भांगरभूंय | प्रतिनिधी
राष्ट्रा राष्ट्रांत, झगडीं झुजां जावन दुसऱ्या म्हाझुजा प्रमाण नव्या नव्या संहाराक आनी घातक शस्त्रां अस्त्रांचो परतून वापर जालो जाल्यार पुराय मनीसकुळयेचेर व्हडल्यांतलें व्हडलें शंकश्ट येतलें, आनी तें पुरायेन ना जातलें ह्या भंयानूच धर्तरे वेलीं सगलीं राष्ट्रां भंयान थरथरलीं. अशी परिस्थिती वांट्याक येवची न्हय देखून दर एक राष्ट्र विचार करूंक लागलें. मनीसकुळये वेल्या अरिश्टाचें हें सांवट पयस करपा खातीर राष्ट्रां राष्ट्रां आपले भितरले संबंद वाडीक लावपाचे यत्न करूंक लागलीं. ह्या आकांताच्या एकाच संकश्टांतल्यान मेकळे जावचे खातीर तांचे आड उपाय येवजण म्हणून सगल्या राष्ट्रांनी खंयचेय परिस्थितींत आपणा भितरले वाद, दुस्मानकाय विसरायेर घालून एकठांय येवपाचें थारायलें. हो भिरांकूळ प्रस्न एकवटीतपणान सोडोवपा खातीर मुखेल राष्ट्रां मुखार सरलीं. आशावादी राष्ट्रांचो आंकडो पन्नासाचेर पावलो आनी…
सान फ्रांन्सिस्को शारांत एकवटीत राष्ट्रांचें पयले वयले बसकेंत एके खाशेले समजिकायेचे सनदीचेर सयो जाल्यो. इतिहासांत हें एक भांगराळें पर्व थारलें.
पुराय संवसारा मुखार प्रस्न फक्त म्हाझुजांच्या भंयाचो नाशिल्लो. जाल्यार ते वरवीं पुराय संवसारांत उपासमार, तरेकवार पिडा, लोकसंख्या, सैमीक संकश्टां, जातीभेद, अस्पृशताय, दादलो-बायल विशमताय आदीं तरेचे ते वेळे वयले विंगड विंगड प्रस्न भौसाक-जतनेक गिळपाचे तयारेंत राविल्ले. ह्या तरातरांच्या संकश्टांतल्यान मेकळीक करून घेवपा पासत 1945 वर्सां 25 ऑक्टोबराक ‘संयुक्त राष्ट्रां’ ही संघटणा संवसारीक पांवड्यार चलणुकेंत आयली. तातूंत मुखेल 50 राष्ट्रां आपूण जावन वांटेकार जालीं.
पुराय संवसाराक फुडारांतल्या झुजां सावन राखप, वाटावप हाचे परस राष्ट्रां राष्ट्रां मदीं झुजूच जावचें न्हय म्हणून संबंदींत राष्ट्रां आपले परीन यत्न करीत रावलीं. सगल्या राष्ट्रांनी शांततायेच्या मार्गार पावल मारीत एकामेकांच्या आदारान एकामेकांची उदरगत घडोवन हाडप ही मोख बाळगिली, आनी संघटणेचो वावर मुखार व्हरपाक गती दिली.
पारतंत्र्यांत आशिल्ल्या राष्ट्रांक लेगीत स्वतंत्रताय मेळोवन दिवपा खातीर ही संघटणा वावरूंक लागली. संघान जी मोख बाळगिल्ली तातूंत दादल्या-बायलांक समान हक्क तशेंच तांचे मूळ हक्क तांकां मेळोवन दिवपा पासत हे संघटणेंतल्यान नेटाचो वावर जायत रावलो. ह्या अशे तरेच्या वावराक लागूनच दरेक राष्ट्राक आपूण एकोडें आसा, निराधार आसा अशी भावना तांचे मदीं निर्माण जाली ना. एकामेकांच्या आदारान संघटणेंतल्या राष्ट्रांचे मानसीक बळगें वाडीक लागलें, वावराक घटसाण आयली.
एकामेकांक अनवळखी तशेंच दुबळ्या राष्ट्रांनी जे पेंच, प्रस्न उप्रासूंक लागले तांकांय ते सोडोवन थाकाय दिवपा खातीर एकवटीत राष्ट्रसंघ वावरूंक लागलो. तांचे प्रस्न समजिकायेन सुटावे जावंक लागले.
राष्ट्रा-राष्ट्रांतल्या ताणतणावांचेर उप्राशिल्ले स्थितीचेर उपाय काडपा खातीर झगडीं झुजां टाळपा खातीर मोलाचे यत्न जावपाक लागले. राष्ट्रांचे यत्न उणे पडपाक लागत जाल्यार झुजांत आस्पाविल्ल्या राष्ट्रांक झूज बंदीचें आव्हान एकवटीत राष्ट्रां करपाक लागलीं. संघटणेच्या वांगडी राष्ट्रांनी शांतताय तिगोवपाचे यत्न चालूच दवरले.
संवसारीक पांवड्यार शांतताय नंदची, सहकार वाडीक लागचो, इश्टागतीचे संबंद घटमूट जावचे हे खातीर एकवटीत राष्ट्रसंघाचे कांय घटक आयजूय वावरत आसात. आयजूय एकवटीत राष्ट्रसंघाची आमसभा, राष्ट्रां मदले वाद, दळडीर, लिंगभेद, निरपेक्षताय आदीं प्रस्न सोडोवपाक मार्गदर्शन करीत आसा. ते खातीर व्हडल्यो व्हडल्यो शिखर परिशदो, संमेलनां, भासाभाशेच्यो कार्यावळी तशेंच म्हत्वाच्यो बसका जावन अर्थीक, समाजीक परिशदेंत शिक्षण, भलायकी, बालकल्याण, उपासमार, दळडीर हे सारकिल्ल्या म्हत्वाच्या विशयांचेर, प्रस्नांचेर, समस्यांचेर संवसारीक पांवड्यार उपाय काडटात. सगल्यांच्या हिताच्यो येवजण्यो आंखतात.
राष्ट्रां राष्ट्रां मदले वाद मिटोवपा खातीर संवसारीक पांवड्यार नेदरलॅण्डांतल्या ‘ध हेग’ शारांत आंतरराष्ट्रीय न्यायालय आसा. एकवटीत राष्ट्रांचो वेव्हार, कारभार सांबाळपी सचिवालयांचें मुखेल कार्यालय न्यू यॉर्क शारांत आसा. खेरीत संघटणेचो वावर सुरतळीतपणान, निपक्षपातीपणान मुखार व्हरपाक कांय खाशेल्यो संस्था उबारिल्ल्यो आसात. युनेस्को ही संस्था शिक्षण, विज्ञान आनी संस्कृताय ह्या मळां वेले पेंच, अडचणी पयस करून राष्ट्रांक मार्गदर्शन करीत आसता. संवसारीक भलायकी संघटणा भलायके विशीं तशेंच मनीसकुळयेक सतावपी जायत्यो पिडा, दुयेंसां तशेंच रोगप्रतिबंधक उपाय येवजण्यां संबंदान मार्गदर्शन करून अडचल्ल्यांक थाकाय दिता, आदार दिता. आंतरराष्ट्रीय कामगार संघटणा संवसारांतल्या कामगारांच्या कल्याणा खातीर नेटाचो दोळे दिपकावपी वावर करीत आसा. ती कामगारांच्या समस्यांचेर भासाभास करून तांचे आड उपाय येवजण्यो आंखता आनी कामगारांचे हीत सादून उद्देगीक उदरगतीक पालव दिता.
संवसारांत कांय राष्ट्रां गिरेस्त आसात. जाल्यार कांय गरीब. इंग्लंड, अमेरिका, जपान ह्या सारकिल्ल्या उदरगत जाल्ल्या राष्ट्रांनी इथिओपिया, नेपाळ हांचे सारकिल्ल्या गरीब, ल्हान राष्ट्रांक सहकार, आदार दिवपाचे नदरेन एकवटीत राष्ट्रां यतीन करीत आसा. आंतरराष्ट्रीय प्रस्न आनी मतभेद, झुजां करिनासतना शांततायेच्या मार्गान सोडोवपा खातीर ही संस्था नेमान तळमळीन वावुरता. एकवटीत राष्ट्रांनी जनकल्याणाचो उंचेलो पांवडो हुपूं हेंच आयच्या दिसा निमतान आंवडे.
उल्हास यशवंत नायक
8010061867
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
