भांगरभूंय | प्रतिनिधी
दिवाळेचो मोसम जसजसो लागीं येता, तसतसो हाव दीपोत्सवाच्या येवकाराक सज्ज रावतां. हांव दरवर्सा दिवाळी मनयता. फांतोडेर नरकासूराचें दहन केले उपरांत आमी आकाशदिवो आनी पणट्यो पेटयतात. सकाळीं न्हातकच कारिटाचो कोडू आस्वाद घेवन पांच प्रकाराचे फोव खातात.
आमचें लग्न आंतरधर्मीय आसलें तरी म्हजी घरकान्न सविता, चलो नवदीप आनी चली अंजली हीं हिंदूच आसात. हांवूय हो दिव्यांचो सण मनोवपाक कुटुंबांत वांटेकार जाता. आमी 2016 सावन चवथूय मनयतात. वेऱ्यां आमच्या घरांत. तशेंच ख्रिसमस, इश्टर आनी हेर सणूय मनयतात. पयलीं आमी घरांतूच आकाशदिवे करताले. दिवाळे पयलीं दोन- तीन सप्तकां तयारी करताले. आतां सगलेच व्यस्त आशिल्ल्यान आकाशदिवे विकत घेतात. चलो नवदीपान हिंदू चलये कडेन लग्न केलां. म्हाका निवान नांवाचो नातू आसा.
म्हजो जल्म फोंडेंचो. हांव कुटुंबांतलो एकलोच चलो. आई हिंदू सारस्वत. व्हड जातना दिवाळी हो सगल्यांचो खोशयेचो काळ आशिल्लो. म्हज्यो आवडट्यो यादी माराणाच्यो, खावन सोंपनाशिल्ल्या मिठाय, फराळाच्यो आसात. कोणूय मेळ्ळो काय तांकां हिंदूं सारको उलयतां म्हूण अजाप दिसता. हांव हिंदू भक्तीगितांय बरयतां. हांव मराठी पदां कशीं बरयतां हाचेंय लोकांक अजाप दिसता. हांव सेंट मेरी स्कूलांत इंग्लीश माध्यमांत शिकलों, तरीय म्हजी आवय दूरदृश्टीची आशिल्ली. एके मराठी मुळावे शाळेंतलो निवृत्त सरकारी शिक्षक म्हाका घरा मराठी शिकयतालो. आवय म्हाका पुराणांतल्यो काणयो, हिंदू संस्कृतायेंतल्या मुळाव्यो गजाली शिकयल्यो. बापूय, आतें, चुलत भावांनी म्हजी क्रिस्तांव धर्माची बुन्याद घाली.
आमी दर वर्सा दिवाळेची वाट पळयतात, नवे कपडे घालतांत, सांजवेळा घरकान्न पूजा करता. मागीर चमचमीत मिठाय. ख्रिसमस आनी इस्टरुय पारंपरिक पद्दतीन मनयतात. ‘वसुदेव कुटुंबकम’ ह्या ब्रीद वाक्या प्रमाण जगपाचो यत्न आसता. जाचो अर्थ ‘जग हें एक कुटुंब’. भुरग्यांनी तांच्या संयुक्त दायजाचो आदर करप आनी सगले सण, परबो मनोवप हें खूब म्हत्वाचें. हें एकमेकांच्या परंपरांचो आदर करतकच, स्वताच्या पालकांनी फुडाकार घेतकच सहज जाता. आमच्या भुरग्यांक सण, परंपरेचो थाट आवडटा. आमचे सण हे रंगाचे स्फोट आसात. कपडे, खाणांनी सगले कडेन रंगाची उधळण. भुरग्यांक भारतीय दायजाचो खूब अभिमान दिसता, जाका लागून म्हाका आनंद, खोस जाता.
‘भोव संस्कृताय’ हो निरोगी संवसाराच्या दृश्टीकोनाचो एक बरो स्रोत आसा. आमी आमच्या भुरग्यांक प्रामाणिकपणान जीवन दिवपाचो यत्न करतात आनी आशा करतां की तीं व्हडलीं जातकच संवसाराचीं बरीं नागरीक जातलीं. भोव सांस्कृतिक आशिल्ले खातीर हांव स्वताक खूब भाग्यवान समजतां.
– जाॅन आगियार
98221 59705
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
