भांगरभूंय | प्रतिनिधी
पणजी : जमीन हडप घोटाळ्यांतलो मास्टरमायंड वेवसायीक रोहन हरमलकार होच आशिल्ल्यान ताचे कडल्यान कोट्यांनी रुपयांची मालमत्ता सांपडल्या. १०० परस चड बनावट मालमत्तेचीं कागदपत्रां, विक्री पत्रां, समन्वयक करार आनी हे दस्तावेज ताचे कडल्यान जप्त केल्यात. ताका अटक केले उपरांत ईडीन आतां मेरेन ४६ जाणांक समन्स जारी करून २१ जाणांची जबानी नोंद केल्या. तशेंच तो साक्षीदारांचेर चेंपण हाडटा अशी म्हायती दीत हरमलकार हाचो जामीन भायर मारपाची मागणी ईडीन म्हापशेंच्या विशेश न्यालयांत केल्या.
जमीन हडप प्रकरणांत म्हापशें पुलिसांनी हरमलकारा आड दोन गुन्यांव दाखल केल्ले. दोनांय गुन्यांवांचो तपास एसआयटीन केला. मनी लॉन्ड्रिंगचो दुबाव आशिल्ल्यान ईडीन कारवाय सुरु केली. ईडीन २४ एप्रील २०२४ दिसा हरमलकार हांच्या पिळर्ण, पर्वरी, दिवाडी आनी हेर सुवातांच्या मालमत्तांचेर छापो घालून १ हजार कोटीं परस चड बाजार दर आशिल्ल्या हणजूण, हडफडें, आसगांव आनी हेर सुवातांवेल्या जमिनींची बनावट कागदपत्रां, तशेंच ६०० कोटीं परस चड मोलाच्या मालमत्तांची अस्सल कागदपत्रां जप्त केल्लीं.
ईडीन ३० एप्रील २०२५, ५ मे २०२५, १३ मे २०२५, २० मे २०२५ आनी २३ मे २०२५ दिसा समन्स काडून रोहनाक चोवकशे खातीर हाजीर रावपाक सांगिल्लें. ३ जून २०२५ दिसा रोहन चोवकशे खातीर हजर रावलो. मात चवकशेच सहकार्य करिनाशिल्ल्यान ताका ईडीन अटक केल्ली. उपरांत ताका न्यायालयान पयले १४ दीस ईडीची बंदखण दिल्ली. ती सोंपले उपरांत न्यायालयान बंदखण दिल्ली.
हाचे मजगतीं रोहन हरमलकार हांणी न्यायालयांत जामीन अर्ज दाखल केलो. सुनावणी जाली तेन्ना, ईडीन पुरवणी म्हणणें सादर केलें. ते प्रमाण, ईडीचे विशेश वकील सिद्धार्थ सामंत हांणी आपली बाजू मांडून युक्तीवाद केलो, हरमलकार जमीन हडप प्रकरणांतलो मास्टरमायंड. ताच्या घराचेर छापो घालून कोट्यांनी रुपयांची १०० परस चड बनावट मालमत्तेचीं कागदपत्रां, १९ समन्वयक करार तशेंच विक्री पत्र, १५ मुखत्यार पत्र, २९ मालमत्ता दान पत्र (गिफ्ट डीड)जप्त केले. तशेंच दुबावीत हरमलकार हांणी बनावट मालमत्ता विक्री वेव्हारांत म्हत्वाची भुमिका केल्या, अशें तांणी सांगलें.
मजगती, रोहनान एकल्यान हें केलां काय ताचे फाटल्यान आनीक कोण पेजाद मनीस आसा, ताचो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
