भांगरभूंय | प्रतिनिधी
भांगरभूंय । खबरां मेज
पणजीः 1967 वर्सा जनमत कौलांतल्यान सर्वधर्मीय गोंयकारांनी गोंयचें स्वतंत्र अस्तित्व सांबाळून दवरलें. आतां जावपी लोकसभा वेंचणुकांतल्यान दुस्वासाच्या राजकारणाक पयस दवोरून मनीसपण आनी मोगाचेर उबें आशिल्लें गोंयकारपण राखून दवरपाचें दुसरें आव्हान सुजाण गोंयकारां मुखार आसा असो सूर
ज्येश्ठ पत्रकार संदेश प्रभुदेसाय हाच्या “डबल इंजिनः हिस्ट्री ऑफ गोवाज लोकसभा इलॅक्शन्स” ह्या पुस्तकाच्या प्रकाशना उपरांत जाल्ल्या चर्चासत्रांत उक्तायलो.
गुरुदास सावळ, अनिल पै, प्रकाश कामत आनी ज्युलियो डिसिल्वा ह्या पत्रकारांनी ह्या चर्चासत्रांत वाटो घेतिल्लो. कुलदीप कामतीन ताचें संचालन केलें.
गोंयचो धर्मीक एकचार ही पुराय भारत देशा सामकार आशिल्ली एक आदर्श अशी देख आसा. मात दुसरे वटेन धर्म आनी प्रादेशिकतेच्या नांवान दिसान दीस दुस्वासाचें राजकारण गोंयांत मूळ धरपाक लागलां आनी ताका लागून गोंयकारपणाची बुन्याद कोसळपाक लागल्या. अशा वेळार 1967 वर्सा जे तरेन सर्वधर्मी गोंयकारांनी जनमत कौलांतल्यान गोंयचें स्वतंत्र अस्तित्व राखून दवरिल्लें, तेच तरेन आज लोकसभा वेंचणुकेंतल्यान धर्मीक एकचाराचो आदर्श पुराय देशामुखार दवरप हें दुसरें आव्हान मतदारांमुखार आसा हाचेर सगळ्याच मानेस्तांचे एकमत जालें
रोजगार आनी आपरोजगारा खातीर गोंयांत येवन राबितो केल्ल्या बिगरगोंयकारांक एक व्होट बँक कशी वापरून तांच्यो मुळाव्यो गरजो तांकां दितना राजकी उपकार केल्लेवरी राजकारणी वागतात अशें मत अनिल पै हाणे उक्तायलें. दरेका भारतीयाक ताच्यो मुळाव्यो गरजो दरेका राज्यांत दिवप हो तांचो मुळावो हक्क म्हणून तांकां त्यो मेळपाक जाय हे विशीं सुजाण गोंयकारांनी ह्या बिगरगोंयकारांक शिक्षीत करपाक जाय आनी आमीय तांकां मनीस म्हूण वागणूक दिवपाक जाय अशेंय ताणे म्हणलें.
एका तेंपार काँग्रेस पक्षान भाटकारांक आपले उमेदवार केल्ल्यान पेडणे सारक्या गांवगिऱ्या वाठारांतल्या कश्टकरी मतदारांनी ह्या पक्षाक न्हयकारून मगो पक्षाचें सरकार वेंचून दिल्लें. दुर्दैवाने हेच कूळ-मुंडकारांचे थळावे पक्ष आज सुवार्थाच्या राजकारणांत पुराय बुडल्यात आनी तोच खरो धोको आसा अशी भिरांत ह्या वेळार गुरुदास सावळ हाणे उक्तायली.
सुरवेक लोकाभिमुख आशिल्ले प्रादेशीक पक्ष आज फुडारी-केंद्रीत जाल्यात आनी ताकाच लागून विधानसभा आनी लोकसभा वेंचणुकांनी ते मतदाराचे नदरेन निष्प्रभ थारल्यात. लोकांच्या अपेक्षांकडल्यान ते खूपच पयस गेल्यात अशें मत ज्युलियो डिसिल्वान उक्तायलें. कांय राजकी घडणुकांचो उल्लेख करून काँग्रेसींतल्या अंतर्गत वादाचो फायदो घेवन आनी तांचेमदीं फूट घालून भारतीय जनता पार्टीन गोंयांत आपलें बस्तान कशें बयवलें, हाचेर प्रकाश कामत हाणे उजवाड घातलो. हे प्रकार अशेच चालू उरल्यार भोवसंख्यांकांची धर्मीक राजवट गोंयांत सासणाची प्रस्थापीत जातली अशें मतय ताणे उक्तायलें.
उपरांत प्रेक्षकांवांगडा जाल्ले चर्चेंत व्हिक्टर गोन्साल्वीस, उदय देशप्रभू, गॅरी आझावेदो, नमन सावंत धावस्कार, आल्बेर्टिना आल्मेदा, प्रशांत नायक, जेरट डिसिल्वा, ह्रषिकेष कदम आनी किशोर नायक गांवकार हांणी वांटो घेतलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
