जावंक शकतलो. जम्मू काश्मीर पयलींचे तुळेन खूब शांत आसा हातूंत वाद नासचो. विरोधकांक हो दावो मान्य नासतलोच, पूण ह्या प्रदेशान पर्यटनाच्या मळार फाटल्या पांच-स वर्सांत जी झोंपय मारल्या ती म्हत्वाची आसा. पांच वर्सां आदीं काश्मीराक लागू आशिल्लें 370 कलम कुशीक काडले उपरांत जम्मू काश्मीर राज्याचें विभाजन करून जम्मू काश्मीर आनी लडाख अशे दोन वेगळेवेगळे प्रदेश केले उपरांत पयलेच फावटी वेंचणूक जायत आशिल्ल्यान भाजप, काँग्रेस आनी फारूक अब्दुल्लाच्या नॅशनल कॉन्फरन्सा मुखारूय वेगळेंच आनी कठीण आव्हान उबें रावलां. भाजपान जाल्यार जम्मू काश्मीरांत स्वबळार वेंचणूक लढोवपाचो निर्णय जाहीर करून काँग्रेस आनी हेर पक्षांक आव्हान दिलां.
जम्मू काश्मीरांत शांतताय प्रस्थापीत करपाक येस आयिल्ल्याचो दावो केंद्रांतलें सरकार करता, आनी ताका तसो आदारूय आसा. 370 कलम रद्द केले उपरांत थंयचे मतदार, केंद्रान पांच वर्सां आदीं घेतिल्ल्या निर्णयाक तेंको दितले काय ना हें वेंचणूक निकालांत स्पश्ट जातलें. धा वर्सां आदीं भाजपान मुफ्ती मोहमद सईद हांकां मदींच बोट दाखोवन जाळ्यांत ओडून घेतलें आनी तातूंतल्यानूच 370 कलम कुशीक काडपाचो मार्ग सोंपो जालो. पिपल्स डेमोक्रेटीक पार्टी कडेन पयलीं युती करून सरकारांत प्रवेश केलो आनी आपलें उद्दिश्ट साद्य करपा खातीर कांय निर्णय घेवन मुफ्ती मोहमद हांकां बेतेकाब केलें. सरकाराचो तेंको काडून घेतना फुडलो मार्ग निश्चीत जाल्लो. जावपाचें तेंच जालें आनी 370 कलम कुशीक काडपाचो निर्णय घेवन मोदी सरकारान असो धक्को दिलो आनी जे अशक्य दिसतालें तें घडलें. काश्मीरांत रगताच्यो न्हंयो व्हांवूंक लागतल्यो अशी शिटकावणी दिवप्यांक हालचाल करप लेगीत कठीण जाल्लें. ह्या निर्णयाचें देशांत सगली कडेन येवकारूच मेळ्ळो. पूण काश्मीरी लोकांक ह्या निर्णयाचेर म्होर मारपाची संद आतां वेंचणुकेक लागून पयलेच फावटी मेळटा. फाटल्या पांच वर्सांत जम्मू काश्मीरांत शांतताय प्रस्थापीत करपा खातीर केंद्रांतल्या भाजप सरकारान जें कितें करूं येतले तें सगलें कितें केलें आनी आतां तांकां काश्मीरी लोकां कडल्यान तेंक्याची अपेक्षा आसा. फाटलीं पांच वर्सां जम्मू काश्मीरांत राष्ट्रपती राजवट जारी आसा. मतदारांक आतां धा वर्सां उपरांत आपलें स्वताचें अशें आवडीचें सरकार वेंचून काडपाची संद मेळ्ळ्या.
जम्मू काश्मीरांतली वेंचणूक जिखत जाल्यार भाजपाचो फुडल्या वेंचणुकांचो मार्ग खूबसो सोंपो जावपाचो आसलो तरी काश्मीर जिखप भाजपा खातीर तितलें सोंपें वच्चें ना. इंडी आघाडीतल्या घटक पक्षांचो पवित्रो कसो उरतलो हाचेरूय खूबश्यो गजाली निंबून आसतल्यो. काँग्रेस, नॅशनल कॉन्फरन्स, पिपल्स डेमोक्रेटीक पार्टी ह्या थंयच्या तीन मूळ राजकी पक्षां कडेन भाजपाक सामकार वच्चें पडटलें. फाटल्या स सात वर्सांत ते तुळेन भारतीय जनता पक्षान थंय बरें पैकीं मूळ धरिल्ल्याचें सांगतात, पूण लोकसभेचे वेंचणुकेंत अपेक्षीत येस भाजपाक मेळ्ळें ना ही वस्तुस्थिती आसा. लोकसभा वेंचणुकेंत जाल्ल्या मतदानाचो अभ्यास केल्यार नॅशनल कॉन्फरन्साक वातावरण अनुकूल आशिल्ल्याचें चित्र दिसता. भाजपान णव्वद पैकी 30-32 मतदारसंघांत आघाडी घेतिल्ल्याचें आंकडेवारी सांगता. जाल्यार फारूक अब्दुल्लाच्या पक्षाक सुमार अर्द्या मतदारसंघांनी आघाडी मेळिल्ल्याचें दिसून येता. आतां भाजपाक विरोधी मतां विभागून गेल्यार ताचो लाव मेळूंक शकतलो आनी वट्ट चित्र फुडल्या कांय दिसांत अदिकूच स्पश्ट जावंक शकतलें. हिंदुबहूल जम्मू प्रदेशाक सद्या पाकिस्तानी आतंकवाद्यांनी आपले लक्ष्य केल्ल्याचें फाटल्या दोन म्हयन्यांत जाल्ल्या आतंकवादी कारवायां कडेन पळयत जाल्यार दिसून येता.
भाजपा खातीर जम्मूंत व्हड आघाडी घेवपाची संद आसा, पूण ते खातीर थंय जावपी आतंकवादी कारवायो आडावप म्हत्वाचें आसा. मुस्लीमबहूल काश्मीरांत भाजपाची दाळ आयचे परिस्थितींत कितली शिजतली हाचो दुबावूच आसा. जम्मू काश्मीराक राज्याचो दर्जो कळाव करिनासतना दितले हाचीय गवाय भाजपाक दिवची पडटली. जम्मू काश्मीरांत शांततायेचें नवें पर्व सुरू जावप म्हत्वाचें आसा. विधानसभा वेंचणूक निकालाचेर तें सगलें निंबून आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
