भांगरभूंय | प्रतिनिधी
मनशाक कितली जमीन जाय पडटा? दफन करपा पुरतीच. लिओ टाॅलस्टाॅयान काणयेंत हें सांगलां. मात, मनीसजात निर्माण जायत सावन ताका जमनीची हाव आशिल्ल्याच्यो देखी आसात. आयज हीं वसवशेंपणां उणीं जाल्यांत? नात. समाजीक कार्या खातीरुय लोक आपली एक मिटर पसून जमीन सोडपाक तयार नासतात. तशे थोडे जमीन दान करपी आसात. पूण हे खूब दुर्मीळ मनीस. कांय जाणांक जमनी विकून पयसो करचोसो दिसता. मागीर पांय वण्टीक लागून न्हिदप आनी व्याजाचेर मजा- मजा करप. पयरूच ईडीन (अंमलबजावणी संचालनालय) जमीन बेकायदेशीर हडप करपी टोळी उध्वस्त केली. मोल कितलें ते जमनीचें? 1200 कोटी रुपयां परस चड. भितर आसगांव, अंजूणें आनी हेर कडेन साडेतीन लाख चौखण मिटर जमनीचें बेकायदेशीर म्युटेशन केल्ल्याचें दिसलां. अर्थांत हातूंत नीज गोंयकारांचो मात पसून हात ना, अशें म्हणपाचें धाडस कोणाकूच जावचें ना. एक पंच, वेपाऱ्याच्या आड पुरावे जमयल्यात. हे आनी हाचे मुखार जमयतले ते पुरावे दोशी जमीन खायऱ्यांक ख्यास्त दिवपाक फावोशे आसचे.
हाचे आदीं सरकारी अधिकाऱ्यांक, कर्मचाऱ्यांक लाच दिवन बोगस कागदां, वारस तयार करून, कोट्यांनी रुपयांच्यो जमनी भायल्यांक विकपाचे प्रकार जाल्यात. हातूंत शेतां, दोंगर पसून आसात खंय. ह्या गुन्यांवकारांक ख्यास्त जातली, काय नोकरी लावपाक पयशे घेवपाच्या प्रकरणा सारकें हेंवूय पोल जातलें, तें कळटलेंच. 30 प्रकरणांनी सध्या 75 जाणांक अटक केल्या खंय. पूण हे बुराटे, मोतयाळीं!! चणाक, विस्वण केन्ना सांपडले? तांचे वयले शार्क, देवमाशे मेळपाची आस्त ना. कारण चिमटीभर पुरावो दवरिनासतना गैरकारभार करपांत सध्या सगलेच फिशाल जाल्यात. देव खंय वयल्यान सगले पळयता, अशी भावार्थ्यांची श्रद्धा, पूण हांगां देवी, सायबीण, पीर, राखणदार… सगल्यांक तोपी घालपी आसात. जमीन गैरवेव्हाराचो तपास करपाक विशेश कृती दळ स्थापन केल्लें, तसो निवृत्त न्यायाधीशांचो एक आयोग नेमून ह्या जमीन खावपाच्या प्रकरणाची चवकशी करपाचो वेळ आतां आयला.
धाकटुल्या गोंयांत हें जाता, जाल्यार व्हडल्या राज्यांनी कितें जाता आसतलें? फाटल्या 25 वर्सांच्या काळांत केन्ना, कितली जमीन, कोणाक विकली? ताचे कितले पयशे कोणाक मेळ्ळे. जमीन धनी, ती विकपी आनी विकत घेवपी मनशाचें नांव, पत्तो, तो कसली नोकरी, वेवसाय करतालो वा करता हाचो डेटा सरकारी यंत्रणे कडेन आसतलोच. ती वळेरी ग्रामसभां मुखार येवची. पयलीं कोमुनिदादींच्या आनी मागीर सरकारी जमनींची चवकशी सुरु जावंदी. 1990 वर्सा कोमुनिदाद, सरकाराची कितली जमीन आशिल्ली आनी सध्या कितली आसा. ती सध्या कोणाचे मालकेची… ताचो सोद घेवंचो. खेडेगांव म्हणलें काय कश्ट करून पोट भरपी, स्वाभिमानान जगपी, प्रामाणीक गरीब मनशाचें चित्र दोळ्यां मुखार येता. पूण थंयूय 5, 7, 9 कोटींच्यो जमनी, भाटां, फार्म हावसां घेवपी मनीस आसात. खंयच्यान आयलो तांचे कडेन हो पयसो? कायदेशीर मार्गान आयला जाल्यार कोणूच तांंचें कांयच करपाक शकना, पूण हेर मार्गांनी आयला जाल्यार चवकशी जावपाक नाका? पयसो, मालमत्ता करपाचें राजकारण हें एक बरें साधन. ओगीच लोक ह्या मळार येवपाक धडपडनात. वेवसाय म्हणूनय राजकारण करुं येता, पूण भ्रश्टाचार, गैरकारभार, गुन्यांव करिनासतना!!
जमीन गैरवेव्हार प्रकरणांत तपास यंत्रणेक मजत करपाक कोण मुखार येतलोच, अशें ना. कारण लोक सुवार्थ पळयतात. कोणाक दुखोवपाक सोदिनात, थोड्यांक धाडस नासता. ‘कित्याक भाजपाक जाय त्यो लश्कराच्यो भाकऱ्यो’ असो विचार करून तटस्थ रावपी, जाता तें मोन्यानी पळोवपी, मात सोशल मिडियाचेर टोपण नांवान सप सप करून तरसाद वावुडपी भिजूडय आसात. म्हणटकच तपास यंत्रणांक एकहाती हें काम करचें पडटलें. चेपण आसतलें!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
