भांगरभूंय | प्रतिनिधी
सदचे भशेन नुस्तें घेवंक गेलों. घरा लागसारूच नुस्त्याचें दुकान जाल्ल्याक आतां बाजारांत वचचें पडना. वजन करून बरें उजरावन बी नुस्तें मेळटा देखून हांगा गर्दी आसताच. बरो हांसर्या तोंडाचो हसन सगळ्यांक आपलेशे करता. हांसर्या तोंडाचो मनीस आसतकूच आनीक कितें जाय? हसन कांय वर्सां पयलीं दुबय गेल्लो. बरो जोडटलों आनी गांठीक जोड करून परतो येतलो म्हणून तो इतलो पयस गेल्लो. पूण जें चितता तें सदांच मेळटा अशें ना. तो दुबय पावलो आनी कांय दिसांनीच कोरोनाची म्हामारी आयली. सगळ्यांच्यो नोकर्यो गेल्यो आनी रिकाम्या हातांनीच सगळ्यांक गांव घरा परतुचें पडलें. चड जोडटलो म्हणून हातांत आशिल्लें ब्रोकराक दिवन तो दुबय गेल्लो. पूण ‘बाप्पाय ना आनी पुडवेंय ना’ अशी ताची गत जाल्ली. तो एकलोच न्हय तर ताचे वरीच आनीक जायते जाण कोरोनाक लागून त्रासांत पडिल्ले.
गोंया पावलो खरो पूण आतां कितें? काम खंय मेळटलें? परतो दुबय वचपाचें धाडस नासलें. आनी वतलो तरी कसो, वचूंक पयशे नाकात? ताचो एक इश्ट नुस्तें विकपाचो धंदो करतालो. बाकीचे इश्ट गल्फाक गेले तरी तो हांगाच रावन काम करतालो. ताच्या सांगण्या वेल्यान हसनानूय नुस्त्या धंद्यांत पावल घालें. पयलीं रस्त्यार बसून तो नुस्तें विकतालो. इल्लो जम बसलासो दिसलें आनी ताणें थोडें रीण घेवन एक दुकान घालें. सगळें बरे तरेन चलतालें. अकस्मात आज ताका कळिल्लें ताणें दुकान घालां ती जमीन सरकारी. सरकार थंय कसलो तरी प्रोजेक्ट घालूंक पळेता देखून ताका दुकान काडचें पडटलें. ताणे जाचे कडल्यान जमीन घेतली तो म्हणटा आपणेय ती कोणा कडल्यान तरी घेतिल्ली. एक जमीन एकल्या कडल्यान दुसर्या कडेन, दुसर्या कडल्यान तिसर्या कडेन वता तरी ती जमीन सरकारची म्हणपाचें कोणाच्याच कशें लक्षांत येना? जमीन ट्रांस्फर जातना कळूंक नाका आसलें? सद्याक हसन आपणाले तिसेक लाख बुडले म्हणून तकलेर हात दवरून बसला. सरकार जमीन अक्वायर करता, जमीन मालकाक पयशे दिता आनी ती जमीन तशीच पडून उरता. कांय तेंपान जमीन सरकारन घेतल्या म्हणपाचें सगळेच विसरतात आनी ती जमीन कोणतरी भलतोच विकती घेता. आतां विकपी ती चुकून विकता काय मुद्दम तें कळप कठीण. पूण कोणतरी त्रासांत पडटा इतलें खरें.
गोंयांत सद्याक खंयूय जमीन वा प्लाॅट बी घेवप म्हणल्यार आपल्याच पांयार फातोर मारून घेवप काय दिसता. जमीनूच न्ही जाल्यार बांदिल्लें घर वा फ्लॅट लेगीत घेतलो जाल्यार घेवप्याक तातूंत सुशेगादीन रावंक मेळटलेंच हाची खात्री दिवंक जावची ना. कोणतरी आपणाली जिवितभराची जोड घालून वयल्यान रीण घेवन एकादो जागो घेता आनी उपरांत ताचे फाटल्यान शुक्लकाश्ट लागता तर बाबड्यान कितें करपाचें? हालिंसराक गोंयांत हेंच पळोवंक मेळटा. कोणतरी प्लाॅट विकपाची जायरात दिता. गरज आशिल्लो प्लाॅट घेता . सगळे सोपस्कार करून तो घर बांदूक वता आनी इतल्यान ताका आपूण फटवलों म्हणपाचें कळटा. बाबडो दुडू खर्च करुनूय फसता, सामको वार्यार पडटा. मागीर कोर्ट कचेर्यो सुरू. विकतें श्राद्ध म्हणप काय कितें तें कळना.
गांवांत कोण रावनात वा कोण भायल्या देशांत आसात तांच्यो जमनी कोणतरी फटिंगपणां करून आपल्या नांवार करता आनी उपरांत प्लाॅट करून ते जागेचो विलो लायता. ताचीं फटिंगपणां उक्तडार येवपाक बरोच वेळ वता. तितल्यान ते प्लाॅट एकल्या कडल्यान दुसर्या कडेन पाविल्ले आसता. कर्म कोण करता आनी त्रासांत कोण पडटा पळेयात. तातूंत आमकां आनीक एक सवंय आसा ती म्हणल्यार इल्लो टॅक्स वाटोवपाक जागेचें मोल उणें दाखोवप आनी इल्ले चड त्रासांत पडप. फाल्यां पयशे परते मेळपाचे जाले तरी ते उणे दरेनूच मेळपाचे.
दर दिसा कोणाचो तरी जागो हडप केलो म्हणपाचें आमकां आयकूंक मेळटा. जेन्ना कोणूय जागो घेता, तेन्ना तो सगळीं कागदपत्रां तपासुनूच तीं सारकीं आसलीं तर मुखार सरता. सगळीं कागदपत्रां सारकीं आसा म्हणपाचें दिसता आसतनाय घेवपी फटवता हाचेवेल्यान हीं फटिंगपणां करपी कितलो तरबेज आसता पळेयात. इतले दीस कोणतरी भायले लोक असलीं नाटकां करतात म्हणपाचें आयकूंक येतालें, पूण आतां तर नीज गोंयकारांचींय नांवां हातूंत येवंक लागल्यांत. समाजकारणाच्या नांवांन हड्डें मुखार काडून भोंवपी लोक जेन्ना असलीं फटिंगपणां करतात तेन्ना कितें समजुपाचें?
इतले दीस कोणालीय खाजगी जमीन हडप केली म्हणपाचें आयकताले. पूण, आतां तर सरकारी वा कोमिुनदादीची जमीनूय आपल्या नांवार करून ती विकिल्ल्याचीं प्रकरणां भायर येवंक लागल्यांत. खाजगी जमनी बाबतींत एक समजूंक येता. जमनीचे मालक गांवांत ना आनी तांची जमनीकडेन आडनदर जाता. पूण कोमुनिदाद आनी सरकारी जमनीचें कितें? तांचेय जाळवणदार गांवांभायर आसतात काय? हालींच केप्यां वाठारांत एक सरकारी जमीन कोणेतरी आपली म्हूण सांगून ताचेर प्लाॅट करून विकले म्हणपाची खबर वाचूंक मेळ्ळी. एकादी जमीन जेन्ना ट्रांस्फर जाता, तिचें म्युटेशन जाता, प्लाॅट करतना सर्व्हे जाता त्या वेळार एकाय ऑफिसराचे नदरेक ही जमीन सरकारची म्हणपाचें कशें येना? सगळ्या जमनींचे नकाशे सर्व्हे ऑफिसाकडेनूच आसतात न्ही? मागीर त्या नकाश्यांनी बदल कशे जातात? हे सगळे लोक एकठांय आयलेबगर असलीं नाडेपेन्नां करूंक जातलीं? हाचो अर्थ कितें जालो? खरें म्हणल्यार हे बदल जातना ऑफिसर कोण आसलो ताचेर पयलीं कारवाय जावंक जाय. जो मेरेन कोणाचेर तरी कारवाय जावचिना तो मेरेन लोक फटवत रावतले. लोकांचे घामा- कश्टाचे दुडू खावन वचप सारकें? पचचे नात रे असले दुडू.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
