जमीन रुपांतरणाचीं उरल्यांत खूब प्रकरणां

भांगरभूंय | प्रतिनिधी

मंत्री आलेक्स सिक्वेराः खूब जाणांचे अर्ज, पूण फाटपुरवण मात ना

भांगरभूंय । प्रतिनिधी

मडगांवः जमीन रुपांतरणाचीं खूबशीं प्रकरणां पडून आसात. अर्ज केले उपरांत लोक फाटपुरवण करपा खातीर येनात. खूब जाणांनी जमीन रुपांतरणां खातीर अर्ज दाखल केल्यात, पूण परांत फाटपुरवण करपाची सोडून दिल्या. अर्जाचें कितें जालां, तें पळोवपाक लेगीत ते परतून येनात. लोकांक गरज ना जाल्यार अर्ज दवरून कितें करपाचें? थारावीक काळा मेरेन ते आयले ना जाल्यार तांचे अर्ज तांकां परतून धाडून दितले. ताका लागून रुपांतरणां खातीर उरिल्ल्या अर्जांची संख्या उणी जातली, अशी म्हायती मंत्री आलेक्स सिक्वेरा हांणी दिली.

मंत्री आलेक्स सिक्वेरा हांणी शुक्रारा दक्षीण गोंय जिल्होधिकारी कार्यालयांत सकाळीं दक्षीण गोंयांतल्या लोकां कडेन संवाद सादलो. मंत्री सिक्वेरा हांणी सांगलें, घरांचें बांदकाम नियमीत करपा संबंदांतल्यो समस्या घेवन कांय लोक आयिल्ले. तांच्यो समस्या सोडोवचे खातीर फुडल्या बुधवारा पळोवणी करपाच्यो सुचोवण्यो केल्यात. घरां नियमीत करपाची प्रक्रिया चालू आसा.

उदका संबंदांत तशेंच जिल्होधिकारी कार्यालयांतलें कांय देखभाल दुरुस्तीचें काम करपाचें उरलां. ताचें अदमासपत्रक तयार केलां. मुख्यमंत्र्यां कडेन चर्चा क रतले आनी तातूंतल्यो आडखळी पयस करतले. कांय तियात्रिस्टांनी आवाज प्रदुशणा संबंदांतल्या प्रमाणपत्रा खातीर घेतात त्या शुल्काचे वाडीचो विशय मांडलो. ताचेर उपाय येवजण करतले. उतोड्डेंच्या लोकांनी परतून रेल्वेच्या जमनींतल्यान वचपी मार्गा संबंदांत चर्चा केली. तोवूय प्रस्न रोखडोच सोडयतले, अशें मंत्री सिक्वेरा हांणी सांगलें.

नावेलींतल्या कांय लोकांनी घाणयाऱ्या उदकाचो प्रस्न मांडिल्लो. घाणयारें उदक कॉर्पोरेशनाचे वेवस्थापकीय संचालक लेगीत ह्या वेळार हाजीर आशिल्ले. घाणयारें उदक नावेलीच्या शेतांतल्यान वचून साळ न्हंयेक मेळटा. घाणयारें उदक व्हाळांतल्यान व्हावता, ताका लागून व्हाळांतल्या उदकाक घाणी मारतात. तशेंच शेतजमनी सयत साळ न्हंयेचेंय उदक लेगीत प्रदुशीत जाता, अशी खंत लोकांनी उक्तायली.

घाणयारें उदक खात्याच्या अधिकाऱ्यांनी हो प्रस्न 28 फेब्रुवारी मेरेन सोडोवपाची हमी दिली. खूबश्या घरांक अजून लेगीत घाणयाऱ्या उदकाचचे पायपलायनीचें कनेक्शन दिवंक ना. तांकां फुडल्या कांय दिसांनी नव्या घाणयाऱ्या उदकाचे पायपलायनीचें कनेक्शन दितले आनी हो प्रस्न सोडयतले, अशें तांणी सांगलें.

तशेंच सां जुझे दी आरियलांतल्या रामनगरी कॉलनींतल्या घाणयाऱ्या उदकाचो प्रस्न कायम आसा. ताचेरूय ह्या वेळार चर्चा केली. रामनगरी कॉलनींतल्लया घरांक लेगीत घाणयाऱ्या उदकाचे पायपलायनीचें कनेक्शन दिवंक ना. पायपलायन घातिल्ली, पूण पंपस्टेशन बांदूंक नाशिल्लें. आतां पंपस्टेशन लेगीत बांदून पुराय जालां, पूण वीज कनेक्शन आनी हेर कामां खातीर घाणयाऱ्या उदकाचे पायपलायनीचें कनेक्शन दिवपाचें काम अडलां. मंत्र्यान सुचोवण्यो केल्यात. पंपस्टेशनाक वीज कनेक्शन दिले उपरांत फुडल्या म्हयन्याभरांत रामनगरी कॉलनींतल्या घरांक घाणयाऱ्या उदकाचे पायपलायनीचें कनेक्शन दितले, अशें मंत्री सिक्वेरा हांणी स्पश्ट केलें.