जमनी हडप अहवालाचो पेंडसे आयोग अहवाल जावचो न्हय

भांगरभूंय | प्रतिनिधी

सरकाराची स्थीरताय आनी अस्थीरताय बी अशाच फुडाऱ्यांच्या हातांत आयले उपरांत मागीर विचारपाकूच नाका. गोंयांत ल्हान मतदारसंघ आशिल्ल्यान वेंचून येवपाक लागून पयशांची गुंतवणूक केल्यार बऱ्याच फावटी येस मेळूं येता, हें आतां मेरेनच्या राजकी अणभवांतल्यान सिद्ध जालां.

गोंयचे मुख्यमंत्री डॉ. प्रमोद सावंत हांणी एक धाडशी, क्रांतीकारी असो निर्णय घेतलो. गोंयांत बेकायदेशीर पद्धतीन जमनी हडप करपाची कितलीशींच प्रकरणां आतां मेरेन उक्ताडार आयल्यांत. तातूंत बनावट कागदपत्रां करून भलत्याच्योच जमनी परस्पर भलत्याच कोणाच्या तरी नांवार करून त्यो जमनी विकपाचेय कितलेशेच वेव्हार जाल्यात आनी तातूंतल्यान कांय जाण बरेच गब्बर जाल्यात. हो विशय आतांचो न्हय, पूण कोणेंच ताचेर ठोस उपाय करपाक कांयच केलें ना, पूण मुख्यमंत्री डॉ. सावंत हांणी पयली अशा प्रकरणांच्या तपासाक लागून विशेश तपास पथक म्हणल्यार एसआयटी स्थापन केली आनी मागीर मुंबई उच्च न्यायालयाचे आदले निवृत्त न्यायाधीश व्ही. के. जाधव हांचो एक वांगडी चवकशी आयोग स्थापन केलो. ऑगस्ट 2022 त आयोग स्थापन केल्या उपरांत जानेवारी 2023 त आयोगान काम सुरू केलें आनी विक्रमी वेळांत चवकशी पुराय करून आपलो अहवाल 1 नोव्हेंबराक सुपूर्द केलो.
धनयांक जमीन मेळूं येता
ह्या अहवालांत जमनी हडप केल्ल्या प्रकरणांची सखोल माहिती आसाच, पूण तेच वांगडा जमनींच्या वेव्हारांचेर आळो घालपा खातीर कितें करूं येता हे विशीं कांय म्हत्वाच्यो सुचोवण्यो ह्या अहवालांत केल्यात. जमनी हडप करपी प्रकरणांत संशयितांचीं नांवां आनी तांचो हातूंत कसो आसपाव आसा हे विशींची माहितीय हातूंत आसा आनी ताचे वयल्यान आतां दोशींचेर कारवाय करपाची प्रक्रिया सुरू जातली. हातूंत एक म्हत्वाची घोशणा मुख्यमंत्री डॉ. प्रमोद सावंत हांणी केल्या. गोंया भायर स्थलांतरीत जाल्ल्या कितल्याशाच गोंयकारांचीं घरां आनी जमनी गोंयांत आसात. ह्यो जमनी बळकावन ह्या लोकांनी ह्या जमनींचे वेव्हार केल्ल्याचें कितल्याशाच प्रकरणांतल्यान उक्ताडार आयलां. आतां अश्या जमनींच्या मूळ धनयांनी आपल्या जमनींचीं कायदेशीर कागदपत्रां दाखोवन आपली मालकी सिद्ध केली जाल्यार ह्यो जमनी तांकां मेळूंक येता ना जाल्यार अश्यो जमनी सरकाराच्या ताब्यांत उरतल्यो अशेंय मुख्यमंत्र्यांनी म्हणलां. आतां मुख्यमंत्री सांगता तें खरें धरलें जाल्यार ज्या मनशांनी बेकायदेशीर पद्धतीन ह्यो जमनी ज्या लोकांक विकल्यो आनी जांणी ह्यो कायदेशीर जमनी अशें समजून पयसो खर्च करून ह्यो जमनी विकत घेतल्यो ते फोंडांत पडपाचें कांय कितें, तांची मुळांत हातूंत चूक कितें आनी मुख्यमंत्री डॉ. प्रमोद सावंत म्हणटात तें कायद्यान बसतलें कांय कितें हेंवूय पळोवचें पडटलें.
तेन्नाच्यान घसरण
गोंयचें राजकारण जेन्ना जमीन केंद्रीत जालें तेन्ना सावन गोंयची घसरण सुरू जाली. बिल्डर, हॉटेल आनी उद्येजक लॉबीक जाय तशे कायदे आनी दुरुस्त्यो जावपाक लागून तांचे एजण्ट अशे तरेनूच आमदार वेंचून येवपाक लागले. अशा आमदारांक फिडिंग करपाचें काम हे लोक करतात. वेंचून आयले उपरांत ह्याच आमदारांक धरून ही लॉबी आपल्यो सगल्यो सरकारी गजाली करून घेतात. ह्या वेव्हारांतल्यान मेळपी चिकार पयसो आनी तातूंतलो कांय वांटो मतदारांचेर खर्च केल्या उपरांत राजकी आसन सुरक्षीत रावता. हें चित्र आतां इतलें इबाडलां की पयलीं एक आमदारूच एजण्ट म्हूण वेंचून येतालो. आतां आमदार आपली बायल, भाव, भुरग्यांकूय बी वेंचून हाडपाक पयसो पणाक लायता. सरकारान रावन जितलें वजन तयार जाता तितलीं कामां अशा राजकी नेत्यांची येशाक येतात. सरकाराची स्थीरताय आनी अस्थीरताय बी अशाच फुडाऱ्यांच्या हातांत आयले उपरांत मागीर विचारपाकूच नाका. गोंयांत ल्हान मतदारसंघ आशिल्ल्यान वेंचून येवपाक लागून पयशांची गुंतवणूक केल्यार बऱ्याच फावटी येस मेळूं येता, हें आतां मेरेनच्या राजकी अणभवांतल्यान सिद्ध जालां.
भानगडी भायर सरपाची शक्यताय
मुख्यमंत्री डॉ. सावंत हांणी एसआयटी आनी चवकशी आयोग स्थापन करपाक जें धाडस दाखयलें, तेंच धाडस आतां ते ह्या चवकशी आयोग अहवालाच्या कार्यवाहींत दाखयतले काय कितें हो म्हत्वाचो प्रस्न लोक विचारुंक लागल्यात. आतां मेरेन ह्या प्रकरणांनी कोणूच मुखेल राजकी फुडारी घुस्पल्लो दिसूंक ना. एकूच प्रकरण मांद्र्याचे आमदार जीत आरोलकर हाचे आड दाखल जालां. तातूंत कोर्टानूय बी खर दखल घेतिल्ल्यान आरोलकार अडचणींत येवंक शकतात. ते जे तरेन एका फाटोफाट एक प्रकरणां हातांत घेवन आपल्याच सरकाराच्या विरोधांत उबे रावत आसात तें पळयत जाल्यार तांकांय हाचो वास लागला आसूं येत. हेर प्रकरणांनी कांय सरकारी अधिकारी, कर्मचारी आनी बाकीचे एजण्ट हांचो आसपाव आसा. आतां ह्या एजण्टांचे गॉडफादर कोण हें पळोवचें पडटलें. गोंयांत खंयचो राजकी फुडारी खंयच्या जमीन वेव्हारांत आसा हें गोंयकारांक सांगपाची गरज ना. गोंय प्रशासनांत काम करपी आयएएस आनी आयपीएस अधिकारी हांचोय वापर जमनींच्या वेव्हारांत आतां जावपाक लागला. दिल्ली लॉबी कडल्यान ह्या अधिकाऱ्यांचो वापर जाता तशेंच दिल्लीच्या राजकी फुडाऱ्यांचें कनेक्शन ह्या आयएएस आनी आयपीएस अधिकाऱ्यां कडेन आशिल्ल्यान तेवूय बी अशा वेव्हरांत घुस्पल्ल्याची चर्चा सुरू आसा. डॉ. प्रमोद सावंत हांणी प्रामाणीक हेतून ह्या अहवालाचो अभ्यास केलो आनी कारवाय केली जाल्यार अश्यो कितल्योशोच भानगडी उक्ताडार येवपाची शक्यताय आसा.
डाॅ. सावंत येशस्वी जातले?
गोंयांत 2001 वर्सा क्रिकेट तिकटी घोटाळ्याची चवकशी करपाक कर्नाटक उच्च न्यायालयाचे निवृत्त न्यायमुर्ती एम. एल. पेंडसे हांच्या फुडारपणा खाला एक वांगडी चवकशी आयोगाची स्थापना केल्ली. त्या वेळार गोंय क्रिकेट संघटणेचें फुडारपण दयानंद नार्वेकार करताले. ह्या घोटाळ्यांत तांचो वांटो आसपाची शक्यताय चड आशिल्यान आनी तातूंतल्यान भाजपाचे ते राजकी विरोधक आशिल्ल्यान तेन्नाचे मुख्यमंत्री मनोहर पर्रीकार हांणी ह्या आयोगाची स्थापना केल्ली. ते उपरांत आयोगान आपलो अहवाल 2003 त दिलो. तातूंत दयानंद नार्वेकार, विनोद फडके, रामा शंकरदास आनी हेरांचेर अतिरिक्त तिकटी छापून पयशांचो गैरवेव्हार केल्ल्याचो ठपको आसलो. ह्या अहवालांतूय बी कितल्योश्योच सुचोवण्यो केल्ल्यो, पूण तातूंतली एकूय सुचोवणी आयज मेरेन चालीक लागूंक ना आनी अहवालाचेर कारवाय पसून जावंक ना. 2005 त काँग्रेसीचें सरकार सत्तेर आयले उपरांत तेन्नाचे मुख्यमंत्री प्रतापसिंह राणे हांणी हो अहवाल न्हयकारलो. तेन्ना नार्वेकार मंत्री आशिल्ले. 2012 त परतून भाजपाचें सरकार सत्तेर आयलें. तेन्ना नार्वेकार वेंचणूक हारिल्ले. तेन्ना मनोहर पर्रीकार हांच्या मंत्रीमंडळान परतून एक फावट हो अहवाल स्विकारलो. काँग्रेसीच्या काळांत राणे सरकारान अहवाल न्हयकारल्याच्या आड हायकोर्टांत आव्हान याचिका दाखल केल्ली. ह्या अहवालाचेर राजकी फुडाऱ्यांनी आपली राजकी पोळी भाजून घेतली, पूण ठोस कारवाय मात कांयच जावंक ना. जमनी हडप प्रकरणाच्या चवकशी अहवालाचो पेंडसे आयोग जावचो न्हय इतलेंच म्हणचें पडटलें. पेंडसे आयोग मार्गाक लावपाक पर्रीकार अपेशी थारले, पूण आतां जाधव अहवाल मार्गाक लावपाक डॉ. प्रमोद सावंत येसस्वी जातले काय कितें?

किशोर नायक गांवकार
7774039242