भांगरभूंय | प्रतिनिधी
इंडियन प्रिमीयर लिगेच्या (आयपीएल) 2023च्या हंगामा खातीर जावपी पावणे पयलीं सगल्या फ्रॅंचायजींनी तांणी कायम दवरिल्ल्या आनी मेकळे केल्ल्या खेळगड्यांची वळेरी भारतीय क्रिकेट नियामक मंडळाक (बीसीसीआय) दिवपाक सुरवात केल्या.
ह्याच क्रमांत आयपीएलाचो आदलो वस्ताद चेन्नय सुपरकिंग्सान (सीएसकेन) आपली वळेरी बीसीसीआय कडेन सादर केल्या. व्हड गजाल म्हणल्यार सीएसकेन अश्टतासांचो खेळगडो रवींद्र जडेजाक कायम दवरला. जाल्यार ड्वेन ब्राव्हो, सी हरी निशांत, के भगत वर्मा, के एम आसिफ, नारायण जगदीशन, अॅडम मिल्ने, क्रिस जॉर्डन आनी मिशेल सॅंटनर हांकां मेकळे केल्या.
फाटल्या हंगामांत फ्रॅंचायजी आनी जडेजा हांचे मदले संबंद इबाडिल्ले. ताका लागून 2023च्या हंगामांत जडेजा सीएसके वतीन खेळचो ना अशी चर्चा आशिल्ली. पूण, सगल्या चर्चांक चुकीचें थारायतना सीएसकेन जडेजाक पंगडांत कायम दवरलो.
जॉर्डनाक सीएसकेन फाटल्या हंगामांत 3.60 कोटी खर्च करून विकत घेतिल्लो. पूण, ताचें प्रदर्शन अपेक्षे प्रमाण जावंक नाशिल्लें. चार मॅचींनी ताणें फक्त दोन विकेटी घेवपाक येसस्वी थारिल्लो.
मजगतीं, सनरायझर्स हैदराबादान अणभवी केन विलियम्सनाक
मेकळो केला. फाटल्या हंगामांत सनरायझर्स हैदराबादान 14 कोटी खर्च करून विलियम्साक आपल्या पंगडांत कायम दवरिल्लो. फाटल्या हंगामांत ताणें 13 मॅचींनी खेळटना 216 धांवड्यो केल्ल्यो.
पंजाब किंग्सान मयंक अग्रवालाक मेकळो केलो. अंदूं जाल्ल्या आयपीएलांत अग्रवालान पंजाब किंग्साचें फुडारपण केल्लें. पूण, ताच्या फुडारपणाखाला पंजाब किंग्साक बरें प्रदर्शन करपाक जमूंक नाशिल्लें. पंगड सवे सुवातेर उरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
