भांगरभूंय | प्रतिनिधी
टोक्यो, खबरां संस्था: झाडां कितली म्हत्वाचीं हें तुमकां खबरूच आसा. तांचे बगर जिवीत जगपाचो विचारूच करपाक शकना. मात तुमकां खबर आसा हीं झाडां वाडोवन लेगीत संवसारीक विक्रम घडोवप शक्य आसा. हय, जपानांत रावपी एका मनशान अशें केलां. तशेंच ताका संवसारांतलो सगळ्यांत भाग्यवान मनीस मानतात, कारण ताणें ६३ वेगवेगळ्या पानां सयत तण वाडोवन नवो गिनीज वर्ल्ड विक्रम केलो. ह्या मनशाचें नांव योशिहारू वतानाबे.
क्लोव्हराचीं (तण) जितलीं चड पानां तितलेंच ताचें नशीब चड बरें अशें जपानांत मानतात. हाकाच लागून योशिहारूक संवसारांतलो सगळ्यांत नशीबवान मनीस अशें म्हण्टात, कारण ताणें ६३ पानां आशिल्लो क्लोव्हर पिकयलो आनी अशें करपी तो संवसारांतलो पयलो मनीस थारलो.
ऑडिटी सेंट्रल हे वेवबसायटी प्रमाण योशिहारूची काणी २००९ वर्सा सुरू जाता. तेन्ना ताणें तीन परस चड पानां आशिल्ले क्लोव्हर एकठांय करून आपल्या घराचे बागेंत लावपाक सुरवात केली. सुरवेक ताका दिसलें, २० पानां आशिल्लो क्लोव्हर पिकोवन संवसारीक विक्रम करतलों. ते खातीर तांणी वनस्पतीचें क्रॉस परागण केलें आनी मागीर धक्को दिवपी परिणाम मेळ्ळो. ताचे बागेंत ६३ पानां आशिल्लो क्लोव्हर वाडलो, हाचो तांणी केन्नाच विचार लेगीत करूंक नाशिल्लो.
क्लोव्हरच्या पानांचो आंकडो मेजप कठीण आशिल्लें अशें योशिहारू हांणी सांगलें. हो विक्रमी क्लोव्हर मेजलो तेन्ना म्हाका एक वरा परस चड वेळ लागलो. ताचे आदीं जपानांतल्या शिगेओ ओबारा हांणी २००९ वर्सा ५६ पानांचो क्लोव्हर पिकोवपाचो संवसारीक विक्रम केल्लो. मात आतां योशिहारून तो मोडला.
योशिहारू हांणी गिनीज वर्ल्ड रेकॉर्ड्साक सांगलें, ‘क्लोव्हर ही सगळेकडेन मेळपी एक सामान्य वनस्पत. देखून जेन्ना जेन्ना भाताच्या शेतांत वा पार्का लागसार चार पानांचो, पांच पानांचो वा सात पानांचो क्लोव्हर दिसतालो तेन्ना तो घरा हाडटालों. जशीं वर्सां मुखार सरता सरता पानांचो आंकडोय वाडत गेलो तेन्ना सावन गिनीज वर्ल्ड रेकॉर्डांत स्वताक कोरांतून घेवप हो म्हजो हेत थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
