भांगरभूंय | प्रतिनिधी
गोंयचे भूंयेत कोमुनिदाद जमनी हडप करप हें नवें न्हय. झोपडपट्टी आनी हेर बेकायदेशीर बांदकाम वेवसाय करपा
खातीर जमीन दिल्ली आसता. स्वताचें बेकायदेशीर घर बांदप ते स्क्रॅपयार्ड घालपा मेरेन खंयचेय बेकायदेशीर काम सुरू करपाक कोमुनिदादची जमीन तशेंच सरकारी जमनीचो गैरवापर करूं येता, अशी सोयीस्कर कल्पना समाजाच्या सगळ्या पांवड्यार घटमूटपणान रुजल्या. कांय वर्सां आदीं मोती दोंगर (व्हॉट बँक- मडगांव) हांगां अतिक्रमण केल्ले जमनीचेर बेकायदेशीर रितीन बांदिल्ल्या घरांक पुलीस बंदोबस्तांत नोटीस जारी केल्ली. आतां कांय म्हयन्यां आदीं सरकार तशेंच कोमुनिदादी जागृतायेक लागून अतिक्रमण, स्क्रॅपयार्ड जमनी हडप करप थांबोवपाचो निर्णय घेतला. ताका येवकार दिवपाक जाय.
कोमुनिदाद ही एक खाजगी संघटना. तिचेर पुराय संशोधन करून ताचो अभ्यास करचो पडटलो. कांय कडेन सरकारी जमनीचेर सरकाराक हक्क आसतना हे नेम पुरायपणान मोडून अतिक्रमण करपी अधिकाऱ्यांचेरूय सरकारान कारवाय करची. सरकारी जमनीचेर अतिक्रमण करप हें गंभीर प्रकार. राज्याची सध्याची परिस्थिती पळयल्यार जमीन आमच्या पूर्वजांची आसा, अशें दस्तावेज तयार करुन ती तिसऱ्याच मनशाक विकपाचे गैरवेव्हार जायतीं वर्सां घडल्यात आनी हाचे मुखारुय घडटले. भांगरा परस चड मोल मेळपाक लागले बरोबर जायत्या जाणांनी सरकारी नेम मोडून बोगस दस्तावेज तयार करून जमनीचे वेव्हार केलें.
कायदेतज्ञ आनी कोमुनिदाद, सरकारी अधिकारी, कारकून हांचे ह्या गैरवेव्हारांत हात आसतलेच, सरकार खोलायेन वचून ह्यो सगळ्यो गजाली उक्त्यो केल्यो जाल्यार जायत्या जाणांची नावां मुखार येतली. ना लोकांची लज, ना मनाची लज. भारत हो बुद्ध, महावीर आनी महात्मा गांधीजींचो देश, ‘अहिंसा परमो धर्म:’ ही हांगाची शिकवण. अशें आसतना लेगीत लोक बेकायदेशीरपणा, गुन्यांव करतात. कायदो आपल्या हातांत घेतात, हाका कितें म्हणचें तें कळना. जमीन हातासपाच्या प्रकरणांत कांय नांवां भायर सरल्यांत. तांचेर कडक कारवाय करची. आतां मुख्यमंत्री सावंत हांणी जी घोशणा करतना जी उमेद दाखयल्या, तीच ह्या बेकायदेशीर कारवायांत दाखोवंक जाय. तेन्नाच आमच्या देवभूंय- परशुराम भूमीचो नाश जावचो ना. तातूंत गोंयकारपणूय दिसतलें.
सुरांचे भलायकेचेर परिणाम
सुरांचे भलायकेचेर जावपी परिणामा विशीं आमच्या ऋषींनी व्हड सोद लायल्यात. खंयचो स्वर चालू आसतना ताचो त्या वेळार कुडीचेर परिणाम जाता. उजवे नाक पुडयेंतल्यान येवपी उजवो स्वर आनी दावे नांक पुडयेतल्यान येवपी दावो स्वर, अशें मानतात. नांक पुडयेचेर बोट दवरून हाचें गिन्यान सहजपणान मेळूंक शकता. जे नाकपुडयेंत स्वास घेवप नेटान जाता तेन्ना तो स्वर वा ती नांकपुडी चालू आसा, अशें म्हण्टात. उजवो स्वर सक्रिय आसतना अन्न बेगीन पचता. पूण पेयां घेवपाचीं आसल्यार दावो स्वर चालू आसूंक जाय. अन्न वा खंयचीय खाणाची वस्तू खातना उजवो स्वर सुरु नासल्यार काय वेळ दावे कुशीन न्हिदून वा कपड्याचो कुडको दावे खाकेंत दाबून हो स्वर सुरू करूं येता. हाका लागून भलायकेची राखण जाता.
सकाळीं जागो जातकच स्वर चालू आशिल्ले वटेनचो हात तोंडार भोंवडावचो आनी तोच पांय पयलीं जमनीर दवरचो. तशें केल्यार आपल्या वावरांत येस मेळटा, अशी श्रद्धा आसा. सैमान एका वर्सा मेरेन भुरग्यांच्या स्वरांचेर नियंत्रण दवरलां. ल्हान भुरगें मुत्ता तेन्ना ताचो दावो स्वर चालू आसता आनी शौच करतना उजवो स्वर चालू आसता. अशे तरेन स्वरांचेंय एक शास्त्र आसा, ते समजून घेवन ल्हान- ल्हान गजालींनी जतनाय घेवन मनीस भलायकेची राखण करूं शकता आनी वेव्हारीक जिणेंत यश मेळोवं
शकता.
गजानन बा. नायक भाटकार
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
