भांगरभूंय | प्रतिनिधी
नवी दिल्ली, खबरां संस्था ः जम्मू- काश्मीरांत फाटल्या 35 वर्सांतले सगळ्यांत चड मतदान जालां आनी 2019 वर्साच्या तुळेंत काश्मीर देगणांत 30 टक्के चड मतदान जालां. वेंचणुकेची उमेद पळोवन जम्मू- काश्मीरांत बेगीनूच विधानसभा वेंचणूक घेवपाचो संकेत वेंचणूक आयोगान दिला.
मुख्य वेंचणूक आयुक्त राजीव कुमार हांणी ल जम्मू-काश्मीर वेंचणुके संबंदी प्रसार माध्यमां कडेन संवाद सादलो. लोकसभेचे वेंचणुकेंत व्हड प्रमाणांत मतदान जालें. येवपी विधानसभा वेंचणुके खातीर हो सक्रीय वांटो खूब सकारात्मक आसा, जाका लागून ह्या केंद्रशासित प्रदेशात लोकशाय प्रक्रिया चालू उरतली अशें तांणी सांगलें.
जम्मू-काश्मीरांत पांच लोकसभा मतदारसंघ आसात. ह्या मतदान केंद्रांचेर वट्ट 58.46 टक्के मतदान जाल्ल्याचे वेंचणूक आयोगान सांगलां. श्रीनगर, बारामूल्ला आनी अनंतनाग- राजौरी हांगा अनुक्रमान 38.49 टक्के, 59.10 टक्के आनी 54.84 टक्के मतदान जाला जे फाटल्या तीन दशकांतले सगळ्यांत चड आसा.
तरणाट्यांचो वांटो सकारात्मक
काश्मीर देगणांतल्या चड तरणाट्यांनी विश्वास दाखोवन लोकशायेक व्हड प्रमाणांत आपणायला. 18-59 वर्सां पिरायेच्या गटांतल्या मतदारांचें प्रमाण चड आशिल्ल्याचें दिसून आयलें. काश्मीरांत मतदानाची टक्केवारी चड आशिल्ल्यान लोकशायेचेर तांचो आशिल्लो विस्वास जी एक सकारात्मक आनी समाधानकारक गजाल आसा अशें वेंचणूक आयोगान सांगलां. जम्मू- काश्मीरांत 18- 59 वर्सां पिरायेच्या गटांतल्या 80 टक्के मतदारांनी मतदान केल्ल्याची म्हायती आयोगान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
