भांगरभूंय | प्रतिनिधी
रातच्या वेळार चडश्या जनावरांचे दोळे लिकलिकतना तुमी पळयलां आसतलें. देखीक जेन्ना ट़ॉर्च वा गाडयेची लायट तांचेर
पडटा तेन्ना तांचे दोळे अचकीत लिकलिकतात लागतात. हें दृश्य खुबूच भिरांकूळ आसता. पूण तांचे दोळे कित्याक चकचकतात ताचें फाटलें कारण खबर आसा? माजर, सुणो, मानगें, हरण हे सारकिल्ली जनावरां रातचीं लेगीत खूब सक्रीय आसतात. रातच्या वेळार ह्या जनावरांचे दोळे चकचकपा फाटल्यान कसलो जादू ना. तें सैमीक आनी विज्ञाना कडेन संबंदीत आसा. खरें म्हणल्यार कांय जनावरांच्या दोळ्यांनी एक विशेश थर आसता, जाका टेपेटम ल्युसिडम म्हणटात. ताचो अर्थ चकचकीत थर. हो थर जनावरांच्या दोळ्यांच्या बुबुळा फाटल्यान आसता. ताचें काम उजवाडाक परतून धाडप. एकाद्या जनावराच्या दोळ्यांचेर उजवाड पडटा तेन्ना हो थर तो परतून धाडटा. हे खातीर आमकां तांचे दोळे चकचकतना दिसतात.
रातच्या वेळार जेन्ना हीं जनावरां रानांनी आसता आनी थंय इल्लोसो उजवाड आसता. अशे स्थितींत टेपेटम ल्युसिडम उजवाडाक रेटिनाचेर दोन खेपे घालता. उजवाड जेन्ना एकदां भितर वता आनी परतून तीच जेन्ना भायर सरता तेन्ना जनावर उण्या उजवाडांत लेगीत दुपेट तांकीन पळोवपाक शकता आनी आपली शिकार करपाक शकता वा धोक्या पासून स्वताक वाटावपाक शकता.
खाशेली गजाल म्हणल्यार टेपेटम ल्युसिडम त्या जनावरांनी मेळटा, जीं रातचीं भोंवतात, म्हणल्यार रातचीं सक्रीय आसतात. लक्षांत घेवपा सारकी गजाल म्हणल्यार घुघुमाक रातचें दिसता, पूण ताच्या दोळ्यांनी टेपेटम ल्युसिडम आसना. घुघुमाचे दोळे व्हड आसतात. तातूंत विशेश पेशी आसतात, जे उण्या उजवाडांत लेगीत बरे तरेन काम करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
