भांगरभूंय | प्रतिनिधी
हे दीस तशे जोडपाचे दीस म्हणल्यार फट थारचें ना. आंबे, काजू पिकल्यात. सगळो वाठार सुवासान भरला. सगळो बाजार सामको रसरशिल्ल्या फळांनी भरिल्लो दिसता. जाका जें जाय ताणें तें- तें घेवपाचें. तशे ह्या दिसांनी सूर्य, चंद्र, तारे जायतें मेळपाचे दीस. फकत मागात, मेळ्ळेंच म्हणून समजात. थोडेच दीस उपरांत सगळें विसरपाचें. दिवपीय विसरतलो आनी घेवपी आपणांक पिसो केलो म्हणून सांगुकूय लजेतलो. पांच वर्सां फाटल्यान एकल्यान वास्को- मुंबय वचपी बंद पडिल्ल्या ट्रेनीं खातीर आंदोलन करपाचें नाटक केल्लें. आपूण वेंचून आयल्यार ह्यो ट्रेनी सुरू करतलोच म्हणपाचें लोकांक उतर दिल्लें. वेंचून येवन पांच वर्सां दिल्ली रावलो आनी ट्रेनींक विसरुन गेलो. हाणें पिशांक पिंपळ दाखयल्लो म्हणपाचें लोकांक कळ्ळें, पूण कळून कांयच फायदो नासलो. ट्रेनी अजून बंद त्यो बंदूच.
आतां त्याच पक्षाचो एक उमेदवार भोमाच्या लोकांक न्याय दितलों म्हणपाचें सांगता. म्हाका वेंचून दियात हांव हो रस्तो बंद करतां म्हणपाचें तो सांगता. वेंचून येतकूच याद उरतली? म्हाका दिसता हे लोकांक पिशे समजतात आनी पिशांक पिंपळ दाखयतात. हे लोकांक सत कित्याक सांगिनात? जें घडपाचेंच ना तें आमी घडोवन हाडटले म्हणून सांगून आपणालें सादोवन घेवप कितलें योग्य? भोमच्यान हायवे जालो जाल्यार गांवांचें कांयच लुकसाण जावचें ना वेल्यान हांगचे कांय लोक आत्मनिर्भर जावंक शकता म्हणपाचें लोकांक कित्याक पटोवन दिनात काय हे फुडारी? जांची घरां वतलीं तांकां नवीं घरां मेळटलींच. गांव वाटून वचचो न्हय म्हणून कांय कडेन ओव्हर ब्रीज बांदूक जाता. रस्त्याच्या कडेक गाळे बांदून धंदो करूंक सोदप्यांक ते दिवंक जाता. येरादारी वाडली म्हणजे हांगच्या लोकांक बरें गिरायक मेळूंक शकता. होटॅल, दुकान, मॅकानीक, टायर रिपेरींग जायते धंदे सुरू करूंक जातात. गांवांत भाज्यो, फळांचें पीक घेवप्यांकूय अशे जागे दिवंक जातात. कायम स्वरुपी जोड ह्या लोकांच्या पोटाचो प्रश्न सोडयतली. पूण हें सगळें करचें सोडून वा हें करूं येता म्हणून लोकांक पटोवन दिवचें सोडून रस्तोच हालोवया म्हणप शाणेपणाचें?
जंय- जंय बायपास केल्यात थंयचें वातावरण पळोवचें. गांवचे धंदे काबार जाल्यात. कांय जागे बरें खावंक मेळटा म्हणून प्रसिद्ध आसले. लोक येतना वतना थंय गाडी थांबोवन आस्वाद घेताले. आतां सामके उबंत पडल्यात. मुद्दम वाट वांकडी करून कोण येतलो थंय? आनी बायपासाचेर भलत्यांनीच आपणालीं दुकानां थाटल्यांत. हाचो विचार जावंक नाका आसलो? लोकांक तितली बुद्द नासता. ते फुडारी सांगता तशे वागतात आनी स्वताक फटोवन घेतात. म्हणून फुडार्यांनीच तांकां समजावंक जाय न्ही. पूण हे फुडारी आपलें सादोवपा खातीर तांकां पिंपळ दाखयतात. आपूण फटवलों म्हणून कळटलें तेन्ना कपलार हात मारून घेवपा बगर दुसरो उपाय आसचो ना.
खरें म्हणल्यार म्हजी ह्या फुडार्या कडल्यान वेगळी अपेक्षा आसली. आपूण निवडून आयल्यार म्हापसा अर्बन परती जिती करून गोंयभर तिचे फांटे उगडटलों आनी लोकांक काम दितलों अशें म्हणटलो काय दिशिल्लें म्हाका. कितल्याश्याच लोकांचे पयशे हे बँकेंत आडखळून पडल्यात आनी ते ह्या जल्मांत लोकांक मेळपाची आशा ना. बँक परती सुरू जाली तर तांचे पयशे काडूंक मेळपाचे. जांचे काम गेलां तांकां काम मेळपाचें. पूण हो ताचेर कांयच उलयना. कसो उलयतलो? बरें आपले चुकीक लागून बँक बुडली म्हणून लोकांची जाहीर माफी तरी मागपाची. तेंय ना. वेल्यान तो मी नव्हेच. बँक आपणांक लागून बुडुंकूच ना म्हणत सगळें सरकाराच्या माथ्यार मारूंक सोदता. सरकारान मदत करपाची खंय. कसली मदत काय? सरकारान पयशे घालीत रावपाचे आनी हांकां लुटूंक दिवपाचें, अशेंच जालेंना? बँक गोंयची म्हणटकूच गोंयकारांक लोन मेळप सभावीक. बुडलेंय जाल्यार गोंयकारान बुडयलें म्हणूंक मेळपाचें. पूण कर्नाटकांतल्या राजकी फुडार्यांक लोन? हें रे बाबा कशें? हें कर्म सरकारान करूंक सांगिल्लें? बरें सरकार मदत करिना आनी बँक बुडूंक शकता अशें जर दिशिल्लें जाल्यार त्याच वेळार थंयसून कुशीक सरूंक नाका आशिल्लें? सरकार मागीर पळेत आसलो कितें करपाचें तें. आनी सरकारान तेन्ना कांयच केलें ना तर सरकाराक दोश दिवंक जातालो. पूण गोडा धेंपीक दोमळ्यान घांस मारून रावचें तसो हो बँकेक घांस मारून रावलो आनी आतां सगळें सरकाराचेर थापून आपूण साव जावंक सोदता. कसो पातयेवप हाका आनी कोण पातयेतलो?
उत्तरेक हें तर दक्षिणेक जाचेविशीं एक सोल्जर म्हणून अभिमान आसलो तो म्हणटा संविधान खंय आमच्या माथ्यार थापलां. ज्या संविधानाक लागून एक मनीस नेव्हींत केप्टन जावंक पावलो आनी आपूण सोल्जर म्हणूंक लागलो ताणें ह्यो थापपाच्यो गजाली करप? मागीर खंय गेलें तुमचें देशप्रेम? आतां आसात कांय लोक जे अजुनूय सालाझाराची वाट पळेतात. पूण जे कॉंग्रेसीन देशा खातीर एदो व्हडलो त्याग केलो. कितलेशेच स्वातंत्र सैनीक ह्या देशाक दिले. कितल्या तरी लोकांनी बलिदान दिलें ते कॉंग्रेसीच्या तिकिटार उबो राविल्ल्या उमेदवारान असले उद्गार काडप हाचेसारकी दुसरी लजेची गजाल ना. आतां कांय जाण कॉंग्रेस आनी नेहरूंक गाळी घालीत आसतात तांणी अशें कितेंय म्हणल्यार समजूं येतालें. पूण कॉंग्रेसच्याच मनशान अशें म्हणप हें कशेंच पटना.
खंय ते देशप्रेमान भरिल्ले अटलजी, नेहरुंजी सारके विरोधकांकूय सन्मान दिवपी फुडारी आनी आयचे फुडारी? मात्शी मनाची तरी धरूंक जाय न्ही!
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
