भांगरभूंय | प्रतिनिधी
पणजीः गोंयांत जप्त केल्ले ड्रग्स फकत ताब्यातूच घेनात तर ते कायदेशीर प्रक्रिये प्रमाण नश्ट करतात. गोंयांतल्या मुंबय उच्च न्यायालयाच्या देखरेखी खाला नश्ट करपी घुवळे वखदांचो व्हिडियो रेकॉर्डिंग अमली पदार्थ विरोधी विभाग करता. हाका लागून पारदर्शकता आनी जापसालदारकी सुनिश्चीत जाता अशें मुख्यमंत्री डॉ. प्रमोद सावंत हांणी सांगलें.
समाज कल्याण खात्यान आयोजीत केल्ले ‘नशा मुक्त भारत’ कार्यावळींत मुख्यमंत्री उलयताले. मुख्यमंत्र्यान सांगलें, सरकाराची भुमिका फकत ड्रग्स जप्त करपा मेरेन मर्यादीत ना. जाल्यार जप्त केल्ले ड्रग्स नश्ट करप तितलेंच म्हत्वाचें आसा.
ड्रग्स विरोधी मोहीम चड प्रभावी करपा खातीर वेगवेगळ्या एजन्सीं मदीं समन्वय वाडोवपाचेर भर दितात. तरणाट्यांक व्यसन मुक्त करपा खातीर राज्य सरकार जागृताय, प्रतिबंध आनी खर अंमलबजावणी ह्या तिनूय पांवड्यार वावुरता अशेंय मुख्यमंत्र्यान सांगलें.
प्रधानमंत्री नरेंद्र मोदी हांणी देशभरांत ‘नशा मुक्त भारत’ मोहीम सुरू केल्या. 2047 मेरेन विकसीत भारत आनी 2030 मेरेन विकसीत गोंय करतनाच नशा मुक्त भारत आनी नशा मुक्त गोंय करपाचे ध्येय आसा. भायल्यान गोंयांत येवपी ड्रग्स हाडटात तांचे आड एएनसी खातें कारवाय करता आनी ते जप्त करतात. गोंयकारांक ड्रग्सा पसून आडावपा खातीर सरकार यत्न करीत आसा.
‘नशा मुक्त भारत’ उपक्रमा खाला समाज कल्याण मंत्री सुभाष फळदेसाय हांच्या फुडारपणा खाला गोंयांत मोहीम सुरू करतले अशें मुख्यमंत्री डॉ. प्रमोद सावंत हांणी सांगलें. समाजांत व्यसन मुक्त विशीं जागृताय निर्माण करपाचो यत्न सरकार करता. हातूंत नागरिकांक सक्रीयपणान वांटो घेवपाचो उलो मुख्यमंत्र्यान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
