भांगरभूंय | प्रतिनिधी
भांगरभूंय । प्रतिनिधी
पर्वरीः राज्यांत सध्या 4 हजार कोटी रुपये खर्च करून सगळे कडेन जमनी पोंदच्यान वीज केबल्स घालपाचें काम चल्लां. देड वर्सांत तें पुराय जातले. ते उपरांत वीज पुरवणे विशीं चड समस्या उप्रासच्यो नात अशें वीज मंत्री सुदिन ढवळीकार हांणी सुकूर हांगा जमनी पोंदच्यान केबल्स घालपाच्या कामाक सुरवात करून दितना सांगलें.
1965 वर्सा राज्यांत ओव्हरहेड सरयां वरवीं वीज पुरवण जाताली. 55 वर्सां उपरांत जमनी पोदच्या केबलां वरवीं ती जातली अशें तांणी सांगलें.
पर्वरी मतदारसंघांत जमनी पोंदच्यान वीज केबल्स घालपाचें कामा खातीर वीज खातें 145 कोटी रुपये खर्च करतलें. पिणर्ण हांगां 350 रुपया खर्च करून 200 एमव्ही ताकीचें वीज उपकेंद्र उबारपाचें काम सुरू आसा. ही कामां पुराय जातगीर पर्वरी आनी साळगांव मतदारसंघात विजेचो दाब चड- कमी जावपाची समस्या सुटावी जातली. लोक आपल्या घरांत वीज उपकरणां घेतात आनी वीज खात्याक कळयनास्तना लोड वाडयतात. ताका लागून ट्रान्सफोर्मरांचेर पेज येता आनी लायट वता. लोकांनी तांच्या लायटीच्या लोडाची म्हायती दिल्यार चड तांकीचें ट्रान्सफोर्मर बसोवन समस्या सुटावी करपाक जाता अशें ढवळीकार हांणी सांगलें.
फाटल्या बारा वर्सांत पर्वरी मतदारसंघांत उदक आनी वीज पुरवण, कोयर आनी सीव्हरेज संबंदीची कामे पुराय केल्यात. जमनी पोंदच्यान वीज केबल्स घालतगीर खंडीत जायनासतना वीज पुरवण जातली अशें पर्वरेचो आमदार आनी पर्यटन मंत्री रोहन खवंटे हांणी सांगलें. राज्यसभा खासदार सदानंद शेट तानावडे हांचें ह्या वेळार उलोवप जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
