भांगरभूंय | प्रतिनिधी
खबरां संस्था ः राश्ट्रीय उद्यानांत वा रान सफारींत गेले उपरांत थंयच्या रानवटी जनावरां बरोबर जायते जाण सेल्फी वा फोटो काडटात. पूण आतां ओडिशा राज्यांत परवानगी नासतना रानवटी जनावरां बरोबर सेल्फी वा फोटो काडपी लोकांक दंड आनी सात वर्सां मेरेन बंदखणीची ख्यास्त फर्मायल्याचे एका वरिश्ठ अधिकाऱ्यान सांगलें. प्रधान मुखेल रान संरक्षक (पीसीसीएफ) (वन्यजीव) सुशांत नंदा हांणी हे संबंदी विभागीय रान अधिकारी आनी सिमिलीपाल दक्षिण, उत्तर विभाग आनी नंदनकानन प्राणी उद्यानाचे उपसंचालकाक पत्र बरयलां.
पत्रांत कितें म्हणलां?
कायद्याचे उल्लंघन करून प्रसिध्दी मेळोवपाचो यत्न करपी लोकांक अटक करतले. सोशल मिडियाचेर जायते जाण सेल्फी वा रानवटी जनावरां वांगडा घेतिल्ले फोटो घालतात. अशें फोटो काडपाचो यत्न केल्यार रानवटी जनावरांचें जिवीत चक्र इबाडटा. तशेंच वन्यजीव (संरक्षण) कायदो, 1972 च्या तरतुदींचें उल्लंघन जाता. हाका लागून जनावरां बरोबर फोटो काडपी मनशांक कायद्या प्रमाण सात वर्सां मेरेन बंदखणीची ख्यास्त जाता आनी दंड भरचो पडटा. हाचे भायर वेगवेगळ्या जातींच्या रानवटी जनावरांक, तांची मेल्ली कूड, कुडीचे अवयव हांचे कडेन सेल्फी आनी फोटो काडप लेगीत कायद्या खाला ख्यास्त करपा सारको गुन्यांव आसा. रानवटी जनावरांचे फोटो काडपाक सोदपी लोकांनी रान अधिकाऱ्यांच्या परवानगेन लागू आशिल्ले कायदे आनी मार्गदर्शक तत्वां पाळचीं अशें नंदा हांणी पत्रांत म्हणलां.
मजगतीं, रानवटी जनावरां बरोबर फोटो आनी सेल्फी काडपाचेर बंदी घालपा विशीं लोकां मदीं जागृताय निर्माण करपाची सुचोवणी रान अधिकाऱ्यांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
