जमीन रुंपातरणाचे भानगडींक काँग्रेस काळात सुरवातः आम आदमी पक्ष

भांगरभूंय | प्रतिनिधी

आघाडी पक्ष काँग्रेसीचेर फार पेटयत वेन्झी व्हिएगसान केली इंडी आघाडीची कातर भाजी

पणजी, प्रतिनिधी: गोंयात चल्लील्या जमीन रुपांतरण घोळांक आम आदमी पक्षान एक नवे मौडण दिलां. ह्या सगळ्या घोळाक आदलो सत्ताधारी पक्ष काँग्रेसच जापासलादार आसा आनी आतां ताचो लाव सध्याचे सरकार घेता असो सणसणीत आरोप आम आदमी पक्षाचे आमदार वेन्झी व्हिएगस हांणी केला. आमी काँग्रेसी बरोबर आघाडीत आसात हे खरे पुण तुमी केल्ली पातकां आमची न्ही. काँग्रेसींक आमचे वांगडा युती तोडपांक मेकळीक आसा, असो आरोप वेन्झी हांणी केलो.
आम आदमी पक्षांन बेरेस्तारा दनपारा नगर नियोजन खात्याच्या मुखेल नगर नियोजक राजेश नायक हांकां निवेदन भेटयलें. जमीन रुपांतर कलम 17 (2) आनी 39 (अ) रद्द करचें आनी नवो प्रादेशिक आराखडो चालीक लावपाची मागणी ह्या वेळार शिष्टमंडळान केली. निवेदन भेटयले उपरांत वेन्झी हांणी पत्रकारां कडे उलयताना जमीन रुपांतर विशया वेल्यान आपल्याच आघाडी पक्ष काँग्रेसीचेर फोग काडलो आनी गोंयांत इंडी आघाडीची कातरभाजी करून सोडली.
10-15 वर्सा पयलींचे सरकार पळवाटो सोदून शेतां आनी दोंगर काबार करतालें. आताचो सरकार ह्यो पळवाटो कायद्यांत सुदारीत करून गोंयचो सत्यनाश करपांक मुखार सरला. रेईशमागूश सारिकिल्ले विशयांचे दोक्युमेंत आमी काडून पळयले जाल्यार हे विशींची प्रक्रीया 2010-11 सावन सुरू जाल्ली आनी आतां दोंगर कातरपाक सुरवात जाल्या, असो दावो वेन्झी हांणी केलो.
2010 पयलीं सगळीं दोक्युमेंत तयार करपाची प्रकीया जशे की राजपत्र अधिसुचोवणी, जमीन रुंपांतरण, भाटां विकून ताचे दोक्युमेत तयार करप हे सारिकिल्ल्यो गजाली पुराय जाल्यो. आता ह्या सरकारान तांची अंमलबजावणी करून दोंगर तासपाक आनी शेतां पुरपाक सुरू केलीं, असो आरोप वेन्झी हांणी केलो.
2007 ते 2011 वर्सा मजगतीं काँग्रेस सरकार आसलो हातुंत लिपोवपा सारकें कांय ना. काँग्रेसीन हीं पातकां केल्यांत आनी आमची तांचे वांगडा युती आसा ही गजाल हांव मान्य करतां. पुण युती आसा म्हण हाचो अर्थ असो न्ही की तांणी केल्ल्या पातकांत आमी वांटेकार आसात. पयलीं केल्ल्या पातकांक काँग्रेसीन आतां भोगसणें मागल्यार ते कुसार जाय. जर काँग्रेसींक दिसता आमचे वांगडा युती तोडची तर तांणी ती तोडची, अशी शिटकांवणी वेन्झी हांणी दिली.