भांगरभूंय | प्रतिनिधी
म्हापशेंच्या खोर्ली वाठारांत काकुलो काॅलेजीच्या सभाघरांत ग्राहक मंचाचे सगले वांगडी एकठांय जाल्ले. तातूंत साबार म्हाविद्यालय मंचाचे प्रतिनिधी, शाळांचें प्रतिनिधी आनी भौस आशिल्ले. माचयेर काॅलेजीचे प्राचार्य संतोष पाटकार, प्रकाश कामत, सौ. ज्योती सरदेसाय हाजीर आशिल्लीं. काकुलो काॅलेजीचो ग्राहक क्लब तशेंच उत्तर गोंय तालुको पांवड्याचेर जागृताय जावची म्हूण गोवा कॅनाचे रोलडं मार्टीन्स हांणी हे यत्न केल्ले. रोलंड दर म्हयन्याक आपल्या कार्यालयांत ग्राहक जागृतायेच्यो कार्यावळी दवरतालो. अश्यो दोनशे कार्यावळी तांणे दवरल्यात. अजून करीत आसा. हांव ताच्या कार्यावळींक जरूर पावतालो. ताच्या उलोवपा वेल्यान कळटालें, की ताका कृती जाय म्हूण. आनी तसल्याच वावुरप्यांक तो आपयतालो. माध्यमीक आनी उच्च माद्यमीक शाळांनी ताणें 135 ग्राहक क्लब सुरू केल्यात. हेल्मॅट, येरादारी बाबतींतली जागृताय तोखणाय करी सारकी. तें फक्त रोनाल्डूच करपाक शकता. पयरचे कार्यावळींतल्यान गरिबांक उपेगी पडत अशीं वखदां खंय मेळटात, ह्या सगल्यांक पडिल्ल्या प्रस्नाचेर चर्चा जाली. केंद्र सरकारान जेनेरीक वखदां अखंडपणान मेळपाची तजवीज कांय सुवातांनी केल्या. हाची जागृताय तितली जावंक ना. उरफाटे गैरसमज पातळ्ळ्यात. खरें तर असलीं केंद्र गांवांनी उक्तीं केलीं जाल्यार बेरोजगार तरणाट्यांक रोजगार तर मेळटलो, वयर म्हारगायेच्या दिसांनी सगल्यांक थाकाय मेळटली.
प्रकल्प निमंत्रक करिता फडटे हांणी सांगलें, ह्या जेनरिक वखदां विशीं गैरसमज पातळ्ळ्यात. ते म्हणल्यार हीं वेगळीं वखदां म्हूण. पूण तशें ना. दोतोर बरोवन दितात तींच वखदां आसता, पूण तांचें मोल परवडपा सारकें आसता, इतलेंच. घडये वखदां करपी कंपनी वेगळी आसत. तुमी लागींच्या फार्मासींत गेल्यार न्हयकार मेळपाची चड शक्यताय. तीं वखदां आमचे कडेन नात, अशें ते सांगूं शकतात. पूण जनौशधी केंद्रांत वच्चशात जाल्यार तीं थंय मेळूं शकतात. हीं केंद्रां खंय आसा तें आमकां खबर नासता. मागीर आमी फार्मासकार दिता तीं वखदां घेवन तो सांगता तितली रक्कम दिवची पडटा. अर्थांत तो चड पयशे घेवचो ना. कारण तो बील दिता. पूण एखादो फार्मासकार तुमचे कडल्यान चड पयशे घेता म्हूण कागाळ आयली तर ग्राहक मंचाचे लोक त्या फार्मासकाराक त्रासदायक थारतात. वखदाचें मोल कितलें आसचें, वखद केन्ना तयार केल्लें. ताची एक्सपायरी तारीख कितली हे वखदाचेर छापिल्लें आसता. हें बऱ्याच लोकांक खबर नासता. हें लोकां मेरेन वचपाची गरज आसा, हें काम करपी म्हणल्यार लोकसेवक, देशसेवकूच. दरेके शाळेचो ग्राहक मंच ते खातीर आसूंक जाय.
जनौशदी ही केंद्र सरकाराची एक येवजण. जांकां म्हारग वखदां घेवपाक जायना ते दुयेंती ह्या केंद्रांत वचूं शकतात. गोंयांत लेगीत अशी केंद्रां सुरू जाल्यांत. ती उणीं आसात. म्हापशें आझिलोंत, जीएमसींत आसात. जर तुमकांय सुरू करूंक जाय, तर फार्मासीचे कांय नेमूच लागू जातात. तुमी विज्ञान फांटो घेवन नीट परीक्षा पास जावन फार्मसीचो डिप्लोमा करपाक जाय. तशें हें केंद्र सामूहीक पद्दतीनूय सुरू करूं शकतात. तांचे वेबसायटीचेर तशी म्हायती आसा. म्हाका दिसता हे येवजणेचो लाव गांवगिऱ्या वाठारांतल्या दुयेंतींक जावंक जाय. शारांतल्या लोकांक दर परवडूं शकतात, पूण गरीब गांवकारांक तो परवडचो ना. एक हजार रुपयांचीं वखदां दोनशे ते तिनशे रुपयांक मेळप म्हणल्यार तांकां अजापाची गजाल. वयले पयशे ते गरजेच्यो वस्तू घेवपाक मोडपाक शकतात. तुमी जेन्ना भलायकी केंद्रांत वतले, तेन्ना दोतोराक हांव जिनेटीक वखदां खातीर वनौशधी केंद्रांत वतलों हें सांगपाक विसरूं नाकात. जिनेटीक फार्मसी आतां तितली लोकप्रीय जावंक ना. पूण जेन्ना ती जातली तेन्ना त्या वखदांची नक्कल वखदां येवंक शकता. ताका लागून खबरदारी बाळगूंक जाय. आपूण कसलें वखद घेता ताची म्हायती, तें कित्याक घेता, भितर कितें आसा, हें जाणून घेयात. वाठारांतल्या एखाद्या वाचप्या कडल्यान हें वाचून घेयात.
गोयांत जिनेटीक वखदांची 12 केंद्रां आसात. पणजी, वास्को, माशेल, फोंडें, मडगावं, दिवचल, वाळपय, काणकोण, कुडचडें, म्हापश्यां आनीक दोन कडेन तीं
आसात. प्रधानमंत्री जनौशधी केंद्र अशें तांचें नांव. मुखेल गजाल म्हणल्यार सगल्या सरकारी हाॅस्पिटलांनी तीं मेळटात. तुमी खंयचेय सुवातीचेर फार्मसी उक्ती करपाक शकतात, एक पात्र फार्मासीस्ट दवरूंक शकतात. तुीचस्वताचे मालकेचो ल्हान जागो मात जाय. तुमकां जाय जाल्या www.janashoudhi.gov.in हे वेबसायटीचेर सगली म्हायती घेवं येता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
