भांगरभूंय | प्रतिनिधी
पणजीः अंमलबजावणी संचालनालयान 22 सप्टेंबराक गोंयांतल्या जमीन हडप घोटाळ्याचो मास्टरमायंड मोहम्मद सुहेल उर्फ मायकल हाका अटक केल्या. कोठडेंत आशिल्ल्या सुहेलाक मेरशेच्या खाशेल्या न्यायालयान 10 दिसां खातीर ईडी कोठडेंत दवरपाचो आदेश दिला.
ह्या प्रकरणांत खोर्ली (बार्देस) च्या जेनिफर कारास्को आनी सिसिनो कारास्को हांणी गोंय पुलिसांच्या खाशेल्या तपास पंगडा कडेन (एसआयटी) कागाळ केल्ली. ते प्रमाण तांणी आपल्या पूर्वजांचें बनावट मरण पत्र नोंद केल्लें आनी हणजूणच्या सर्वेक्षण क्रमांक 504/10 मदलो प्लॉट मेल्विन लोबो आनी हेरांनी हडपला असो दावो केल्लो. हे खातीर लोबोन आपूण संबंदीत व्यक्तीचो कायदेशीर वारसदार असो दावो केल्लो आनी म्हापशेंच्या नागरी आनी उपनिबंधक कार्यालयांत आके-मडगांवच्या सलीम शेखाच्या नांवान विक्री पत्र नोंद केल्ले. हाची दखल घेवन एसआयटीन दुबावीत मेल्वीन लोबो आनी सलीम शेख आनी हेरां आड गुन्यांव नोंद करून चवकशी सुरू केली. एसआयटीच्या चवकशेंतल्यान संबंदीत प्लॉट मास्टरमायंड दुबावीत मोहम्मद सुहेल हांची घरकान्न अंजुम शेख हांच्या नांवान नोंद जाल्ल्याचें स्पश्ट जाले उपरांत एसआयटीन तिका अटक करून कारवाय केली. ह्या प्रकरणाची तशेंच हेर जमीन हडप प्रकरणांची चवकशी करपी मास्टरमायंड आशिल्ल्यान अंमलबजावणी संचालनालयान 22 तारखेक मोहम्मद सुहेलाक अटक केल्ली. उपरांत न्यायालयांत हाजीर जातकच न्यायालयान ताका चार दीस ईडी कोटडेंत दवरलो.
मजगतीं, ही केस सोंपतकच शुक्रारा परतून ताका न्यायालयांत हाडलो आनी न्यायालयान ताका 10 दीस ईडी कोठडेंत दरपाचो अादेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
