भांगरभूंय | प्रतिनिधी
एका आतंकवाद्याक मरण; तीन जवान जखमी
डोडो, खबरां संस्था: तीन दीस आदीं जम्मू-काश्मीरांत रियासी जिल्ह्यांत आतंकवाद्यांनी भाविकांचे बशीचेर हल्लो केल्लो. हाचे उपरांत बस चालकाचें बशी वयल्यान नियंत्रण गेलें आनी बस वचून एका खोल देगणांत पडली. हे घडणुकेंत १० जाणांक मरण आयलें, जाल्यार ३३ जाण जखमी जाले. ही घडणूक ताजी आसतना आतंकवाद्यांनी आनी एके सुवातेर हल्लो केला अशी म्हायती उजवाडाक आयल्या.
जम्मू-काश्मीरांतल्या डोडा जिल्ह्यांतल्या लश्कराच्या तात्पुरत्या संचालन तळाचेर (टीओबी) आतंकवाद्यांनी फारपेट केली. ह्या आतंकवाद्यांच्या अचकीत केल्ल्या हल्ल्याक भारतीय सैन्यानूय खर प्रतिसाद दिलो. ह्या फारपेटाक भारतीय सैन्यान दिल्ले जापेंत एका आतंकवाद्याक मरण आयलें. आतंकवाद्यांनी केल्ल्या हल्ल्यांत एक मनीस जखमी जालो, हे विशींची म्हायती जम्मू-काश्मीर पुलिसांनी रातीं उसरां दिली.
फाटले तीन दीस तीन सुवातींनी आतंकवादी हल्ल्यांच्यो घडणुको उजवाडाक आयिल्ल्यान जम्मू-काश्मीराचे शिमेर सुरक्षा खर केल्या. तशेंच पुलिसांक सादूर रावपाची सुचोवणी दिल्या. हाचे वांगडाच शिमेर, म्हामार्गांचेर आनी पंजाब आनी हिमाचलच्या आंतरराश्ट्रीय शिमेचेर खाशेली नदर दवरल्या.
जम्मू-काश्मीरांतल्या डोडा जिल्ह्यांतल्या लश्करी तात्पुरत्या संचालन तळाचेर आतंकवाद्यांनी फारपेट केलो. हातूंत ३ जवान जखमी जाले अशें म्हण्टात. जाल्यार आजूनय डोडा हांगा फारपेट सुरू आसा. कांय सुवातांचे दहशतवादी लिपिल्ल्याचो दुबाव आशिल्ल्यान हे फाटभूंयेर सध्या सोद घेवप सुरू आसा.
मजगतीं, जम्मू-काश्मीरांतल्या हिंदू भक्तांचे बशीचेर जाल्ल्या हल्ल्याची जापसालदारकी आतंकवादी संघटणेन रेझिस्टन्स फ्रंटान घेतल्या. आपल्या संदेशांत पर्यटक आनी बिगर थळाव्या लोकांक अशा हल्ल्यां विशीं शिटकावणी दिल्या. टीआरएफ ही आतंकवादी संघटना म्हूण भारत सरकारान २०२३ वर्सा जाहीर केल्या. काश्मीरांतल्यान कलम ३७० रद्द जाले उपरांत जाल्ल्या जायत्या आतंकवादी हल्ल्यांत ही संघटना वांटो घेता. हे घडणुके उपरांत वाठारांत सुरक्षा बळकट केल्या. आतंकवाद्यांक सोदपा खातीर व्हड प्रमाणांत सोद कारवाय सुरू केल्ल्याचीय म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
