भांगरभूंय | प्रतिनिधी
मुख्यमंत्री: साळांत साडेतीनशें कोटी रुपयांच्या प्रकल्पाचो बसयलो बुन्यादी फातर
दिवचल: एप्रील आनी मे म्हयन्यांत जाणवपी उदकाचो उणाव भरून काडपा खातीर, साळ हांगचे शापोरा न्हंयचेर उदकाची योग्य तरेन वेवस्था करपी आनी गांवच्या लोकांची तान भागोवपाक साडेतिनशे कोटी रुपया खर्चून बांदपी हो भोवउद्देशी प्रकल्प थळाव्यांचे त्रास उणे करपी थारतलो. ह्या प्रकल्पांत अडेजशें एमएलडी उदक सांठून उरतलें. पूण जनतेन उदकाचो इबाड करिनासतना तें योग्य तरेन वापरचें असो उलो मुख्यमंत्री डॉ. प्रमोद सावंत हांणी मारलो.
जलसंसाधन खात्या वतीन साळ हांगचे शापोरा न्हंयचेर साडेतीनशें कोटींचो व्हड आनी भोवउद्देशी प्रक्रिया प्रकल्प, शापोरा न्हंयवेलें धरण (बेराज),तशेंच अडेजशें एमएलडी कच्चें उदकाची पुरवण करपी पंपींग स्टेशन, तशेंच दिवचल आनी पेडणें म्हालाक जोडपी पूल ह्या धरणा वरवीं उबारतले. ह्या कामाच्या बुन्यादी फातर बसोवपाचे कार्यावळी वेळार मुख्यमंत्री डॉ. सावंत उलयताले. ह्या वेळार मंत्री सुभाष शिरोडकार, आमदार डॉ. चंद्रकांत शेट्ये, आमदार प्रवीण आर्लेकार, सदानंद तानवडे हाजीर आशिल्ले.
अर्थमंत्री म्हणून राज्याचो विचार करतना फुडली येवजण करची पडटा. दोन वर्सां उपरांत राज्याक कसलेंच रीण घेवचें पडचें ना अशे तरेची येवजण केल्या. मोपा विमानतळ, खण वेवसाय आनी जीएसटीक लागून अर्थीक तजवीज बरे तरेन जातली. देखून दोन वर्सां उपरांत घटमूट अर्थीक स्थितीक लागून रीण घेवपाची गरज पडची ना अशें आश्वासन मुख्यमंत्र्यान उक्तायलें.
साळांतले शापोरा न्हंयचेर बांदपी हो नव्या तंत्रगिन्यानाचो एक उत्कृश्ठ प्रकल्प. हाका लागून साळ गांवांत येवपी हुंवार थारतलो. दोनूय वटांनी राखणे वणटी उबारतले. तशेंच उदका प्रकल्पा वरवीं साळ गांवा खातीर खाशेलो शुध्दीकरण प्रकल्प येवन गांवांत उदक नियमित करतले. स्वयंपूर्ण आनी आत्मनिर्भर गोंयां खातीर सरकार सगळे तरेचें यत्न करता. ताका लागून शेतकी, बागायती आनी हेर गजाली तशेंच भरपूर पिवपाचें उदक उपलब्ध करून दिवपाची येवजण सरकाराची आसा अशें मुख्यमंत्र्यान फुडें सांगलें.
मंत्री सुभाष शिरोडकार हांणी उदकाचें योग्य नियोजन आनी चड साठवण उपलब्ध करपा खातीर साळ हांगचो साडेतीनशें कोटींचो प्रकल्प वरदान थारतलो. हुंवाराचो धोको पयस करपा खातीर शापोरा न्हंयेंतलो गाळ उसपुपाची येवजण आसा. येवपी कांय म्हयन्यांनी राज्यांत पन्नास नवीं धरणां उबारतले अशी घोशणा तांणी केली. साळ गांवाच्या उदकांतल्यान उत्तर गोंयची तान भागतली अशें तांणी म्हणलें.
आमदार डॉ. चंद्रकांत शेट्ये हांणी हो साळांतलो म्हत्वाचो प्रकल्प आशिल्ल्यान थळाव्या लोकांक जायत्यो सुविधायो आनी रोजगार संदी मेळटल्यो. धा एमएलडी जल प्रकल्पा वरवीं ह्याच गांवांत शुध्द केल्लें उदक सगळ्यांक मेळटलें अशें तांणी सांगलें.
सदानंद तानवडे हांणी राज्याच्या सैमीक संपत्तीचो योग्य वापर करून राज्याक उदकांत स्वावलंबी करपाचो थाराव पुराय करपाची येवजण आसा. साळांतले हे नवे येवजणे वरवीं पुराय बार्देस, पेडणें म्हालांक तशेंच पुराय दिवचलेक उदकाची पुरवण जातली अशें तांणी म्हणलें.
प्रवीण आर्लेकार हांणी ह्या प्रकल्पांतल्यान शेता खातीर आनी पिवपाची सुविधाय मेळटली हे खातीर समाधान उक्तायलें.
मुख्य अभियंतो प्रमोद बदामी हांणी प्रकल्पाची म्हायती दिली. ह्या वेळार प्रदीप रेवोडकार, सरपंच, पंच, आनी हेर कार्यकर्ते हाजीर आशिल्ले.
मानेस्तां हस्तुकीं बुन्याद तशेंच नांव तखट्याचें अनावरवण जालें. डॉ. दयानंद राव हांणी हे कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
