भांगरभूंय | प्रतिनिधी
मुंबय: मुंबयच्यान गोंयांत दर दिसा प्रवास करपी जनशताब्दी एक्सप्रेसीचो एक डबोच बुधवारा गायब जालो. तो जोडूंक नाशिल्ल्यान आरक्षीत तिकेट काडिल्ल्यांची बरीच गैरवेवस्था जाली. डीएल-1 डबो उपलब्ध जावंक नाशिल्ल्यान प्रवाशांक हेर डब्यांतल्यान प्रवास करतना त्रास सोंसचे पडले.
आरक्षीत तिकेट काडिल्ल्यांचो प्रवास बरो जावचे खातीर मध्य रेल्वे प्रशासनान रेल्वेंत तिकेटी बगर प्रवास करपी प्रवाशांचेर कारवाय करपाची मोहीम हातांत घेतली. मात आरक्षीत तिकेट काडिल्ल्यांचो डबोच गायब जाल्ल्यान प्रवाशांच्या प्रवासांत बरींच आडखळ निर्माण जाली. गाडी नंबर 12051 सीएसएमटी मडगांव एक्सप्रेस बुधवारा सदां भशेन सुटली. मात रेल्वे स्टेशनाचेर उबे आशिल्ल्या प्रवाशांचो बरोच बोवाळ जातना दिसलो. तिकेट आरक्षीत आशिल्लो डबोच नाशिल्ल्यान प्रवाशांनी हेर डब्यांत प्रवेश केलो. ही गाडयेक डीएल-1 डबो जोडूंक नाशिल्लो.
डीएल-1 डबो राखीव, एसी नाशिल्लो डबो आशिल्ल्यान ताका जोडून सामानाचो डबो आशिल्लो. रेल्वेंत प्रवेश केले उपरांत प्रवाशांनी रेल्वे तपासपाक येता ताका जाप विचारली. मात ताचे कडेन सांगपाक कांयच नाशिल्लें. उपरांत तांणी त्या प्रवाशांची वेवस्था हेर डब्यांत केली. ह्या प्रकरणांत प्रवाशांनी रेल्वे प्रशासना कडेन कागाळ केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
